ମଣ୍ଟ୍ରିଲ, ୨୨ା୩ (ଏଏଫ୍ପି)-କରୋନା ଭାଇରସ୍ ଜନିତ ସମସ୍ୟା କାରଣରୁ ଓ୍ବାଲର୍ଡ ଆଣ୍ଟି ଡୋପିଂ ଏଜେନ୍ସି (ଓ୍ବାଡା) ପକ୍ଷରୁ ନୂଆ ଗାଇଡ୍ ଲାଇନ୍ ଜାରି କରାଯାଇଛି। ବିଶେଷ କରି ୨୦୨୦ ଟୋକିଓ ଅଲିମ୍ପିକ ଓ ପାରା ଅଲିମ୍ପିକ ଗେମ୍ସରେ ଭାଗ ନେବାକୁ ଥିବା ଆଥଲେଟ୍ ମାନଙ୍କର ଯେପରି ଡୋପ୍ ଟେଷ୍ଟ ହୋଇ ପାରିବ ସେ ନେଇ ସ୍ଥାନୀୟ ସ୍ବାସ୍ଥ୍ୟ କର୍ତ୍ତୃପକ୍ଷଙ୍କ ସହଯୋଗ ଲୋଡାଯାଇଛି। ଆଥଲେଟ୍ ଓ ଡୋପିଂ କଣ୍ଟ୍ରୋଲ କର୍ମଚାରୀଙ୍କୁ ସୁରକ୍ଷିତ ସ୍ଥାନ ଏବଂ ଅବାଶ୍ୟକ ସୁରକ୍ଷା ଯୋଗାଇ ଦେବାକୁ କୁହାଯାଇଛି। ଆଥଲେଟଙ୍କ ନିକଟରେ କରୋନା ଭାଇରସ ଆକ୍ରାନ୍ତର କୌଣସି ଲକ୍ଷଣ ସୂଚନା ମିଳୁଥିଲେ ସାମ୍ପଲ ସଂଗ୍ରହକାରୀଙ୍କୁ ତୁରନ୍ତ ଜଣାଇବା ଉଚିତ୍। ଯେଉଁ ଆଥଲେଟଙ୍କ ଡାକ୍ତରୀ ପରୀକ୍ଷା ହେବ ସେ ସମ୍ପର୍କିତ ଖବର ସମ୍ପୃକ୍ତ କର୍ତ୍ତୃପକ୍ଷଙ୍କୁ ଅବଗତ କରିବାକୁ ହେବ ବୋଲି ଓ୍ବାଡା କହିଛି। କାର୍ଯ୍ୟସ୍ଥଳକୁ ସଂକ୍ରମଣମୁକ୍ତ କରାଯିବା ଦରକାର। ସତର୍କତାମୂଳକ ପଦକ୍ଷେପ ସ୍ବରୂପ ମାସ୍କ ବ୍ୟବହାରକୁ ଗୁରୁତ୍ୱ ଦିଆଯାଇଛି। ଯଦି କୌଣସି ସ୍ଥାନରେ ଟେଷ୍ଟିଂ ପ୍ରୋଗ୍ରାମ ଜାରି ରଖିବା ଅସମ୍ଭବ ମନେ ହୁଏ ଏକ୍ଷେତ୍ରରେ ଅନ୍ୟ ଆଣ୍ଟି ଡୋପିଂ ସଂଗଠନ ଓ କ୍ରୀଡ଼ା ମହାସଂଘଗୁଡ଼ିକ ଏକତ୍ର କାର୍ଯ୍ୟ କରିବା ଉଚିତ ବୋଲି ଓ୍ବାଡା ପ୍ରକାଶ କରିଛି।
