ମିରଟ,୧୨।୫: ଭାରତରେ କରୋନା ସଂକ୍ରମଣ ଥମିବାର ନାଁ ଧରୁନି। ସଂକ୍ରମଣଠାରୁ ଅଧିକ ହୃଦୟ ବିଦାରକ ହେବାରେ ଲାଗିଛି କରୋନା ସଂକ୍ରମିତଙ୍କ ଅନ୍ତିମ ସଂସ୍କାରକୁ ନେଇ ଘଟୁଥିବା ଘଟଣା। କରୋନା ମହାମାରୀରେ ଅନ୍ତିମ ସଂସ୍କାର ପାଇଁ ବି ସଙ୍କଟ ଦେଖାଦେଉଛି। ସଂକ୍ରମିତଙ୍କ ମୃତଦେହକୁ ସଂସ୍କାର କରିବା ନେଇ ଅବହେଳା ପ୍ରଦର୍ଶନ କରାଯାଉଥିବା ଅଭିଯୋଗ ହେଉଛି। ଫଳରେ ସ୍ଥିତି ଅଧିକ ଖରାପ ହେବାରେ ଲାଗିଛି। ନିକଟରେ ଉତ୍ତରପ୍ରଦେଶ ମିରଟ ହସ୍ପିଟାଲରେ ଜଣେ କରୋନା ସଂକ୍ରମିତ ଭଗବତ୍ ଶର୍ମାଙ୍କର ଚିକିତ୍ସା ସମୟରେ ମୃତ୍ୟୁ ଘଟିଥିଲା। ସେ ସମ୍ଭଲ ଅଞ୍ଚଳରୁ ଆସିଥିଲେ। ତାଙ୍କର ମୃତ୍ୟୁ ରବିବାର ଘଟିଥିଲା। ତେବେ ମଙ୍ଗଳବାର ଅପରାହ୍ନ ପର୍ଯ୍ୟନ୍ତ ତାଙ୍କର ସଂସ୍କାର ହୋଇ ପାରି ନ ଥିଲା। ମୃତକଙ୍କ ପରିବାର ସଦସ୍ୟ ସୂରଜକୁଣ୍ଡ ଶ୍ମଶାନ ଘାଟକୁ ମୃତଦେହକୁ ସଂସ୍କାର ପାଇଁ ଆଣିଥିଲେ। ତେବେ ମେଡିକାଲ ଟିମ୍ ନ ପହଞ୍ଚିବାରୁ ମୃତଦେହକୁ ଦୁଇଦିନ ପର୍ଯ୍ୟନ୍ତ ଆମ୍ବଲାନ୍ସ୍ରୁ ବାହାର କରାଯାଇ ନ ଥିଲା। ଘଟଣା ସମ୍ପର୍କରେ ଜଣାପଡ଼ିବା ପରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହାର ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି।
