ନୂଆଦିଲ୍ଲୀ,୧୪।୨: ଦିଲ୍ଲୀ ବିଧାନସଭା ନିର୍ବାଚନରେ ବହୁମତରେ ଆମ ଆଦମୀ ପାର୍ଟି(ଏଏପି) ବିଜୟ ଲାଭ କରିଛି। ଏଥିପାଇଁ ଏଏପିକୁ ଦିଲ୍ଲୀବାସୀଙ୍କଠାରୁ ଆରମ୍ଭ କରି ବିଭିନ୍ନ ରାଜନୈତିକ ଦଳ ଓ ସେଲିବ୍ରିଟିଙ୍କ ଶୁଭେଚ୍ଛାର ସୂଅ ଛୁଟିବାରେ ଲାଗିଛି। ଇତିମଧ୍ୟରେ ବଲିଉଡ୍ ଗୀତିକାର ଜାଭେଦ ଅଖତର ମଧ୍ୟ ଏଏପି ମୁଖ୍ୟ ଅରବିନ୍ଦ କେଜରିଓ୍ବାଲଙ୍କୁ ତାଙ୍କ ବାସଭବନରେ ସାକ୍ଷାତକାର କରି ନିର୍ବାଚନରେ ବିଜୟ ପାଇଁ ଶୁଭେଚ୍ଛା ଜଣାଇଛନ୍ତି। ଏଥିସହ ରାଜ୍ୟସଭା ଏମ୍ପି ସଞ୍ଜୟ ସିଂହଙ୍କୁ ମଧ୍ୟ ତାଙ୍କ ବାସଭବନରେ ଭେଟି ଜାଭେଦ ଶୁଭେଚ୍ଛା ଜଣାଇଥିବା ଦେଖିବାକୁ ମିଳିଛି। ଏନେଇ ଏକ ଫଟୋ କେଜରିଓ୍ବାଲ ସୋସିଆଲ ମିଡିଆରେ ଶେୟାର କରିଛନ୍ତି। ଏଥିସହ କ୍ୟାପଶନ୍ରେ ଲେଖିଛନ୍ତି, ‘ଜାଭେଦଙ୍କୁ ମୋ ଘରେ ଦେଖି ଆଜି ବେଶ୍ ଖୁସି ଲାଗୁଛି’। ଶେୟାର ହୋଇଥିବା ଏହି ଫଟୋରେ କେଜରିଓ୍ବାଲ, ଜାଭେଦ ଓ ସଞ୍ଜୟ ଏକାସାଙ୍ଗରେ ବସିଥିବା ନଜର ଆସିଛନ୍ତି। ସୂଚନାଯୋଗ୍ୟ, ଚଳିତ ବିଧାନସଭା ନିର୍ବାଚନରେ ଏଏପି ୭୦ରୁ ୬୨ ଆସନ ଜିତି ହ୍ୟାଟ୍ରିକ କରିଛି। ତୃତୀୟ ଥର ପାଇଁ ଏଏପି ଦିଲ୍ଲୀରେ ସରକାର ଗଠନ କରିବାକୁ ଯାଉଥିବା ବେଳେ ରବିବାର ମୁଖ୍ୟମନ୍ତ୍ରୀ ପଦ ପାଇଁ କେଜରିଓ୍ବାଲ ଶପଥ ଗ୍ରହଣ କରିବେ।
