ନୂଆଦିଲ୍ଲୀ,୨।୮: ଭୋଜପୁରୀ ସୁପରଷ୍ଟାର ତଥା ଭାଜପା ଏମ୍ପି ରବି କିଶନ ଶୁକ୍ରବାର ଇନ୍ଷ୍ଟାଗ୍ରାମରେ ଏକ ଫଟୋ ଶେୟାର କରିଛନ୍ତି। ଯେଉଁଥିରେ ସେ ପ୍ରବଳ ବର୍ଷାରେ କିଛି ସ୍କୁଲ ପିଲାଙ୍କୁ ସାହାଯ୍ୟ କରୁଥିବା ଦେଖିବାକୁ ମିଳିଛି। ରବି କିଶନ ଫଟୋ ଶେୟାର କରିବା ସହ ଘଟଣାର ସବିଶେଷ ତଥ୍ୟ ଏକ କ୍ୟାପସନ୍ରେ ଲେଖିଛନ୍ତି। ସୂଚନାଯୋଗ୍ୟ, ରବି ସକାଳେ ସଂସଦ ଯାଉଥିବା ବେଳେ ରାସ୍ତାରେ କିଛି ପିଲାଙ୍କ ଚିତ୍କାର ଶୁଣିଥିଲେ। ବାହାରକୁ ଆସି ଦେଖିବା ପରେ ସ୍କୁଲ ପିଲାଙ୍କ ଏକ ଗାଡ଼ି ଦୁର୍ଘଟଣାଗ୍ରସ୍ତ ହୋଇଥିବାରୁ ପ୍ରବଳ ବର୍ଷାରେ କିଛି କୋମଳମତି ଶିଶୁ ଠିଆ ହୋଇ କାନ୍ଦୁଥିବା ସେ ଦେଖିବାକୁ ପାଇଥିଲେ। ପିଲାଙ୍କର ଏପରି ଅବସ୍ଥା ଦେଖି ରବି ନିଜେ ବର୍ଷାରେ ଭିଜି ସେମାନଙ୍କୁ ସାହାଯ୍ୟର ହାତ ବଢ଼ାଇବା ସହ ପିଲାଙ୍କୁ ସୁରକ୍ଷିତ ସ୍ଥାନକୁ ନେଇଥିଲେ। ଏହି ଫଟୋ ଏବେ ସୋସିଆଲ ମିଡିଆରେ ଭାଇରାଲ ହୋଇଥିବା ବେଳେ ତାଙ୍କର ଏଭଳି କାର୍ଯ୍ୟକୁ ପ୍ରଶଂସା କରାଯାଇଛି।
