ଲକ୍ଷ୍ନୌ,୧୬।୪: କରୋନା ସଂକ୍ରମଣକୁ ନେଇ ସାରା ବିଶ୍ୱ ଭୟଭୀତ ହୋଇଯାଇଥିବା ବେଳେ ଏବେ ଜଣେ ୧୨୦ ବର୍ଷର ବୃଦ୍ଧା ସମସ୍ତଙ୍କୁ ସାହାସ ଯୋଗାଇଛନ୍ତି। ଉତ୍ତରପ୍ରଦେଶ ବାନ୍ଦାର ଉତ୍ତରରେ ରହୁଥିବା ୧୨୦ ବର୍ଷ ବୟସ୍କା ବୃଦ୍ଧା ଜନିଆ ଦେବୀ କହିଛନ୍ତି ଦେଶରେ ଯେତେବେଳେ ପ୍ଲେଗ ମହାମାରୀର ରୂପ ନେଇଥିଲା ସେତେବେଳେ ଏତେ ସଂଖ୍ୟାରେ ଡାକ୍ତର ନ ଥିଲେ। ହେଲେ ଏବେ ବହୁ ସଂଖ୍ୟାରେ ଡାକ୍ତର ଥିବାରୁ କରୋନାକୁ ଡରିବାର ନାହିଁ ବୋଲି ସେ କହିଛନ୍ତି। ତାଙ୍କ ମତରେ ଏବେ ଗାଁଠାରୁ ଆରମ୍ଭ କରି ସହର ପର୍ଯ୍ୟନ୍ତ ଅନେକ ଡାକ୍ତର ଅଛନ୍ତି। ତେବେ ପ୍ଲେଗ ରୋଗରେ ସେ ତାଙ୍କ ସ୍ବାମୀ, ପିତା ଓ ଅନ୍ୟ ପରିଜନଙ୍କ ସମେତ ୧୧ ଜଣଙ୍କୁ ହରାଇ ଭାଙ୍ଗି ପଡିଥିଲେ ସତ। ହେଲେ ଏବେ ତାଙ୍କର ୩ ପିଢିର ପରିବାରର ପାଇଁ ସେ ଯେମିତି ସାହସ ଯୋଗାଇଛନ୍ତି। ୧୨୦ ବର୍ଷର ଏହି ବୃଦ୍ଧାଙ୍କ ମାନସିକ ସ୍ଥିତି ଠିକ ଥିବାରୁ ଆଉ ତାଙ୍କର ଏହି ସାହସ ଅନ୍ୟମାନଙ୍କୁ ପ୍ରେରଣା ଦେବ ବୋଲି କୁହାଯାଉଛି। ଜନିଆ ଦେବୀ କୁହନ୍ତି ଯେତେବେଳେ ପ୍ଲେଗ ମହାମାରୀର ରୂପ ନେଲା ସେତେବେଳେ ଲୋକେ ଭୟଭୀତ ହୋଇଯାଇଥିଲେ। କାରଣ ଘରୁ ଗୋଟିଏ ମୃତଦେହ ସଂସ୍କାର କରି ଆସିବା ସମୟରେ ଆଉ ଜଣେ ବ୍ୟକ୍ତିଙ୍କର ମୃତ୍ୟୁ ହେଉଥିଲା। ଏମିତିକି ଜାଳେଣୀର ଅଭାବ ପଡିବାରୁ ଅଧିକାଂଶ ଲୋକଙ୍କୁ ପୋତି ଦିଆଯାଉଥିଲା। ଏଭଳି ପରିସ୍ଥିତିକୁ ଦେଖି ଜନିଆ ଦେବୀ ନିଜ ବଡ଼ ଝିଅକୁ ସାଙ୍ଗରେ ଧରି ଜଙ୍ଗଲକୁ ଚାଲି ଯାଇଥିଲେ। କିଛଦିନ ପରେ ପରିସ୍ଥିତି ଠିକ୍ ହେବାରୁ ସେ ଦ୍ୱିତୀୟ ବିବାହ କରିଥିଲେ। ଏବେ ସେ ତାଙ୍କ ଦ୍ୱିତୀୟ ସ୍ବାମୀଙ୍କ ପିଲାମାନଙ୍କ ପାଖରେ ଥିବା ବେଳେ ତାଙ୍କ ବଡଝିଅଙ୍କ ବୟସ ୧୦୦ ବର୍ଷ ଅତିକ୍ରମ କରି ଗଲାଣି।
