ଭୁବନେଶ୍ୱର,୬ା୨(ବ୍ୟୁରୋ): ଜେ.ଡି. ସେଣ୍ଟର ଅଫ୍ ଆର୍ଟ(ଜେଡିସିଏ)ର ଫିଲ୍ମ ଫୋରମ୍ ଆନୁକୂଲ୍ୟରେ ଫେବୃୟାରୀ ୭ରୁ ୯ ଯାଏ ଆୟୋଜିତ ହେବ କଳା ଓ କଳାକାର ଆଧାରିତ ତ୍ରୟୋଦଶ ଅନ୍ତର୍ଜାତୀୟ ପ୍ରାମାଣିକ କ୍ଷୁଦ୍ର ଚଳଚ୍ଚିତ୍ର ଉତ୍ସବ। ଏଥର ଏହି ଉତ୍ସବ କିଛି ନିଆରା ବ୍ୟକ୍ତିତ୍ୱଙ୍କ କଥାକୁ ଅତି ନିକଟରୁ ଶୁଣିବାର ସୁଯୋଗ ଦେବ। ଫେବୃୟାରୀ ୭ ସନ୍ଧ୍ୟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଖଣ୍ଡଗିରିସ୍ଥିତ ଜେଡିସିଏ ସାଇଟ୍ରେ ଉତ୍ସବ ଆନୁଷ୍ଠାନିକଭାବେ ଉଦ୍ଘାଟନ ହେବା ପରେ ୮ ଓ ୯ ତାରିଖରେ ଇଡ୍କଲ ଅଡିଟୋରିୟମ୍ରେ ଚଳଚ୍ଚିତ୍ର ପ୍ରଦର୍ଶନ ସହ ବିଭିନ୍ନ କର୍ମଶାଳାର ଆୟୋଜନ କରାଯିବ। କେବଳ ଏତିକି ନୁହେଁ, ପ୍ରତିଥର ଭଳି ଚଳିତଥର ମଧ୍ୟ ରାଜ୍ୟ ଏବଂ ଦେଶ ବାହାରର ବିଶିଷ୍ଟ ବ୍ୟକ୍ତିତ୍ୱମାନେ ଭିନ୍ନ ଭିନ୍ନ ବିଷୟବସ୍ତୁ ଉପରେ ବକ୍ତବ୍ୟ ଉପସ୍ଥାପନ କରିବେ। ଏମାନଙ୍କ ମଧ୍ୟରେ ବୋସ୍ କ୍ରିଷ୍ଣାଚାରୀଙ୍କଠାରୁ ଆରମ୍ଭକରି ଅଦ୍ୱୈତ ଗଡ଼ନାୟକ, ନନ୍ଦିତା ଦାସଙ୍କ ଭଳି ପ୍ରମୁଖ ବକ୍ତାମାନେ ରହିଛନ୍ତି।
ଚଳଚ୍ଚିତ୍ର ଉତ୍ସବରେ ଚଳିତବର୍ଷ ଭାରତୀୟ ଚିତ୍ରକଳା ଦୁନିଆର ମହାନ୍ ବ୍ୟକ୍ତିତ୍ୱମାନଙ୍କ ସହ ସାକ୍ଷାତ କରିବାର ସୁଯୋଗ ମିଳିବ। ଦେଶର ଜଣେ ଲୋକପ୍ରିୟ ଚିତ୍ରଶିଳ୍ପୀଭାବେ ଖ୍ୟାତିଅର୍ଜନ କରିଥିବା ବୋସ୍ କ୍ରିଷ୍ଣାଚାରୀ ଫେବୃୟାରୀ ୮ ଅପରାହ୍ନ ୩ଟାରେ ଇଡ୍କଲ ପ୍ରେକ୍ଷାଳୟରେ ଭାରତୀୟ ଦ୍ୱିବର୍ଷୀୟ କଳା ଉତ୍ସବ ସମ୍ପର୍କରେ ଉଦ୍ବୋଧନ ଦେବେ। ଜଣେ ସ୍ବାଧୀନ କ୍ୟୁରେଟର ଭାବେ ପରିଚିତ ବୋସ୍ଙ୍କର ବିଭିନ୍ନ କଳାକୃତି ମଧ୍ୟରେ ଚିତ୍ରାଙ୍କନ, ପେଣ୍ଟିଂ, ସ୍ଥାପତ୍ୟ, ଡିଜାଇନ୍, ସ୍ଥାପନା ଏବଂ ସ୍ଥାପତ୍ୟ କଳା ଆଦି ରହିଛି। ସେ ଭାରତର ପ୍ରଥମ ଦ୍ୱିବର୍ଷୀୟ ପ୍ରସିଦ୍ଧ କୋଚି-ମୁଜିରିସ୍ କଳା ଉତ୍ସବର ସ୍ରଷ୍ଟା ହୋଇଥିବା ବେଳେ ବର୍ତ୍ତମାନ ଏହାର ନିର୍ଦ୍ଦେଶକ ଓ ସଭାପତିଭାବେ କାର୍ଯ୍ୟ କରୁଛନ୍ତି। ନିକଟ ଅତୀତରେ ତାଙ୍କର ଏକକ ଚିତ୍ରକଳା ପ୍ରଦର୍ଶନୀ ‘ଦର୍ପଣ ଅନ୍ଧାରରେ ଭଲ ଦେଖିପାରେ’ କଲିକତାର ଇମାମୀ କଳାକେନ୍ଦ୍ରରେ ଅନୁଷ୍ଠିତ ହୋଇଥିଲା। ଭାରତୀୟ ଚିତ୍ରକଳା ଜଗତରେ ଜଣେ ଭିନ୍ନ ଓ ନିଆରା ଚିତ୍ରଶିଳ୍ପୀଭାବେ ପରିଚିତ ଏହି ଶିଳ୍ପୀଙ୍କୁ ଭୁବନେଶ୍ୱରବାସୀ ନିକଟରୁ ଦେଖିବାର ସୁଯୋଗ ପାଇବେ।
