ଦଶପଲ୍ଲା,୩ା୧୦ (ଡି.ଏନ.ଏ.): ନୟାଗଡ଼ ଜିଲା ଦଶପଲ୍ଲାର କୁଞ୍ଜବନଗଡକୁ ରାଜ୍ୟ ସରକାର ଲୋକକଳା ଗ୍ରାମର ମାନ୍ୟତା ଦେବା ପରେ ବୁଧବାର ଏକ ଉତ୍ସବରେ ଏହା ଆନୁଷ୍ଠାନିକ ଭାବେ ଲୋକାର୍ପିତ ହୋଇଛି। ଉଦ୍ଘାଟକ ଭାବେ ସ୍ଥାନୀୟ ବିଧାୟକ ରମେଶ ଚନ୍ଦ୍ର ବେହେରା ଯୋଗଦେଇଥିଲେ। ଜିଲାପାଳ ଡ. ପୋମା ଟୁଡୁ ମୁଖ୍ୟ ଅତିଥି ଓ ବନଖଣ୍ଡ ଅଧିକାରୀ ଧର୍ମରାଜ ଏଚ୍ଡି, ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ସୁବାସ ଚନ୍ଦ୍ର ରାୟ, ପଞ୍ଚାୟତ ସମିତି ଅଧ୍ୟକ୍ଷା ସୁନନ୍ଦା ସାହୁ, ଏନ୍ଏସି ଅଧ୍ୟକ୍ଷା ବବିତା ସାହୁ ପ୍ରମୁଖ ସମ୍ମାନିତ ଅତିଥି ଭାବେ ମଞ୍ଚାସୀନ ଥିଲେ। କଣ୍ଟିଲୋ ମହାବିଦ୍ୟାଳୟ ଅଧ୍ୟକ୍ଷ ଡ. ପବିତ୍ର ମୋହନ ସୁବୁଦ୍ଧି ମୁଖ୍ୟବକ୍ତା ଭାବେ ଯୋଗଦେଇ ଦଶପଲ୍ଲାର ସାରସ୍ବତ କଳାକାରମାନଙ୍କୁ ସରକାର ସ୍ବୀକୃତି ପ୍ରଦାନ କରିଥିବାରୁ ଏ ମାଟି ଧନ୍ୟ ହୋଇଛି ବୋଲି ମତବ୍ୟକ୍ତ କରିଥିଲେ। ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଡ. ପ୍ରମୋଦ କୁମାର ନାୟକ କାର୍ଯ୍ୟକ୍ରମ ପରିଚାଳନା କରିଥିଲେ। କୁଞ୍ଜବନଗଡର ମହାବୀର ତୋରଣ ନିକଟରୁ କଳାକାରମାନେ ଏକ ଶୋଭାଯାତ୍ରାରେ ବାହାରି ସଭା ମଞ୍ଚକୁ ଆସିଥିଲେ। ଏହି ଅବସରରେ ୩ଜଣ ପ୍ରତିଭା ରାମ ନାଟକର ଗୁରୁ ଲକ୍ଷ୍ମୀଧର ଦାଶ, ଯୁବ ସଂଗ୍ରାହକ ଅନିଲ୍ କୁମାର ସାହୁ ଓ ପଟ୍ଟଚିତ୍ର ଶିଳ୍ପୀ ସଞ୍ଜିତ୍ କୁମାର ମହାପାତ୍ରଙ୍କୁ ମୁଖ୍ୟଅତିଥି ପ୍ରଶଂସାପତ୍ର ଦେଇ ସମ୍ବର୍ଦ୍ଧିତ କରିଥିଲେ। ଏହାପରେ ୧୪ଟି ଦଳ ନାମ ସଂକୀର୍ତ୍ତନ, ମାଳିସାହିର ଉଦଣ୍ଡ ନୃତ୍ୟ, ସଂଘ ବାଦ୍ୟ, ସ୍କୁଲ ପିଲାଙ୍କ ଆଦିବାସୀ ନୃତ୍ୟ, ଭିନ୍ନକ୍ଷମ ଅନୁଷ୍ଠାନର ଦାସକାଠିଆ ଓ ପାଲା ପ୍ରଦର୍ଶିତ ହୋଇଥିଲା। ଶେଷରେ ଦଶପଲ୍ଲା ପ୍ରସିଦ୍ଧ ରାମନାଟକର ବିରାୟୁଧ ବଧ ଓ ସୀତା ହରଣ ପ୍ରସଙ୍ଗ ଦର୍ଶକଙ୍କୁ ବିମୋହିତ କରିଥିଲା। ଜିଲା କଳାକାର ଓ ସଂସ୍କୃତି ସଂଘ ଉପସଭାପତି ତଥା ସଙ୍ଗୀତଜ୍ଞ ଶରତ ସାହୁ ସ୍ବାଗତ ଭାଷଣ ଦେଇଥିବା ବେଳେ ତହସିଲଦାର ପ୍ରମୋଦ କୁମାର ଦଳବେହେରା ଧନ୍ୟବାଦ ଦେଇଥିଲେ।
