ନୂଆଦିଲ୍ଲୀ,୨୯।୩(ପି.ଟି.)-୨୦୦୭ ଟି୨୦ ବିଶକପ୍ ହିରୋ ପୂର୍ବତନ ଭାରତୀୟ କ୍ରିକେଟର ତଥା ପୋଲିସ୍ ଅଧିକାରୀ ଯୋଗୀନ୍ଦର ଶର୍ମାଙ୍କୁ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଭୂୟିୟସୀ ପ୍ରଶଂସା କରିଛି। ପୋଲିସ ବିଭାଗରେ କାର୍ଯ୍ୟ କରୁଥିବା ଯୋଗୀନ୍ଦର ଦେଶରେ ଦେଖାଦେଇଥିବା କରୋନ ଭାଇରସ୍ ସଂକ୍ରମଣ ବିରୋଧରେ ପୂରା ସମର୍ପିତ ଭାବେ କାର୍ଯ୍ୟ ସମ୍ପାଦନ କରୁଛନ୍ତି। ତାଙ୍କର କର୍ତ୍ତବ୍ୟନିଷ୍ଠା ଆଇସିସି ଦ୍ୱାରା ପ୍ରଶଂସିତ ହୋଇଛି।
୨୦୦୭ରେ ଅନୁଷ୍ଠିତ ଟି୨୦ ବିଶ୍ୱକପ୍ ଫାଇନାଲରେ ଯୋଗୀନ୍ଦର ଚତୁରତାର ସହ ବୋଲିଂ କରିଥିଲେ। ମ୍ୟାଚ୍ର ଅନ୍ତିମ ଓଭର ବୋଲି କରି ସେ ଭାରତକୁ ଜିତାଇଥିଲେ। ଅନ୍ତିମ ଓଭରରେ ତୃତୀୟ ବଲ୍ରେ ମିସ୍ବା ଉଲ ହକଙ୍କୁ ଆଉଟ କରିଥିଲେ ଯୋଗୀନ୍ଦର ଓ ଏଥିସହିତ ପାକିସ୍ତାନ ଅଲଆଉଟ ହୋଇଥିଲା। ଫଳରେ ଭାରତ ୫ ରନରେ ବିଜୟୀ ହୋଇ ଚାମ୍ପିୟନ ହେବାର ଗୌରବ ଅର୍ଜନ କରିଥିଲା।
ଏହି ଘଟଣାର ୧୩ ବର୍ଷ ପରେ ଯୋଗୀନ୍ଦର ପୁଣି ଦେଶକୁ ଗର୍ବିତ କରିଛନ୍ତି। ତେବେ ଏକ ଭିନ୍ନ ପ୍ରକାର ପୃଷ୍ଠଭୂମୀରେ। ସାରା ଦେଶ ଏବେ କୋଭିଡ-୧୯ ବିରୋଧରେ ଲଢେଇ ଜାରି ରଖିଥିବା ବେଳେ ୩୬ ବର୍ଷୀୟ ଦେବୀନ୍ଦର ହରିୟାଣା ପୋଲିସ୍ରେ ଡିଏସ୍ପି ଭାବେ କାର୍ଯ୍ୟ କରୁଛନ୍ତି। ଆଇସିସି ତା’ର ଅଫିସିଲଆ ଟୁଇଟର ହ୍ୟାଣ୍ଡଲରେ ଯୋଗୀନ୍ଦରଙ୍କୁ ପ୍ରଶଂସା କରିଛି। ଏବେ ଏହାକୁ ନେଇ ଚର୍ଚ୍ଚା ସୃଷ୍ଟି ହୋଇଛି। ଯୋଗୀନ୍ଦର ରାସ୍ତରେ ପେଟ୍ରୋଲିଂ କରୁଥିବାର ଦେଖଯାଇଛି। ନିଜ ଦାୟିତ୍ୱକୁ ସେ ସୂଚାରୁ ରୂପେ ସମ୍ପାଦନ କରୁଛନ୍ତି। ୨୦୦୭ ପରଠାରୁ ଡିଏସ୍ପି ଭାବେ କାର୍ଯ୍ୟ କରିଆସୁଥିବା ୫ ଫୁଟ୍ ୧୧ ଇଞ୍ଚ୍ ଉଚ୍ଚତା ବିଶିଷ୍ଟ ଯୋଗୀନ୍ଦର ୪ଟି ଲେଖାଏ ଟି୨୦ ଓ ଦିନିକିଆ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ସେ ମଧ୍ୟ ୪୪ଟି ପ୍ରଥମ ଶ୍ରେଣୀ ଓ ୪୫ଟି ଲିଷ୍ଟ ଏ ଗେମ୍ ଖେଳିଛନ୍ତି।
