ନୂଆଦିଲ୍ଲୀ,୨୭।୩(ପି.ଟି.): କୋଭିଡ-୧୯ ସଂକ୍ରମଣକୁ ରୋକିବା ତଥା କରୋନା ଭାଇରସ ବିରୋଧରେ ଲଢେଇ ପାଇଁ କ୍ରିକେଟ ଆଇକନ ସଚିନ ତେନ୍ଦୁଲକର ୫୦ ଲକ୍ଷ ଟଙ୍କା ଦାନ କରିଛନ୍ତି। ଏହି ଅର୍ଥକୁ ସଚିନ ସମାନ ଦୁଇଭାଗରେ ବିଭକ୍ତ କରି ରାଜ୍ୟ ଓ କେନ୍ଦ୍ର ସରକାରଙ୍କୁ ପ୍ରଦାନ କରିଛନ୍ତି। ସେ ପ୍ରଧାନମନ୍ତ୍ରୀ ଓ ମହରାଷ୍ଟ୍ର ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ୨୫ ଲକ୍ଷ୍ୟ ଟଙ୍କା ଲେଖାଏ ପ୍ରଦାନ କରିଛନ୍ତି।
ସଚିନଙ୍କ ଏହି ଆର୍ଥିକ ସହାୟତା ଭାରତୀୟ ତାରକା କ୍ରୀଡ଼ାବିତ୍ମାନଙ୍କ ମଧ୍ୟରେ ସର୍ବାଧିକ ପରିମାଣର ସାବ୍ୟସ୍ତ ହୋଇଛି। ଏହି ମହାମାରୀକୁ ରୋକିବା ପାଇଁ ଅନ୍ୟ କ୍ରୀଡ଼ାବିତ୍ମାନେ ସେମାନଙ୍କ ଦରମା ଓ ଆଉ କେତେଜଣ ଚିକିତ୍ସା ଉପକରଣ ପ୍ରଦାନ କରିଛନ୍ତି। ଉଲ୍ଲେଖଥାଉ କି, ସଚିନ ପୂର୍ବରୁ ବିଭିନ୍ନ ଚାରିଟି ତଥା ସମାଜମଙ୍ଗଳ କାର୍ଯ୍ୟକ୍ରମରେ ଜଡିତ ରହିଆସିଛନ୍ତି। ସେ ଅନେକ ବାର ବିଭିନ୍ନ ସାମାଜିକ ସମସ୍ୟାରେ ଲୋକଙ୍କୁ ସହାୟତା କରିଆସିଛନ୍ତି। ତେବେ ଏ ସବୁକୁ ସେ କେବେ ଜନସାଧରଣଙ୍କ ନଜରକୁ ଆଣିନାହାନ୍ତି। ସେହିପରି ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ପୁଣେ ପର୍ଯ୍ୟବେଷିତ ଏକ ଏନ୍ଜିଓ ମାଧ୍ୟମରେ ଏକ ଲକ୍ଷ ଟଙ୍କା ପ୍ରଦାନ କରିଥିଲେ। ପୂର୍ବରୁ ଇର୍ଫାନ ଓ ୟୁସୁଫ୍ ପଠାନ ଲୋକଙ୍କ ପାଇଁ ବରୋଦା ପୋଲିସ୍ ଓ ସ୍ବାସ୍ଥ୍ୟ ବିଭାଗକୁ ୪,୦୦୦ ମାସ୍କ ପ୍ରଦାନ କରିଥିଲେ। ଅନ୍ୟ ଆଥଲେଟମାନଙ୍କ ମଧ୍ୟରେ ରେସଲର ବଜରଙ୍ଗ୍ ପୁନିଆ, ମହିଳା ସ୍ପ୍ରିଣ୍ଟର ହିମା ଦାସ ମଧ୍ୟ କରୋନା ଭାଇରସ ବିପକ୍ଷ ଲଢେଇ ପାଇଁ ସେମାନଙ୍କ ଦରମା ଦାନ କରିଛନ୍ତି। କେଭିଡ-୧୯ ପାଇଁ ସରା ଦେଶରେ କେନ୍ଦ୍ର ସରକାର ୨୧ ଦିନର ଲକ୍ ଡାଉନ ଜାରି କରିଛନ୍ତି। ଉଲ୍ଲେଖଥାଉ କି,ଏହି ଭାଇରସ୍ ଦ୍ୱାରା ଏପର୍ଯ୍ୟନ୍ତ ୧୭ ଜଣ ଭାରତୀୟଙ୍କ ଜୀବନ ଯାଇଥିବା ବେଳେ ସାରା ବିଶ୍ୱରେ ୨୪,୦୦୦ ଲୋକ ପ୍ରାଣ ହରାଇଲେଣି।
