ଆମଷ୍ଟରଡାମ୍, ୩୦ା୩(ପି.ଟି.)-ପୂର୍ବତନ ଅଲିମ୍ପିକ ଚାମ୍ପିୟନ ଜଏସି ସୋମ୍ବ୍ରୋକ୍ ବର୍ତ୍ତମାନ କୋଭିଡ୍-୧୯ ରୋଗୀଙ୍କୁ ଚିକିତ୍ସା କ୍ଷେତ୍ରରେ ନିଜକୁ ନିୟୋଜିତ କରିଛନ୍ତି। ସୋମ୍ବ୍ରୋକ୍ ହେଉଛନ୍ତି ନେଦରଲାଣ୍ଡ୍ସ ମହିଳା ହକି ଦଳର ପୂର୍ବତନ ଗୋଲ୍କିପର। ସେ ୨୦୧୨ ଲଣ୍ଡନ ଅଲିମ୍ପିକ୍ସ ଏବଂ ୨୦୧୪ ବିଶ୍ୱ ଚାମ୍ପିୟନଶିପ୍ରେ ସ୍ବର୍ଣ୍ଣ ପଦକ ବିଜୟୀ ଦଳର ଅନ୍ୟତମ ପ୍ରମୁଖ ସଦସ୍ୟ ଥିଲେ। ସେ ପଛକୁ ପଛ ଦୁଇଥର ଶ୍ରେଷ୍ଠ ଗୋଲକିପର ପୁରସ୍କାର ବିଜୟିନୀ ହୋଇଥିଲେ। ମାତ୍ର ୨୬ ବର୍ଷ ବୟସରେ ହକି ଖେଳରୁ ଅବସର ନେବା ପରେ ସୋମ୍ବ୍ରୋକ୍ ଆମଷ୍ଟରଡାମ୍ସ୍ଥିତ ଭ୍ରିଜି ୟୁନିଭର୍ସିଟିରୁ ମେଡିକାଲ ଡ଼ିଗ୍ରୀ ହାସଲ କରିଥିଲେ। ପରେ ସେ ଇଣ୍ଟରନାଲ ମେଡିସିନ୍, ପଲ୍ମୋନାରି, କାର୍ଡିଓଲୋଜି ଏବଂ ଗ୍ୟାଷ୍ଟ୍ରୋ-ଇଣ୍ଟେଷ୍ଟିନାଲ ବିଭାଗରେ କାର୍ଯ୍ୟ କରିଥିଲେ। ସୋମ୍ବ୍ରୋକ୍ ତାଙ୍କ କ୍ୟାରିୟରରେ ୨୦୧୦ରୁ ୨୦୧୬ ମଧ୍ୟରେ ଦେଶ ତରଫରୁ ୧୧୭ଟି ମ୍ୟାଚରେ ଖେଳିଛନ୍ତି। ପୂର୍ବତନ ମହିଳା ଗୋଲପିକର ଜଣକ ବର୍ତ୍ତମାନ ଆମଷ୍ଟରଡାମ୍ଠାରୁ ୧୩ କିଲୋମିଟର ଦୂର ଆଲ୍ସମିରସ୍ଥିତ ଏକ ମେଡିିକାଲ ସେଣ୍ଟରରେ କାର୍ଯ୍ୟରତ। ପ୍ରଥମାବସ୍ଥାରେ ସେ ଟେଲିଫୋନ ଜରିଆରେ ରୋଗୀଙ୍କ ଯୋଗାଯୋଗ କରୁଥିଲେ। କୌଣସି ରୋଗୀ ଘରେ ରହି ଅବା ଡାକ୍ତରଖାନା ଆସି ଚିକିତ୍ସିତ ହେବା ଆବଶ୍ୟକ ତାହା ନିରୂପଣ କରୁଥିଲେ। କରୋନା ଭାଇରସ୍ରୁ ନିଜକୁ ସୁରକ୍ଷିତ ରଖିବା ପାଇଁ ସେ ହଜମତ୍ ସୁଟ୍ ବ୍ୟବହାର କରୁଛନ୍ତି।
