ୱେଲିଂଟନ,୨୧।୧: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଦୁଇମ୍ୟାଚ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚ୍ ଓ୍ବେଲିଟନର ବେସିନ ରିଜର୍ଭ ଗ୍ରାଉଣ୍ଡରେ ଆରମ୍ଭ ହୋଇଛି। ଏହି ମ୍ୟାଚ୍ରେ ବର୍ଷା ଯୋଗୁ ଖେଳକୁ କିଛି ସମୟ ପାଇଁ ରୋକାଯାଇଛି। ପ୍ରଥମେ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିବା ନ୍ୟୁଜିଲାଣ୍ଡ ବୋଲର୍ ଭାରତର ବ୍ୟାଟ୍ସମ୍ୟାନ୍ଙ୍କୁ କାବୁ କରିବାରେ ସକ୍ଷମ ହୋଇଛନ୍ତି। ଭାରତର ଅଧା ବ୍ୟାଟ୍ସମ୍ୟାନ୍ କ୍ରିଜରୁ ଫେରିଥିବାବେଳେ ବର୍ଷା ବାଧକ ସାଜିଛି। ପ୍ରଥମେ ବ୍ୟାଟିଂ କରୁଥିବା ମାତ୍ର ୧୧୧ ରନ୍ ସ୍କୋରରେ ଅଧା ଟିମ୍ ଆଉଟ୍ ହୋଇଛନ୍ତି। ଅଜିଙ୍କେ ରାହାଣେ(୩୮) ଏବଂ ଋଷଭ ପନ୍ତ(୧୦) ରନ୍ କରି କ୍ରିଜ୍ରେ ଅଛନ୍ତି। ପ୍ରାରମ୍ଭରୁ ଟିମ୍ ସାଉଦି, ବୋଲ୍ଟ ଏବଂ ଜ୍ୟାମିସନ୍ଙ୍କ ଘାତକ ବୋଲିଂ ଯୋଗୁ ଭାରତୀୟ ବ୍ୟାଟ୍ସମ୍ୟାନ୍ ଅଧିକ ସମୟ କ୍ରିଜରେ ରହିପାରି ନ ଥିଲେ। ପୃଥ୍ବୀ ଶ’ ୧୬, ଚେତେଶ୍ୱର ପୂଜାରା ୧୧, ବିରାଟ କୋହଲି ମାତ୍ର ୨ ରନ୍ କରିଥିଲେ। ସେହିପରି ମୟଙ୍କ ଅଗ୍ରଓ୍ବାଲ ୩୪ ଏବଂ ହନୁମା ବିହାରୀ ୭ ରନ୍ କରି ଆଉଟ୍ ହୋଇଥିଲେ।
