ନୂଆଦିଲ୍ଲୀ/ହେଗ୍, ୧୭ା୭(ପି.ଟି.) :କୁଳଭୂଷଣ ଯାଦବ ମାମଲାର ଚୂଡାନ୍ତ ରାୟ ଅନ୍ତର୍ଜାତୀୟ ନ୍ୟାୟାଳୟ (ଆଇସିଜେ)ରେ ବୁଧବାର ହେବାକୁ ଯାଉଛି। ମାମଲାର ରାୟ ଭାରତ ଓ ପାକିସ୍ତାନ ମଧ୍ୟରେ ଦ୍ୱିପାକ୍ଷିକ ସମ୍ପର୍କକୁ ପ୍ରଭାବିତ କରିବ ବୋଲି କୁହାଯାଉଛି। ଭାରତର ପୂର୍ବତନ ନୌସେନାଧିକାରୀ କୁଳଭୂଷଣଙ୍କୁ ଅପହରଣ କରି ପାକିସ୍ତାନ ନେଇଯାଇଥିବା ଭାରତ ଅଭିଯୋଗ କରିଥିବାବେଳେ ବେଲୁଚିସ୍ତାନରୁ ତାଙ୍କୁ ଗୁପ୍ତଚର କାର୍ଯ୍ୟ ଲାଗି ଗିରଫ କରାଯାଇଥିବା ପାକିସ୍ତାନ କହୁଛି। ଆତଙ୍କବାଦ ସହ ଯୋଡ଼ି ପାକ୍ ସେନା ଅଦାଲତ କୁଳଭୂଷଣଙ୍କୁ ମୃତ୍ୟୁଦଣ୍ଡ ଶୁଣାଇଥିବାବେଳେ ଏନେଇ ଭାରତ ଆଇସିଜେରେ ଆବେଦନ କରିବାରୁ କୁଳଭୂଷଣଙ୍କ ମୃତ୍ୟୁଦଣ୍ଡ ଉପରେ ରହିତାଦେଶ ଲାଗିଛି। ପାକିସ୍ତାନ ୧୯୬୩ ଭିଏନା ରାଜିନାମା ଉଲ୍ଲଂଘନ କରିଛି ଓ ଯାଦବଙ୍କ ଲାଗି ଆଇନଗତ ସହାୟତା ପାଇଁ ଅନୁମତି ଦେଉନାହିଁ ବୋଲି ଭାରତ ଅଭିଯୋଗ କରିଛି। ଭାରତର ଏଭଳି ଅଭିଯୋଗକୁ ମଧ୍ୟ ପାକିସ୍ତାନ ଆଇସିଜେରେ ଚ୍ୟାଲେଞ୍ଜ କରିଛି। ଏନେଇ ମାମଲା ଅନ୍ତର୍ଜାତୀୟ ନ୍ୟାୟାଳୟରେ ପହଞ୍ଚିଥିବାବେଳେ ଚୂଡ଼ାନ୍ତ ରାୟ ବୁଧବାର କରାଯିବ।
