ପ୍ୟାରିସ୍,୨୪।୪ (ଏଏଫ୍ପି): କୋଭିଡ୍-୧୯ ମହାମାରୀ କାରଣରୁ ଆଉ ଏକ ବଡ଼ ଇଭେଣ୍ଟ ବାତିଲ ହୋଇଛି। ପ୍ୟାରିସ୍ରେ ଆସନ୍ତା ଅଗଷ୍ଟ ମାସରେ ଆୟୋଜନ ହେବାକୁ ଥିବା ହାଇପ୍ରୋଫାଇଲ ୟୁରୋପିଆନ୍ ଆଥଲେଟିକ୍ସ ଚାମ୍ପିୟନଶିପ୍କୁ କରୋନା ଭାଇରସ ସଂକ୍ରମଣ କାରଣରୁ ବାତିଲ କରାଯାଇଛି। ଏ ନେଇ ଚାମ୍ପିୟନଶିପ୍ର ଆୟୋଜକ କମିଟି ଓ ଫ୍ରେଞ୍ଚ୍ ଆଥଲେଟିକ୍ ଫେଡେରେଶନ (ଏଫ୍ଏଫ୍ଏ) ସୂଚନା ଦେଇଛନ୍ତି। କରୋନା ଭାଇରସ ସଂକ୍ରମଣ ବିରୋଧରେ ଲଢେଇ ପାଇଁ ଓ ମାନବ ସ୍ବାସ୍ଥ୍ୟକୁ ଅଗ୍ରାଧିକାର ଦେଇ ଆମେ ଏହି ନିଷ୍ପତ୍ତି ନେଇଛୁ ବୋଲି ଏହି ଦୁଇ କ୍ରୀନା ପ୍ରଶାସନିକ ସଂସ୍ଥା ସୂଚନା ଦେଇଛନ୍ତି।
ୟୁରୋପିଆନ ଚାମ୍ପିୟନଶିପ୍ ଅଗଷ୍ଟ ୨୫ରୁ ଆରମ୍ଭ ହୋଇ ୩୦ ତାରିଖରେ ଶେଷ ହେବାର କାର୍ଯ୍ୟକ୍ରମ ଥିଲା। ଏହାପୂର୍ବରୁ ଟୋକିଓ ଅଲିମ୍ପିକ୍ସ ଓ ଓେରେଗନ୍ର ୟୁଗେନେରେ ଆୟୋଜନ ହେବାକୁଥିବା ଡାଇମଣ୍ଡ ଲିଗ୍କୁ ମଧ୍ୟ ସମାନ କାରଣ ଯୋଗୁ ଘୁଞ୍ଚାଇବାକୁ ନିଷ୍ପତ୍ତି ନଆଯାଇଛି। ୟୁରୋପିଆନ ଇଭେଣ୍ଟକୁ ଆମେ ନିର୍ଦ୍ଧାରିତ ସମୟରେ ଆୟୋଜନ କରିବାକୁ ଆମେ ପ୍ରୟାସ କରିଥିଲୁ ବୋଲି ପ୍ୟାରିସ ୟୁରୋପିଆନ ଚାମ୍ପିୟନଶିପ୍ ଆୟୋଜକ କମିଟି ଅଧ୍ୟକ୍ଷ ଜିନ୍ ଗ୍ରାସିଆ କହିଛନ୍ତି। ପରିସ୍ଥିତିରେ ଉନ୍ନତି ଘଟିବ ବୋଲି ଆମେ ଆଶା କରୁଥିଲୁ। ଆଥଲେଟ୍ମାନଙ୍କ ସଂଖ୍ୟା ଓ ଦର୍ଶକ ସଂଖ୍ୟା କମାଇବା ଲକ୍ଷ୍ୟରେ ଥିଲୁ। କିନ୍ତୁ ଦୁର୍ଭାଗ୍ୟବଶତଃ ଏପରି ହୋଇ ନ ଥିଲା।
ଆୟୋଜକ କମିଟି ଓ ଏଫ୍ଏଫ୍ଏ ବୈଠକରେ ବସିବା ପରେ ଚାମ୍ପିୟନଶିପ୍କୁ ବାତିଲ କରିବା ନେଇ ନିଷ୍ପତ୍ତି ନିଆଯାଇଥିଲା ବୋଲି କଣ୍ଟିନେଣ୍ଟାଲ ଗଭର୍ଣ୍ଣିଂ ବଡି ୟୁରୋପିଆନ୍ ଆଥଲେଟିକ୍ସ ସୂଚନା ଦେଇଛି। ଆଥଲେଟ୍, ପ୍ରଶଂସକ, ଅଫିସିଆଲ, ପାର୍ଟନର ଓ କୀଡ଼ା ସହିତ ସମ୍ପର୍କିତ ସବୁ ଲୋକଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି ବୋଲି କୁହାଯାଇଛି। ଆଗକୁ ବିଶ୍ୱର ଆଥଲେଟିକ କ୍ୟାଲେଣ୍ଡରର ଅନ୍ୟ କ’ଣ ପରିବର୍ତ୍ତନ ହେବା ନେଇ ତାହା ଉପରେ ୟୁରୋପିଆନ୍ ଆଥଲେଟିକ୍ସ ନଜର ରଖିଛି। ତେବେ ଏହି ମେଗା ଇଭେଣ୍ଟ ବାତିଲ ହେବା ଦ୍ୱାରା ବିଶ୍ୱ ଆଥଲେଟିକ୍ ଜଗତକୁ ଜବରଦସ୍ତ ଝଟ୍କା ଲାଗିଛି। ଏହି ଇଭେଣ୍ଟର ପୁନଃ ଆୟୋଜନ ହେବନାହିଁ। ଏବେ ବର୍ଷର ତୃତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ପ୍ରେଞ୍ଚ୍ ଓପନ ଓ ଟୁର ଡି ଫ୍ରାନ୍ସ ଆୟୋଜନ ନେଇ ଆଶଙ୍କା ସୃଷ୍ଟି ହୋଇଛି।
