ନୂଆଦିଲ୍ଲୀ,୨।୬: ଜୁନ୍ ପହିଲାରୁ ‘ଓ୍ବାନ୍ ନେଶନ ଓ୍ବାନ୍ ରାଶନ କାର୍ଡ’ ଯୋଜନାରେ ଓଡ଼ିଶା ସମେତ ସିକିମ ଏବଂ ମିଜୋରାମ ଭଳି ଆଉ ୩ ରାଜ୍ୟ ସାମିଲ ହୋଇଛନ୍ତି। ଫଳରେ ଉକ୍ତ ଯୋଜନାରେ ଯୋଗଦେଇଥିବା ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡିକର ସଂଖ୍ୟା ୨୦ ଛୁଇଁଥିବା କେନ୍ଦ୍ର ଖାଉଟି ବ୍ୟାପାର ମନ୍ତ୍ରୀ ରାମବିଳାସ ପାଶ୍ୱାନ ସୋମବାର ସୂଚନା ଦେଇଛନ୍ତି। ଅଗଷ୍ଟ ସୁଦ୍ଧା ଉତ୍ତରାଖଣ୍ଡ, ନାଗାଲାଣ୍ଡ ଏବଂ ମଣିପୁର ଏଥିରେ ସାମିଲ ହେବେ। ଜାତୀୟ ଖାଦ୍ୟ ସୁରକ୍ଷା ଆଇନ(ଏନ୍ଏଫ୍ଏସ୍ଏ)ରେ ଏହି ଯୋଜନା ଅନ୍ତର୍ଗତ ଦେଶର ଯେକୌଣସି ସ୍ଥାନରେ ରହିଲେ ମଧ୍ୟ ଗୋଟିଏ ରାଶନ କାର୍ଡରେ ରାଶନ ସାମଗ୍ରୀ ଉଠାଇ ହେବ। ମାର୍ଚ୍ଚ ୨୦୨୧ ପରଠାରୁ ଏହାକୁ ସାରା ଦେଶରେ ଲାଗୁ କରାଇବାକୁ ଯୋଜନା ରଖାଯାଇଛି। ଏଥିଲାଗି ବର୍ତ୍ତମାନ ଭିତ୍ତିଭୂମିକୁ ବିକଶିତ କରାଯାଉଛି। ଇଲେକ୍ଟ୍ରୋନିକ୍ସ ପଏଣ୍ଟ ଅଫ୍ ସେଲ୍ ସଫ୍ଟଓ୍ବେର, ପିଡିଏସ୍ ସିଷ୍ଟମକୁ ସେଣ୍ଟ୍ରାଲ ଇଣ୍ଟିଗ୍ରେଟେଡ୍ ମ୍ୟାନେଜମେଣ୍ଟ ସିଷ୍ଟମ ସହ ସମନ୍ବିତ କରିବା, ଅନ୍ନ ବିତରଣ ପୋର୍ଟାଲ, ସେଣ୍ଟ୍ରାଲ ରିପୋଜିଟୋରିରେ ହିତାଧିକାରୀଙ୍କ ଡାଟା ଭଳି ବିଭିନ୍ନ ଯୋଜନା ଉପରେ ବର୍ତ୍ତମାନ ବିଭିନ୍ନ କାର୍ଯ୍ୟକ୍ରମ ଜାରି ରହିଛି।
