ଭୁବନେଶ୍ୱର,୨୧।୧୧(ବ୍ୟୁରୋ): କଲ୍ୟାଣ ମଣ୍ଡପ ଓ ସଭାଗୃହ କରି ବ୍ୟବସାୟ କରୁଥିଲେ ମଧ୍ୟ ଆବଶ୍ୟକ ପାର୍କିଂ ସୁବିଧା ରଖାଯାଉନି। ଫଳରେ ଏଠାକୁ ଆସୁଥିବା ଲୋକେ ସମ୍ମୁଖ ରାସ୍ତାରେ ଗାଡ଼ି ରଖି ଟ୍ରାଫିକ ସମସ୍ୟା ସୃଷ୍ଟି କରୁଛନ୍ତି। ଏଥିଯୋଗୁ ଗାଡ଼ିମୋଟର ଚଳାଚଳ ସମସ୍ୟା ସୃଷ୍ଟି ହେବା ସହ ଦୁର୍ଘଟଣା ଘଟୁଛି। ଏହା ଉପରେ କଡ଼ା କାର୍ଯ୍ୟାନୁଷ୍ଠାନ ପାଇଁ ରାଜ୍ୟ ସରକାର ଭୁବନେଶ୍ୱର ମହାନଗର ନିଗମ (ବିଏମ୍ସି) ଓ ବିଡିଏକୁ ନିର୍ଦ୍ଦେଶ ଦେଇଛନ୍ତି। ନଗର ଉନ୍ନୟନ ବିଭାଗର ପ୍ରମୁଖ ଶାସନ ସଚିବ ଜି ମାଥିଭାଥନାନ ଏ ନେଇ ଚିଠି କରିଥିବାବେଳେ ବିଏମ୍ସି ଓ ବିଡିଏ ସୀମା ମଧ୍ୟରେ ଥିବା ଅନେକ ସଭାଗୃହ, କଲ୍ୟାଣ ମଣ୍ଡପ ଆଦି ଅଯଥା ଟ୍ରାଫିକ ସମସ୍ୟା ସୃଷ୍ଟି କରୁଥିବା ଉଲ୍ଲେଖ କରିଛନ୍ତି। ବିଶେଷକରି ପୁରୀ ବାଇପାସ୍ ନିକଟ ସାଇ ମନ୍ଦିର ଆଖପାଖ ଅଞ୍ଚଳ ସହ ଟଙ୍କପାଣି ରୋଡ୍, ପଟିଆ ଓ ଇମ୍ଫୋସିସ୍ ସହିତ ବହୁ ଅଞ୍ଚଳରେ ଏହି ସମସ୍ୟା ଉଗ୍ର ହେଉଛି। ତେଣୁ ତୁରନ୍ତ ଏହା ଉପରେ ରୋକ୍ ଲଗାଇ ସମସ୍ୟା ଦୂର କରିବାକୁ ଏନ୍ଫୋର୍ସମେଣ୍ଟ ଟିମ୍ ଗଠନ କରି ପ୍ରତିଦିନ ତଦାରଖ ପାଇଁ ସଚିବ ନିର୍ଦ୍ଦେଶ ଦେଇଛନ୍ତି। ଏହାସହ ଏ ସଂକ୍ରାନ୍ତରେ ରିପୋର୍ଟ ଦେବାକୁୁ କୁହାଯାଇଛି। ଅନ୍ୟପକ୍ଷରେ ଚିଠି ପାଇବା ପରେ ବିଏମ୍ସି ପ୍ରାଥମିକ ସର୍ଭେ ଆରମ୍ଭ କରିଛନ୍ତି।
ସୂଚନାଯୋଗ୍ୟ, ଦକ୍ଷିଣ ପୂର୍ବ ଜୋନ୍ରେ ୨୮, ଉତ୍ତର ଜୋନ୍ରେ ୨୯ ଏବଂ ଦକ୍ଷିଣ ପଶ୍ଚିମ ଜୋନ୍ରେ ୩୨ ସଭାଗୃହ, କଲ୍ୟାଣ ମଣ୍ଡପ ରହିିଛି। ଏଠାରେ ବିବାହ, ବ୍ରତଘର ଓ ଅନ୍ୟ କାର୍ଯ୍ୟକ୍ରମ ଆୟୋଜନ ସମୟରେ ଲୋକେ ରାସ୍ତାରେ ଗାଡ଼ି ରଖିବାରୁ ଟ୍ରାଫିକ୍ ସମସ୍ୟା ସୃଷ୍ଟି ହେଉଛି। ବାରମ୍ବାର ସତ୍ତ୍ୱେ କିଛି ସୁଫଳ ମିଳୁନାହିଁ। ଏବେ ସରକାର ନିର୍ଦ୍ଦେଶ ଦେବା ପରେ ତତ୍ପରତା ପ୍ରକାଶ ପାଇଛି। ଏ ନେଇ ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି, ଖୁବଶୀଘ୍ର ଏହି କଲ୍ୟାଣ ମଣ୍ଡପଗୁଡ଼ିକର କାଗଜପତ୍ର ଯାଞ୍ଚ କରିବା ସହ ଏହା ଠିକ୍ ପ୍ଲାନ ଅନୁଯାୟୀ ହୋଇଛି କି ନାହିଁ ତାହାର ଅନୁଧ୍ୟାନ କରାଯିବ। ସେହିପରି ପ୍ଲାନ ମୁତାବକ ପାର୍କିଂ ବ୍ୟବସ୍ଥା ଛାଡ଼ିବା ପାଇଁ କହି ଯଦି କୌଣସି ମାଲିକ ମାନି ନ ଥିବେ ତେବେ ଏହା ଉପରେ କାର୍ଯ୍ୟାନୁଷ୍ଠାନ ନିଆଯିବ। ସେପଟେ ତୁରନ୍ତ ଏହିସବୁ ଅନୁଷ୍ଠାନଗୁଡ଼ିକର ଭତ୍ତିିଭୂମି ଯାଞ୍ଚ କରାଯାଇ କାହାର ପ୍ଲାନିଂ ଆପ୍ରୁଭାଲ୍, ପାର୍କିଂ ସ୍ଥଳ, ହୋଲ୍ଡିଂ ଟ୍ୟାକ୍ସ, ଟ୍ରେଡ୍ ଲାଇସେନ୍ସ ଆଦି ବାବଦରେ ବିସ୍ତୃତ ଆଲୋଚନା କରାଯିବ। ଏହାସହ ତୁରନ୍ତ ସ୍କ୍ବାଡ୍ ଗଠନ ହୋଇ ଟ୍ରାଫିକ୍ ଓ ପାର୍କିଂ ପାଇଁ ପଦକ୍ଷେପ ନିଆଯିବ ବୋଲି କମିଶନର ଚୌଧାରୀ କହିଛନ୍ତି।
