ଭୁବନେଶ୍ୱର, ୧୯।୪(ବ୍ୟୁରୋ): ଭୁବନେଶ୍ୱରରେ ପ୍ରତିଦିନ କୋଟିଏରୁ ଊର୍ଦ୍ଧ୍ୱ ଟଙ୍କାର ଫୁଲ କାରବାର ହୋଇଥାଏ। ସହରରେ ପାଖାପାଖି ୫ଶହ ବ୍ୟବସାୟୀ ଫୁଲ ବେପାର କରି ପରିବାର ଚଳାନ୍ତି। ଏଥିସହ ଏମାନଙ୍କ ଉପରେ ଆହୁରି ବହୁ ପରିବାର ପରୋକ୍ଷରେ ନିର୍ଭର କରନ୍ତି। ଏବେ କରୋନା କଟକଣା ସେମାନଙ୍କ ଜୀବନଜୀବିକାକୁ ଗୁରୁତର ପ୍ରଭାବିତ କରିଛି। ଲକ୍ଡାଉନ୍ ପାଇଁ ଲୋକେ ଘରେ ରହୁଥିବାବେଳେ ଫୁଲ ଦୋକାନ ଓ ବ୍ୟବସାୟ ବନ୍ଦ ରହିଛି। ଫଳରେ ଫୁଲ ବ୍ୟବସାୟୀମାନେ ହାତବାନ୍ଧି ବସିଥିବାବେଳେ ପରିବାରର ଦୁଃଖ ମଧ୍ୟ ବଢ଼ିଚାଲିଛି।
ମନ୍ଦିରମାଳିନୀ ଭୁବନେଶ୍ୱରରେ ବର୍ଷତମାମ ଫୁଲ ବ୍ୟବସାୟ ଚାଲିଥାଏ। ମେଳା, ଉତ୍ସବଠାରୁ ଆରମ୍ଭ କରି ବଡ଼ ବଡ଼ ଇଭେଣ୍ଟରେ ସାଜସଜ୍ଜା ପାଇଁ ବହୁ ଲକ୍ଷ ଟଙ୍କାର ଫୁଲ ଲାଗିଥାଏ। ଏଥିସହ ଘରୋଇ କାର୍ଯ୍ୟକ୍ରମ, ବାହାଘର, ଠାକୁର ପୂଜା ପାଇଁ ମଧ୍ୟ ଫୁଲର ଆବଶ୍ୟକତା ବଢ଼ି ଚାଲିଛି। ହୋଲ୍ସେଲରମାନେ ରାଜ୍ୟ ତଥା ବାହାରୁ ଫୁଲ ଆଣି ସହରର ଫୁଲ ଦୋକାନୀମାନଙ୍କୁ ଯୋଗାଇଥାନ୍ତି। ଫୁଲ ହୋଲ୍ସେଲିଂ ଓ ରିଟେଲିଂ କ୍ଷେତ୍ରରେ ହଜାର ହଜାର ଲୋକ ନିୟୋଜିତ ଅଛନ୍ତି। ସେହିଭଳି ଫୁଲ ସାଜସଜ୍ଜାକୁ ମଧ୍ୟ ବହୁ ଲୋକ ରୋଜଗାରପନ୍ଥା ଭାବେ ବାଛି ନେଇଛନ୍ତି। ଏବେ ସମସ୍ତେ ରୋଜଗାର ହରାଇଛନ୍ତି।
ଭୁବନେଶ୍ୱରରେ ଦିନକୁ ପ୍ରାୟ ୧୦ଟନ୍ରୁ ଊର୍ଦ୍ଧ୍ୱ ଫୁଲ ବିକ୍ରି ହେଉଥିଲା। ଏଥିପାଇଁ ସହର ଉପକଣ୍ଠ ସମେତ କଲିକତା, ମୁମ୍ବାଇ ଆଦି ସହରରୁ ଫୁଲ ଆସିଥାଏ। ଏହି ବ୍ୟବସାୟରେ ୫ ହଜାରରୁ ଅଧିକ ଲୋକ ନିୟୋଜିତ ଅଛନ୍ତି। ଲକ୍ଡାଉନ୍ ପାଇଁ ଏବେସୁଦ୍ଧା ୫୦ କୋଟିରୁ ଊର୍ଦ୍ଧ୍ୱ ଟଙ୍କାର କ୍ଷତି ହୋଇସାରିଲାଣି। ଆଉ କେତେଦିନ ଏପରି ସ୍ଥିତି ଲାଗି ରହିବ ତାହାର ମଧ୍ୟ କିଛି ନିଶ୍ଚିତତା ନାହିଁ। ଆଗକୁ ଫୁଲ ବ୍ୟବସାୟୀଙ୍କ ଅବସ୍ଥା କ’ଣ ହେବ କହି ହେଉନି। ସରକାର ଫୁଲ ବ୍ୟବସାୟୀଙ୍କ ପାଇଁ କିଛି ବିକଳ୍ପ ପନ୍ଥା ବାହାର କରିବା ଦରକାର।
– ମନୋଜ ନାୟକ, ସଭ୍ୟ,
ଓଡ଼ିଶା ଫୁଲ ବ୍ୟବସାୟୀ ସଂଘ
ଫୁଲ ବେପାରରୁ ମୋ ଭଳି ବହୁ ଲୋକଙ୍କ ପରିବାର ଚଳେ। ପାଖାପାଖି ମାସେ ହେବ ରୋଜଗାର ନାହିଁ। ପାଖରେ ଥିବା ଟଙ୍କା ସରି ଆସୁଥିବାରୁ ଅଧାବେଳା ରୋଷେଇ କରୁନୁ। ବହୁ ପରିବାର ମଧ୍ୟ ଭୋକରେ ଥିବା କହୁଛନ୍ତି। ଲକ୍ଡାଉନ୍ ଶେଷ ବେଳକୁ ବହୁ ପରିବାର ଅନାହାରରେ ଦିନ କାଟୁଥିବେ। ସରକାର ଏଥିପ୍ରତି ଗୁରୁତ୍ୱ ଦେଇ ସହାୟତା ନ ଦେଲେ କରୋନାଠାରୁ ଅନାହାର ସ୍ଥିତି ବଳିଯାଇଥିବ।
– ଯତୀନ ରାଉତ,
ଫୁଲ ବ୍ୟବସାୟୀ, ଚନ୍ଦ୍ରଶେଖରପୁର
