ପୁରୀ ଅଫିସ,୩୦ା୩: ରାଜ୍ୟ ସରକାରଙ୍କ କୋଭିଡ୍-୧୯ର ମୁଖ୍ୟ ମୁଖପାତ୍ର ସୁବ୍ରତୋ ବାଗ୍ଚୀ ରବିବାର ପୁରୀ ଗସ୍ତରେ ଆସିଥିଲେ। କରୋନା ମୁକାବିଲା ନେଇ ପୁରୀ ଜିଲା ପ୍ରଶାସନ କେତେ ପ୍ରସ୍ତୁତ ତାହା ପରଖିଥିଲେ। ଏହି ଅବସରରେ ଜିଲା ନିୟନ୍ତ୍ରଣ କକ୍ଷ, ପୋଲିସ ନିୟନ୍ତ୍ରଣ କକ୍ଷ, ଆଇସୋଲେଶନ ସେଣ୍ଟର ବୁଲିବା ସହ ଜିଲାପାଳ, ଏସ୍ପି, ଜିଲା ମୁଖ୍ୟ ଚିକିତ୍ସାଧିକାରୀଙ୍କ ସହ ଆଲୋଚନା କରିଥିଲେ। ସଚେତନତା ଓ ସତର୍କତା ପାଇଁ କ’ଣ ସବୁ ପଦକ୍ଷେପ ନିଆଯାଇଛି, କେତେ ସଂଖ୍ୟକ ବେଡ୍ ପ୍ରସ୍ତୁତ ରହିଛି, ଆଇସୋଲେଶନ ସେଣ୍ଟରରେ ସମସ୍ତ ପ୍ରକାର ସୁବିଧା ମିଳୁଛି ନା ନାହିଁ ଆଦି ପଚାରି ବୁଝିଥିଲେ। ଲୋକେ କିଭଳି ସାମାଜିକ ଦୂରତା ମାନୁଛନ୍ତି, ବାହାର ରାଜ୍ୟର ଶ୍ରମିକ, ନିରାଶ୍ରୟ, ମାନସିକ ବିକାରଗ୍ରସ୍ତ, ଗରିବ ଓ ଦିନମଜୁରିଆଙ୍କ ବ୍ୟବସ୍ଥା ସମ୍ପର୍କରେ ତଥ୍ୟ ନେବା ସହ ବରିଷ୍ଠ ନାଗରିକ ଦେଖାଶୁଣା ଉପରେ ଗୁରୁତ୍ୱ ଦେଇଥିଲେ। ପୋଲିସ ନିୟନ୍ତ୍ରଣ କକ୍ଷ ପରିଦର୍ଶନ ବେଳେ ତାଙ୍କୁ ଏସ୍ପି ଉମାଶଙ୍କର ଦାଶ ବ୍ୟବସ୍ଥା ସମ୍ପର୍କରେ ବୁଝାଇଥିଲେ। ବରିଷ୍ଠ ନାଗରିକଙ୍କ ପାଇଁ ରେଜିଷ୍ଟ୍ରେଶନ ବ୍ୟବସ୍ଥା ହୋଇଛି। ସ୍ବେଚ୍ଛାସେବୀମାନେ ସେମାନଙ୍କ ପାଖକୁ ଯାଇ ଆବଶ୍ୟକ ଜିନିଷପତ୍ର ଏବଂ ଔଷଧ ଯୋଗାଇ ଦେଉଛନ୍ତି ବୋଲି ଏସ୍ପି କହିଥିଲେ।
ଜିଲା ମୁଖ୍ୟ ଚିକିତ୍ସାଧିକାରୀ ଡା. ନୀଳକଣ୍ଠ ମିଶ୍ର ଜିଲା ମୁଖ୍ୟ ଚିକିତ୍ସାଳୟରେ କେଉଁଭଳି ଭାବେ ବ୍ୟବସ୍ଥା ହୋଇଛି ସେନେଇ ବାଗ୍ଚୀଙ୍କୁ ସୂଚନା ଦେଇଥିଲେ। ଜିଲା ମୁଖ୍ୟ ଚିକିତ୍ସାଳୟ, ଆୟୁର୍ବେଦ ମହାବିଦ୍ୟାଳୟ, ଜିଲା ସଂକ୍ରାମକ ରୋଗ ଚିକିତ୍ସାଳୟ ପରିସରରେ ହୋଇଥିବା ଆଇସୋଲେଶନ ସେଣ୍ଟର, କରୋନା ସନ୍ଦିଗ୍ଧ ଆସିଲେ ସେମାନଙ୍କୁ କିପରି ଚିକିତ୍ସା କରାଯାଇପାରିବ, ଡାକ୍ତର, ସ୍ବାସ୍ଥ୍ୟ କର୍ମଚାରୀଙ୍କ ସମ୍ପର୍କରେ ତଥ୍ୟ ରଖିଥିଲେ। ବାଗ୍ଚୀ ପୁରୀ ମେଡିକାଲ କଲେଜକୁ ଯାଇ ସମସ୍ତ ପ୍ରସ୍ତୁତି ସଂକ୍ରାନ୍ତରେ ସମୀକ୍ଷା କରିଥିଲେ। ଜରୁରୀ ପରିସ୍ଥିତିରେ କରୋନା ସଂକ୍ରମିତଙ୍କ ଚିକିତ୍ସା ନିମନ୍ତେ ସେଠାରେ ୨୫୦ ଶଯ୍ୟା ପ୍ରସ୍ତୁତ ହୋଇଛି। ସେହିପରି ବାଲିଗୁଆଳି ବାତ୍ୟା ଆଶ୍ରୟସ୍ଥଳୀରେ ଥିବା ଅସ୍ଥାୟୀ ମେଡିକାଲ ଶିବିର ପରିଦର୍ଶନ କରିଥିଲେ। ଲକ୍ଡାଉନ ନିୟମକୁ କିପରି ଜିଲାରେ ପାଳନ କରାଯାଉଛି ଏବଂ ଗରିବ, ଦିନମଜୁରିଆ, ରାଜ୍ୟ ବାହାର ଶ୍ରମିକଙ୍କୁ ରାଶନ ଏବଂ ରନ୍ଧାଖାଦ୍ୟ ପ୍ରଦାନ ସମ୍ପର୍କରେ ଜିଲାପାଳ ବଲୱନ୍ତ ସିଂ ତଥ୍ୟ ରଖିଥିଲେ। ଜିଲାପାଳଙ୍କ କାର୍ଯ୍ୟାଳୟ ପରିସରସ୍ଥ ଜିଲା ନିୟନ୍ତ୍ରଣ କକ୍ଷ ବୁଲି ବାଗ୍ଚୀ ସନ୍ତୋଷ ବ୍ୟକ୍ତ କରିଥିଲେ। ବାଗ୍ଚୀଙ୍କ ଏହି ଗସ୍ତ ସମୟରେ ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ବିଶାଲ ସିଂ, ଅତିରିକ୍ତ ଜିଲାପାଳ ବିନୟ କୁମାର ଦାଶ, ପୌରସଂସ୍ଥା ନିର୍ବାହୀ ଅଧିକାରୀ ବିଜୟ କୁମାର ଦାଶ, ସଦର ବିଡିଓ ଜ୍ୟୋତିଶଙ୍କର ସାହୁ, ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ବିରଜା ଶଙ୍କର ରଥ ପ୍ରମୁଖ ଉପସ୍ଥିତ ଥିଲେ।
