ମୁମ୍ବାଇ,୯।୧୧-କର୍ନାଟକ ଉଇକେଟ କିପର ସି.ଏମ୍. ଗୌତମ ଓ ମିଜୋରାମ ଅଧିନାୟକ ଆବରାର କାଜି ନିକଟରେ କ୍ରାଇମ ବ୍ରାଞ୍ଚ ଦ୍ୱାରା ଗିରଫ ହେବା ପରେ ବିସିସିଆଇର ଚିନ୍ତା ବଢ଼ିଯାଇଛି। ଏପରି କି ବିସିସିଆଇ କ୍ରିକେଟରୁ ଦୁର୍ନୀତି ଦୂରେଇବାକୁ ସକ୍ଷମ କି ନାହିଁ ପ୍ରଶ୍ନ ଉଠିଛି। ଏଠାରେ ଦୁଇଟି ପଏଣ୍ଟ ରହିଛି। ବାଙ୍ଗାଲୋର ପୋଲିସ ଚାର୍ଜଶିଟ ଦାଖଲ କଲେ, ଏହାର ତଦନ୍ତ ପ୍ରକ୍ରିୟା ଶେଷ ହେବ। ଆମେ ଚାର୍ଜଶିଟ୍ର ଏକ କପି ନେବୁ। ଦ୍ୱିତୀୟତଃ ଆଉ କିଛି ଲୋକ ଅଛନ୍ତି, ଯେଉଁମାନଙ୍କ ବିରୋଧରେ ତଦନ୍ତ ଚଳାଇଛୁ। ଆମେ ସେମାନଙ୍କ ମତ ନେବୁ ଓ ନିଜକୁ ବଞ୍ଚାଇବାକୁ ମଧ୍ୟ ସୁଯୋଗ ପ୍ରଦାନ କରିବୁ। ଏହାପରେ ଆବଶ୍ୟକ ପଦକ୍ଷେପ ନେବୁ ବୋଲି ବିସିସିଆଇର ଦୁର୍ନୀତି ବିରୋଧୀ ୟୁନିଟ ମୁଖ୍ୟ ଅଜିତ ସିଂ କହିଛନ୍ତି। ସାମିଲ ଥିବା ଖେଳାଳି, ସପୋର୍ଟରଙ୍କ ନାମ ତଦନ୍ତ ଶେଷ ହେବା ପର୍ଯ୍ୟନ୍ତ କୁହାଯାଇପାରିବ ନାହିଁ। କେପିଏଲ୍ରେ ଫିକ୍ସିଂ ଅଭିଯୋଗ ଅନୁଯାୟୀ ଆମ ତଦନ୍ତ ଚାଲିଛି। ଆମେ ପୋଲିସ ସହ ଯୋଗାଯୋଗରେ ଅଛୁ। କିଛି ଗୁରୁତ୍ୱପୂର୍ଣ୍ଣ ଥିଲେ, ଆମେ ପୋଲିସଙ୍କୁ ଦେବୁ। କାରଣ ସେମାନଙ୍କ ଆଇନଗତ ଅଧିକାର ରହିଛି। ଆମେ କେବଳ ଖେଳାଳି କିମ୍ବା ସପୋର୍ଟ ଷ୍ଟାଫ କିମ୍ବା ଖେଳ ସହ ଜଡ଼ିତ ଥିବା ଅନ୍ୟ ବ୍ୟକ୍ତିଙ୍କ ଉପରେ କାର୍ଯ୍ୟାନୁଷ୍ଠାନ ନେଇପାରିବୁ। କିନ୍ତୁ ବୁକିଙ୍କ ବିଷୟରେ କିଛି କରିପାରିବୁ ନାହିଁ।
