ନୂଆଦିଲ୍ଲୀ/ଓ୍ବାଶିଂଟନ,୨୦।୪: ସାରା ପୃଥିବୀରେ କରୋନା ସଂକ୍ରମଣ ନେଇ ଆତଙ୍କ ଜାରି ରହିଛି। ଏପରିସ୍ଥଳେ କେତେକ ଲୋକ ବିଭିନ୍ନ ସୋସିଆଲ୍ ମିଡ଼ିଆରେ କରୋନା ସଂକ୍ରମଣଠାରୁ ଦୂରେଇ ରହିବା ପାଇଁ ବହୁ ଗୁଜବ ସୃଷ୍ଟିକାରୀ ଭିଡ଼ିଓ ଏବଂ ଲେଖାମାନ ପ୍ରକାଶିତ କରୁଛନ୍ତି। ସମ୍ପ୍ରତି କିଛି ସୋସିଆଲ୍ ମିଡ଼ିଆରେ କ୍ଲୋରିନ୍ ଡାଇଅକ୍ସାଇଡ୍ ଟ୍ରପ୍ ନେବା ଦ୍ୱାରା କରୋନା ସଂକ୍ରମଣ ଦୂର ହେଉଥିବା ଭିଡ଼ିଓ ଏବଂ ଲେଖା ଭାଇରାଲ ହେବାରେ ଲାଗିଛି। ଏହା ପୂର୍ବରୁ ମଧ୍ୟ କ୍ଲୋରିନ୍ ଡାଇଅକ୍ସାଇଡ୍ ବ୍ୟବହାର ଦ୍ୱାରା ମ୍ୟାଲେରିଆ, ଡାଇବେଟିସ୍, ଆଜ୍ମା, ଅଟିଜିମ୍ ଏବଂ କ୍ୟାନସର ଦୂର ହେଉଥିବା ନେଇ ଗୁଜବ ଉଠିଥିଲା। ବର୍ତ୍ତମାନ ସୁଦ୍ଧା କୌଣସି ସ୍ବାସ୍ଥ୍ୟ ସଂଗଠନ ପକ୍ଷରୁ କ୍ଲୋରିନ୍ ଡାଇଅକ୍ସାଇଡ୍କୁ ଔଷଧ ଭାବେ ମାନ୍ୟତା ଦିଆଯାଇ ନାହିଁ। ଏହା ସାଧାରଣତଃ ବ୍ଲିଚିଂ ଏଜେଣ୍ଟ୍ ଭାବେ ବ୍ୟବହାର କରାଯାଇଥାଏ। ବିଭିନ୍ନ ଶିଳ୍ପ ସଂସ୍ଥାରେ ଏହାର ବହୁଳ ଉପଯୋଗ ମଧ୍ୟ ହୋଇଥାଏ। ଆମେରିକା ଫୁଡ୍ ଆଣ୍ଡ୍ ଡ୍ରଗ୍ ଆଡମିନିଷ୍ଟ୍ରେଶନ୍ ପକ୍ଷରୁ କୁହାଯାଇଛି ଯେ, କରୋନା ସଂକ୍ରମଣକୁ ଦୂରେଇବାରେ କ୍ଲୋରିନ୍ ଡାଇଅକ୍ସାଇଡ୍ କେବେ ମଧ୍ୟ ସମର୍ଥ ନୁହେଁ। ତେଣୁ ଲୋକେ ଏହାର ବ୍ୟବହାର ନ କରିବା ଉଚିତ। ଏହା ଦ୍ୱାରା ଲିଭର ଉପରେ ଖରାପ ପ୍ରଭାବ ପଡ଼ିଥାଏ। ସେହିପରି ନିଶ୍ୱାସପ୍ରଶ୍ୱାସ ନେବାରେ ମଧ୍ୟ ଅସୁବିଧା ଦେଖାଦେଇଥାଏ। ଏହା ହାର୍ଟ ଉପରେ ମଧ୍ୟ ଖରାପ ପ୍ରଭାବ ପକାଇଥାଏ ବୋଲି ମାଦ୍ରିଦ୍ର କମ୍ପ୍ଲୁଣ୍ଟେସ୍ ବିଶ୍ୱବିଦ୍ୟାଳୟର ରସାୟନ ବିଭାଗ ପ୍ରଫେସର ମିଗେଲ ଏଞ୍ଜେଲ୍ ସିଏରା ରୋଡ୍ରିଗଜ୍ ସୂଚନା ଦେଇଛନ୍ତି। କ୍ଲୋରିନ୍ ଡାଇଅକ୍ସାଇଡ୍ ଡ୍ରପ୍ ନେଲେ ଲୋହିତ ରକ୍ତ କୋଷିକା ଉପରେ ମଧ୍ୟ ଖରାପ ପ୍ରଭାବ ପଡ଼ିଥାଏ। ସେହିପରି ବାନ୍ତି ହେବା ଅବା ଡାଏରିଆ ଆଦି ଲକ୍ଷଣ ମଧ୍ୟ ଦେଖାଦେଇଥାଏ। ୟୁଟ୍ୟୁବ୍ ଏବଂ ଫେସବୁକ୍ରେ ଏହାର ବ୍ୟବହାର ନେଇ ବହୁ ଭିଡ଼ିଓ ଅପଲୋଡ୍ କରାଯାଇଛି। କେତେକ ନିଜର ଅନୁଭୁତି ମଧ୍ୟ ବଖାଣୁଛନ୍ତି। ସୁରକ୍ଷା ଦୃଷ୍ଟିରୁ ସ୍ପେନ୍, ଫ୍ରାନ୍ସ୍, ଜର୍ମାନୀ, ବ୍ରିଟେନ୍, କାନାଡ଼ା, ଆମେରିକା, ଅଷ୍ଟ୍ରେଲିଆ ଆଦି ବହୁ ଦେଶରେ କ୍ଲୋରିନ୍ ଡାଇଅକ୍ସାଇଡ୍ର ବ୍ୟବହାର ଉପରେ ରୋକ ଲଗାଯାଇଛି।
