ଓ୍ବାଶିଂଟନ,୨୩ା୭(ପି.ଟି.): କଶ୍ମୀର ପ୍ରସଙ୍ଗରେ ଭାରତ ଓ ପାକିସ୍ତାନ ମଧ୍ୟରେ ମଧ୍ୟସ୍ଥତା କରିବାକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ସୋମବାର ପ୍ରସ୍ତାବ ଦେଇଛନ୍ତି। ହ୍ବାଇଟ୍ ହାଉସ୍ରେ ପାକ୍ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କ ସହ ଆଲୋଚନା ବେଳେ ଟ୍ରମ୍ପ୍ ଏହା କହିଛନ୍ତି। ଯଦି ଦୁଇ ଦେଶ ଚାହିଁବେ ତେବେ ସହାୟତା ପାଇଁ ପ୍ରସ୍ତୁତ ବୋଲି ସେ କହିଛନ୍ତି।
ଆମେରିକା ଗସ୍ତରେ ଯାଇଥିବା ଇମ୍ରାନ ଟ୍ରମ୍ପ୍ଙ୍କ ମନ୍ତବ୍ୟକୁ ସ୍ବାଗତ କରିଛନ୍ତି। ଯଦି ଟ୍ରମ୍ପ୍ ମଧ୍ୟସ୍ଥତା ପାଇଁ ରାଜି ତେବେ ୧୦୦ କୋଟିରୁ ଅଧିକ ଲୋକଙ୍କ ପ୍ରାର୍ଥନା ତାଙ୍କ ସହିତ ରହିଛି ବୋଲି ଇମ୍ରାନ୍ କହିଛନ୍ତି। ତେବେ କଶ୍ମୀର ଦ୍ୱିପାକ୍ଷିକ ପ୍ରସଙ୍ଗ, ଏଥିରେ ତୃତୀୟ ପକ୍ଷର ସ୍ଥାନ ନାହିଁ ବୋଲି ଭାରତ ବାରମ୍ବାର କହିଆସୁଛି।
୨୦୧୬ ଜାନୁୟାରୀରେ ପଠାନକୋଟ୍ ଏୟାରବେସ୍ରେ ପାକିସ୍ତାନୀ ଆତଙ୍କବାଦୀଙ୍କ ଆକ୍ରମଣ ପରଠାରୁ ଭାରତ ଇସ୍ଲାମାବାଦ ସହ ଆଲୋଚନା ବନ୍ଦ ରଖିଛି। ଆତଙ୍କବାଦ ଓ ଆଲୋଚନା ଏକତ୍ର ଚାଲିପାରିବ ନାହିଁ ବୋଲି ନୂଆଦିଲ୍ଲୀ କହିଆସୁଛି।
ଇମ୍ରାନଙ୍କ ସହ ପାକିସ୍ତାନ ସେନା ମୁଖ୍ୟ ଜେନେରାଲ କମାର ଜାଭେଦ ବାଜଓ୍ବା, ଗୋଇନ୍ଦା ସଂସ୍ଥା ଆଇଏସ୍ଆଇର ମୁଖ୍ୟ ଲ୍ୟୁଟନାଣ୍ଟ ଜେନେରାଲ ଫୈଜ୍ ହମିଦ ଏବଂ ବହିର୍ବ୍ୟାପାର ମନ୍ତ୍ରୀ ମେହମୁଦ୍ କୁରେଶି ଆମେରିକା ଯାଇଛନ୍ତି। ତେବେ ବିମାନ ବନ୍ଦରରେ ପହଞ୍ଚତ୍ବା ପରେ ଇମ୍ରାନଙ୍କୁ ଆମେରିକା ପକ୍ଷରୁ ଆନୁଷ୍ଠାନିକ ସ୍ବାଗତ କରା ନ ଯିବା ତାଙ୍କ ପାଇଁ ଶକ୍ତ ଝଟ୍କା ବୋଲି କୁହାଯାଉଛି।
ଚଳିତ ବର୍ଷ ଫେବୃୟାରୀରେ ଜମ୍ମୁ-କଶ୍ମୀରର ପୁଲ୍ଓ୍ବାମାରେ ଜୈଶ୍-ଇ-ମହମ୍ମଦ (ଜେଇଏମ୍) ଆତଙ୍କବାଦୀଙ୍କ ଆତ୍ମଘାତୀ ବିସ୍ଫୋରଣରେ ୪୦ ସିଆର୍ପିଏଫ୍ ଯବାନ ଶହୀଦ ହେବା ପରେ ଦୁଇ ଦେଶ ମଧ୍ୟରେ ଉତ୍ତେଜନା ତୀବ୍ର ହୋଇଥିଲା। ଫେବୃୟାରୀ ୨୬ରେ ଭାରତୀୟ ବାୟୁସେନା ଏୟାରଷ୍ଟ୍ରାଇକ୍ କରି ବାଲାକୋଟ୍ରେ ଥିବା ଜେଇଏମ୍ ପ୍ରଶିକ୍ଷଣ ଶିବିରକୁ ଧ୍ୱଂସ କରିଦେଇଥିଲା। ତା ପରଦିନ ପାକିସ୍ତାନୀ ବାୟୁସେନା ଭାରତର ମିଗ୍-୨୧ ଯୁଦ୍ଧବିମାନକୁ ଖସାଇବା ସହ ପାଇଲଟ ଅଭିନନ୍ଦନଙ୍କୁ କାବୁ କରିନେଇଥିଲା। ଅନ୍ତର୍ଜାତୀୟ ଚାପ ଫଳରେ ମାର୍ଚ୍ଚ ୧ରେ ଇସ୍ଲାମାବାଦ ଅଭିନନ୍ଦନଙ୍କୁ ଭାରତକୁ ହସ୍ତାନ୍ତର କରିଥିଲା।
ସ୍ବାଧୀନ ବେଲୁଚିସ୍ତାନ ସ୍ଲୋଗାନ
ଆମେରିକାର ଏକ ଇନ୍ଡୋର ଷ୍ଟାଡିୟମ୍ରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଉଦ୍ବୋଧନ ଦେଉଥିବାବେଳେ କେତେକ ବ୍ୟକ୍ତି ହଠାତ୍ ଛିଡ଼ାହୋଇ ସେଠାରେ ସ୍ବାଧୀନ ବେଲୁଚିସ୍ତାନ ସ୍ଲୋଗାନ ଦେଇଥିଲେ। ପାକିସ୍ତାନ ସୁରକ୍ଷା କର୍ମୀମାନେ ବେଲୁଚିସ୍ତାନରେ ମାନବାଧିକାର ଉଲ୍ଲଂଘନ କରିବା, ଅତ୍ୟାଚାର କରିବା ବିରୋଧରେ ସେମାନେ ମୁହଁ ଖୋଲିଥିଲେ। ପାକିସ୍ତାନ ବିରୋଧୀ ସ୍କୋଗାନ ଦେବା ପରେ ସେଠାରେ ନିୟୋଜିତ ସୁରକ୍ଷା କର୍ମୀମାନେ ସେମାନଙ୍କୁ ତଡ଼ି ଦେଇଥିଲେ। ଇମ୍ରାନଙ୍କ କେତେଜଣ ସମର୍ଥକ ମଧ୍ୟ ସେମାନଙ୍କୁ ଠେଲି ବାହାରକୁ ଚାଲିଯିବାକୁ କହିଥିଲେ।
