ଭୁବନେଶ୍ୱର, ୧୭।୩(ବ୍ୟୁରୋ): କରୋନା ସତର୍କତାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଉଛି। ଏହି ପରିପ୍ରେକ୍ଷୀରେ ଆହାର କେନ୍ଦ୍ର ଖୋଲା ରହିବା ସମୟ ଅବଧିକୁ ସୋମବାରଠାରୁ ବଢ଼ାଯାଇଛି। ଏହା ଦିନ ୧୦ରୁ ଅପରାହ୍ନ ୪ଟା ପର୍ଯ୍ୟନ୍ତ ଖୋଲା ରହିବ। ଭିଡ଼କୁ ନିୟନ୍ତ୍ରଣରେ ରଖିବାକୁ ଏପରି କରାଯାଇଛି। ଏ ନେଇ ଗୃହ ଓ ସହରାଞ୍ଚଳ ବିଭାଗ ସଚିବଙ୍କ ପକ୍ଷରୁ ସମସ୍ତ ଜିଲାପାଳ, ମ୍ୟୁନିସିପାଲିଟି କର୍ପୋରେଶନକୁ ଚିଠିଲେଖି ନିର୍ଦ୍ଦେଶ ଦିଆଯାଇଛି।
ଲୋକେ ଧାଡିରେ ଯାଇ ଆହାର ଗ୍ରହଣ କରିବେ। ଧାଡିରେ ଦୁଇ ଲୋକଙ୍କ ଭିତରେ ଅତି କମ୍ରେ ଦେଢ଼ ମିଟର ଦୂରତା ରହିବା ଆବଶ୍ୟକ। ଏହି କାର୍ଯ୍ୟକୁ ତଦାରଖ କରିବା ଲାଗି ଆହାର କେନ୍ଦ୍ରଗୁଡିକରେ ପୋଲିସ କର୍ମଚାରୀ ବା ହୋର୍ମଗାର୍ଡଙ୍କୁ ମୁତୟନ କରାଯିବ ବୋଲି ନିର୍ଦ୍ଦେଶନାମାରେ କୁହାଯାଇଛି। ଲୋକେ ଆହାର କେନ୍ଦ୍ରଗୁଡିକରେ ପ୍ରବେଶ କରିବା ପୂର୍ବରୁ ହାଇ ଧୋଇବା ଲାଗି ସାବୁନ ବା ହ୍ୟାଣ୍ଡ ଓ୍ବାସର ବ୍ୟବସ୍ଥା କରାଯିବ। ଖାଲି ସେତିକି ନୁହେଁ ବାହାରେ ହଷ୍ଟବିନ୍ ରଖାଯିବ। ଅପରପେକ୍ଷ ଲୋକଙ୍କୁ କୁପନ ଲାଗି ବକ୍ସରେ ଟଙ୍କା ପକାଇବାକୁ କୁହାଯିବ।
