ଭୁବନେଶ୍ୱର,୧୧।୧୨(ବ୍ୟୁରୋ): ଲୋକ ସଭାରେ ନାଗରିକତା ସଂଶୋଧନ ବିଲ୍-୨୦୧୯ ପାସ୍ ହେବା ପରେ ବୁଧବାର ରାଜ୍ୟ ସଭାରେ ଆଗତ କରାଯାଇଛି। ଏହାକୁ ବିଜେଡି ପକ୍ଷରୁ ସମର୍ଥନ କରାଯିବା ପରେ କଂଗ୍ରେସ ପକ୍ଷରୁ ବିଜେଡିକୁ ସମାଲୋଚନା କରାଯାଇଛି। ଏହି ପରିପ୍ରେକ୍ଷୀରେ କଂଗ୍ରେସର ରାଷ୍ଟ୍ରୀୟ ସମ୍ପାଦକ ଶରତ ରାଉତ ପ୍ରତିକ୍ରିୟା ରଖି କହିଛନ୍ତି ଯେ, ଏହି ବିଲ୍ ଦେଶ ବିରୋଧୀ। ବିଲ୍କୁ ସରକାର ତୁରନ୍ତ ପ୍ରତ୍ୟାହାର କରିବା ଦରକାର। ଏହି ବିଲ୍ ପାସ ହେବା ପରେ ଦେଶର ଏକତା, ଅଖଣ୍ଡତା, ଜାତୀୟତା ଏବଂ ସଂହତି ବ୍ୟାହତ ହେବ। ଅନ୍ଧ ଭାବେ ବିଜେଡି ନାଗରିକତା ସଂଶୋଧନ ବିଲ୍କୁ ସମର୍ଥନ ଦେଉଛି। ଧର୍ମନିରପେକ୍ଷତାର ଦ୍ୱାହୀ ଦେଉଥିବା ବିଜେଡିର ମୁଖା ଖୋଲିଯାଇଛି। ବିଲ୍ ଆଇନରେ ପରିଣତ ହେଲେ ଅଶାନ୍ତି ଓ ଅରାଜକତା ସୃଷ୍ଟି ହେବ ବୋଲି ସେ କହିଛନ୍ତି। ସେହିଭଳି ଭାଜପାକୁ କଟାକ୍ଷ କରି ସମ୍ବିଧାନର ଆତ୍ମା ସହ ଦଳ ଖେଳୁଥିବା ସେ କହିଛନ୍ତି।
