ଢେଙ୍କାନାଳ ଅଫିସ, ୮ା୬: ଢେଙ୍କାନାଳ ଜିଲାରେ ପଥର ମାଫିଆଙ୍କ ଦାଦାଗିରି ପ୍ରଶାସନ ପାଇଁ ମୁଣ୍ଡ ବ୍ୟଥା ପାଲଟିଛି। ବେଆଇନ ଖାଦାନରେ ଚଢ଼ାଉବେଳେ କେତେବେଳେ ସେମାନେ ଆକ୍ରମଣ କରୁଛନ୍ତି ତ ଆଉ କେବେ ଅଧିକାରୀଙ୍କୁ ଅଟକ ରଖୁଛନ୍ତି। ରବିବାର ଏହାର ପୁନରାବୃତ୍ତି ହୋଇଛି। ନିହଲପ୍ରସାଦ ଥାନା ଛୋଟତେନ୍ତୁଳି ଗ୍ରାମ ନିକଟରେ ଥିବା ବେଆଇନ ପଥର ଖାଦାନରେ ଚଢ଼ାଉ ବେଳେ ଜବତ କରାଯାଇଥିବା କଟର ମେଶିନକୁ ବ୍ୟବସାୟୀମାନେ ଛଡ଼ାଇ ନେଇଛନ୍ତି। ଏହି ଘଟଣା ଚର୍ଚ୍ଚାର ବିଷୟ ପାଲଟିଛି।
ଛୋଟତେନ୍ତୁଳି ଗ୍ରାମ ନିକଟରେ ବେଆଇନ ଭାବେ ପଥର କଟା ଚାଲିଥିବା ସୂଚନା ପାଇ ଅତିରିକ୍ତ ଜିଲାପାଳ ସୌଦାମିନୀ ସେଠୀ (ରାଜସ୍ବ)ଙ୍କ ନେତୃତ୍ୱରେ ଉପଜିଲାପାଳ ସାଫଲ୍ୟ ମଣ୍ଡିତ ପ୍ରଧାନ, ଅତିରିକ୍ତ ତହସିଲଦାର ଲକ୍ଷ୍ମଣ ଦଳେଇ, ଓଡ଼ାପଡା ଆର୍ଆଇ ଚିନ୍ମୟ ଦାସ ପୋଲିସ ଫୋର୍ସ ସହ ଚଢ଼ାଉ କରିଥିଲେ। ଘଟଣାସ୍ଥଳରୁ ଏକ ନମ୍ବର ବିହୀନ ପଥର ବୋଝେଇ ଟ୍ରାକ୍ଟର ଏବଂ କଟର ମେଶିନ ଜବତ କରାଯାଇଥିଲା। ଅଧିକାରୀମାନେ ଫେରୁଥିବାବେଳେ ରାସ୍ତାରେ ପଥର ବ୍ୟବସାୟୀମାନେ ଠେଙ୍ଗାବାଡ଼ି ଧରି ଅଟକାଇବା ସହ କଟର ମେଶିନ ନେଇଯାଇଥିଲେ। ଜବତ ଟ୍ରାକ୍ଟରକୁ ନିହଲପ୍ରସାଦ ଥାନା ପୋଲିସ ଜିମା ଦିଆଯାଇଛି। ଜିଲା ପ୍ରଶାସନ ଓ ପୋଲିସ ମଧ୍ୟରେ ସମନ୍ବୟ ଅଭାବ ଯୋଗୁ ଏଭଳି ଘଟଣା ଘଟୁଥିବା ଚର୍ଚ୍ଚା ହେଉଛି। ଏ ସଂକ୍ରାନ୍ତରେ ଉପଜିଲାପାଳ କୁହନ୍ତି, ଘଟଣା ସତ। ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
