ନୂଆଦିଲ୍ଲୀ: କରୋନା ଭାଇରସ୍ କେତେ ପ୍ରଭାବଶାଳୀ ତାହା ରୋଗୀଙ୍କ ବର୍ଦ୍ଧିତ ସଂଖ୍ୟା ଦେଖି ସହଜରେ ଅନୁମାନ କରିହେଉଛି। କିନ୍ତୁ ଏହି ଭାଇରସ୍ ଖାଲି ସଂକ୍ରମିତଙ୍କ ସଂସ୍ପର୍ଶରେ ଆସିଲେ ହୁଏ ନାହିଁ, ରୋଗୀଙ୍କ ବ୍ୟବହାର ଜିନିଷ ଛୁଇଁଲେ ମଧ୍ୟ କରୋନା ସଂକ୍ରମିତ ହୋଇଥାଏ। ଏପରି ଏକ ଘଟଣା ଘଟିଛି ଚଣ୍ଡୀଗଡ଼ର ଜଣେ ନର୍ସଙ୍କ ସହ। ଏହି ନର୍ସ ଜଣକ କରୋନା ସଂକ୍ରମିତଙ୍କ ସେବା କରୁଥିଲେ। ଭୁଲ୍ରେ ସେ ରୋଗୀଙ୍କ ମୋବାଇଲ୍ ଛୁଇଁ ଦେଇଥିଲେ। ଫଳରେ ଏହା ତାଙ୍କ ପାଇଁ ମହଙ୍ଗା ପଡ଼ିଛି। ସେ ମଧ୍ୟ କରୋନା ଭାଇରସ୍ରେ ଆକ୍ରାନ୍ତ ହୋଇଛନ୍ତି। ନର୍ସ ଜଣକ ଚଣ୍ଡୀଗଡ଼ର ପଞ୍ଚକୁଲାର ଏକ ହସ୍ପିଟାଲରେ କାମ କରୁଛନ୍ତି। ତାଙ୍କଠାରେ କୋଭିଡ୍ – ୧୯ ପଜିଟିଭ୍ ଦେଖାଯାଇଛି। ଫଳରେ ନର୍ସଙ୍କୁ ଆଇସୋଲେଶନ ଓ୍ବାର୍ଡରେ ଭର୍ତ୍ତି କରାଯାଇଛି। ବର୍ତ୍ତମାନ ନର୍ସଙ୍କ ପରିବାରର ୪ ସଦସ୍ୟ, ସେ ରହୁଥିବା ଭଡ଼ାଘରର ମାଲିକ ଏବଂ ମାଲିକାଣୀଙ୍କୁ ମଧ୍ୟ କ୍ୱାରାଣ୍ଟାଇନ୍ରେ ରଖାଯାଇଛି। ଏହା ପୂର୍ବରୁ ଦିଲ୍ଲୀର ୩ ଜଣ ଡାକ୍ତର ମଧ୍ୟ କରୋନା ଭାଇରସ୍ରେ ଆକ୍ରାନ୍ତ ହୋଇଥିଲେ।
