ନ୍ୟୁୟର୍କ: ସୃଜନଶୀଳତାର ବିକଳ୍ପ ନାହିଁ। ଭାବୁକ ଆଉ ଉଦ୍ୟମୀ ମନଟିଏ ଥିଲେ ସୃଜନଶକ୍ତିର ବିକାଶ ହୋଇପାରେ। ଏହାର ଏକ ଉଦାହରଣ ହେଉଛନ୍ତି ଲାଉରେଲ୍ ଓ ମେରିଲାଣ୍ଡ। ଏହି ଦୁଇ ଭାଇ ଏବେ ନ୍ୟୁୟର୍କର ରୁବେ ଗୋଲ୍ଡବର୍ଗ ବାର୍ଷିକ ପ୍ରତିଯୋଗିତାରେ ଭାଗନେବା ପାଇଁ ଚୟନ ହୋଇଛନ୍ତି। ଏହି ପ୍ରତିଯୋଗିତାରେ ଏକ ସହଜ କାମକୁ ଜଟିଳ ଭାବରେ କରିବା ପାଇଁ ନିୟମ ରହିଥାଏ। ତେଣୁ ଏଥର କେହି ହେଲେ ଏଥିପାଇଁ ଚୟନ ହୋଇପାରି ନ ଥିଲେ। କିନ୍ତୁ ଏହି ଦୁଇଭାଇ ଏକ ସ୍ବତନ୍ତ୍ର କରୋନା ଭାଇରସ୍ ସୋପ୍ ମେଶିନ ବାହାର କରି ପ୍ରତିଯୋଗିତାକୁ ଉତ୍ତୀର୍ଣ୍ଣ ହେବା ସହିତ ସେମାନଙ୍କ ସୃଜନଶକ୍ତିର ପରିଚୟ ଦେଇଛନ୍ତି। ସେମାନେ ଏଭଳି ଏକ ମେଶିନ ବାହାର କରିଛନ୍ତି, ଯାହାକୁ ଚାଲୁ କରିବା ମାତ୍ରେ ତାହା ସେଥିରେ ପ୍ରଥମେ ଏକ ମାର୍ବଲ ପକାଏ, ପରେ ତାହା ଏକ ଦ୍ରୁତ ଟଏ ଟ୍ରେନ୍କୁ ଠେଲି ଥାଏ। ଯାହା ମାଧ୍ୟମରେ ଏକ ସାବୁନ ଠେଲି ହୋଇ ସିଧା ବାଥ୍ରୁମରେ ଅପେକ୍ଷା କରିଥିବା ଲୋକ ହାତରେ ପଡ଼ିଥାଏ। ନ୍ୟୁୟର୍କରେ ଏ ବର୍ଷ କରୋନା ଭାଇରସ୍ ପାଇଁ ଏହି ପ୍ରତିଯୋଗିତାକୁ ବନ୍ଦ କରି ଦିଆଯାଇଥିଲା। କିନ୍ତୁ ଶେଷରେ ଏଥିପାଇଁ ପ୍ରତିଯୋଗିତାର ଆହ୍ବାନ କରାଯାଇଥିଲା। ମାତ୍ର କେହି ହେଲେ ଅଜବ ପ୍ରକାରର ମେଶିନ କିଛି ପ୍ରଦର୍ଶନ କରିପାରି ନ ଥିବାରୁ ଓହରି ଯାଇଥିଲେ। କିନ୍ତୁ ଦୁଇ ଭାଇଙ୍କ ଏହି ମେଶିନଟି ଅଜବ ପ୍ରକାରରେ ସାବୁନ ପହଞ୍ଚାଇ ପାରୁଥିବାରୁ ସେମାନେ ପୁରସ୍କାର ଜିତିବା ପାଇଁ ସମର୍ଥ ହୋଇଛନ୍ତି।
