ବାହାନଗା,୧୨।୯(ଡି.ଏନ.ଏ.-ବାଲେଶ୍ୱର ଜିଲା ବାହାନଗା ବ୍ଳକ କଲ୍ୟାଣୀ ଗ୍ରାମର ୬ ନମ୍ବର ୱାର୍ଡର ୧୫ ପରିବାର ଏବେ ଜଳବନ୍ଦୀ ଅବସ୍ଥାରେ ରହିଛନ୍ତି। ଗ୍ରାମରେ ନୂଆ କରି ତିଆରି ହୋଇଥିବା ପ୍ରଧାନମନ୍ତ୍ରୀ ସଡକ ସେମାନଙ୍କ ଲାଗି ଦୁଃଖ ଆଣି ଦେଇଛି । ରାସ୍ତା ଉଚ୍ଚା ହୋଇଥିବା ବେଳେ ଲୋକଙ୍କ ଘର ନିଚା ହୋଇଯାଇଛି । ଜଳ ନିଷ୍କାସନ ଲାଗି ଉପଯୁକ୍ତ ପଦକ୍ଷେପ ନିଆଯାଇ ନ ଥିବାରୁ ସେମାନଙ୍କ ଘରଦ୍ୱାର ବର୍ଷାପାଣିରେ ସବୁବେଳେ ବୁଡି ରହୁଛି। ପୂର୍ବରୁ ବସିଥିବା ହୋମପାଇପକୁ ଠିକା ସଂସ୍ଥା ବାହାର କରିଦେଇ ଥିବା ଏବଂ ନୟନଯୋରୀ ଜବରଦଖଲରେ କରାଯାଇଥିବା କାରଣରୁ ବର୍ଷା ଜଳ ନିଷ୍କାସନ ହୋଇପାରୁ ନାହିଁ। ଏ ସମ୍ପର୍କରେ ସେମାନେ ଗ୍ରାମ୍ୟ ଉନ୍ନୟନ ବିଭାଗର କନିଷ୍ଠ ଯନ୍ତ୍ରୀଙ୍କ ସମେତ ପ୍ରଶାସନ ନିକଟରେ ବାରମ୍ବାର ଅଭିଯୋଗ କରି ସୁଫଳ ନ ପାଇବାରୁ ଶେଷରେ ବୁଧବାର ବାହାନଗା ତହସିଲ କାର୍ଯ୍ୟାଳୟ ଆଗରେ ଧାରଣା ଦେଇଥିଲେ। ସାହିର ବାସନ୍ତୀ ସେଠୀ-୧, ବାସନ୍ତୀ ସେଠୀ-୨, ଭାରତୀ ସେଠୀ, ସଂଯୁକ୍ତା ସେଠୀ, ନାରାୟଣ ସେଠୀ, କରୁଣାକର ସେଠୀ ପ୍ରମୁଖ ମହିଳା ଓ ପୁରୁଷ ଏଥିର ସାମିଲ ହୋଇଥିଲେ। ଗତ ଅଗଷ୍ଟ ମାସରେ ତହସିଲ ପକ୍ଷରୁ ଜବରଦଖଲ ଉଚ୍ଛେଦ ଲାଗି ଜମି ମାପଚୁପ କରାଯାଇଥିଲେ ମଧ୍ୟ ଏଯାଏ କୌଣସି ପଦକ୍ଷେପ ନିଆଯାଇ ନ ଥିବା ସ୍ଥାନୀୟ ଧୋବା ସାହି ବାସିନ୍ଦା ଅଭିଯୋଗ କରିଛନ୍ତି।ବର୍ଷାଜଳ ନିଷ୍କାସନ ସମସ୍ୟା ନେଇ ଲୋକେ ଧାରଣା ଦେବା ପରେ ଅପରାହ୍ନ ସାଢେ୬ ଟା ସମୟ ରେ ଅତିରକ୍ତ ତହସିଲିଦାର ବିନୋଦ ଚନ୍ଦ୍ର ପଣ୍ଡା ଧାରଣାସ୍ଥଳକୁ ଆସି ସାହିର ମହିଳା ପୁରୁଷଙ୍କୁ ବୁଝାଶୁଝା କରିଥିଲେ। ପରେ ସେ ଗ୍ରାମକୁ ଯାଇ ଜଳବନ୍ଦୀ ସ୍ଥାନବଚଲି ଦେଖିଥିଲେ ା ଦୁଇଦିନ ଭିତରେ ଏ ଦିଗରେ ପଦକ୍ଷେପ ନିଆଯିବ ବୋଲି ଅତିରିକ୍ତ ତହସିଲିଦାର ପ୍ରତିଶ୍ରୁତି ଦେବାରୁ ଲୋକେ ଧାରଣାରୁ ଉଠିିଥିଲେ। ଗତ ମଙ୍ଗଳବାର ଲୋକଙ୍କ ଅଭିଯୋଗ ପରେ ଗ୍ରାମ୍ୟ ଉନ୍ନୟନ ବିଭାଗର ଏସଡିଓ ଅଜୟ ବେହେରା ଓ କନିଷ୍ଠ ଯନ୍ତ୍ରୀ ଅଣାକାର ଜେନା ସାହିେରେ ଥିବା ଜଳବନ୍ଦୀ ଅଞ୍ଚଳ ବୁଲି କିପରି ଜଳ ନିଷ୍କାସନ ହୋଇପାରିବ ସେବାବଦରେ ଠିକାଦାରଙ୍କ ସହିତ ଅଲୋଚନା କରିଥିବା ଜଣାପଡିଛି।
