ନୂଆପଡା ଅଫିସ,୨୩ା୮ – ଓଡ଼ିଶା-ଛତିଶଗଡ଼ ସୀମାନ୍ତ ନୂଆପଡା ଜିଲା ସୁନାବେଡା ଅଭୟାରଣ୍ୟରେ ବ୍ୟାଘ୍ର ଭଳି ମୂଲ୍ୟବାନ ଜନ୍ତୁମାନେ ସୁରକ୍ଷିତ ଭାବେ ରହିଥିବାବେଳେ ଏହାକୁ ବ୍ୟାଘ୍ର ପ୍ରକଳ୍ପ ଭାବେ ଘୋଷଣା କରିବାକୁ ସରକାର ପ୍ରସ୍ତୁତି କରୁଛନ୍ତି । ବ୍ୟାଘ୍ର ପ୍ରକଳ୍ପ ପାଇଁ ଏଠାରେ ଆବଶ୍ୟକ ଭିତିଭୂମି ରହିଛି ବୋଲି ମତ ପ୍ରକାଶ ପାଇଛି। ଗୁରୁବାର ଏଠାରେ ଦୁଇ ରାଜ୍ୟର ବନ୍ୟପ୍ରାଣୀ ବିଭାଗର ସମନ୍ବୟ ବୈଠକରେ ଯୋଗଦେଇ ବରିଷ୍ଠ ଅଧିକାରୀମାନେ ମତ ରଖିଛନ୍ତି।
ପୂର୍ବାହ୍ନ ୧୦ଟାରେ ସ୍ଥାନୀୟ ଜିଲାପାଳଙ୍କ ସଦ୍ଭାବନା ସଭାଗୃହରେ ଆୟୋଜିତ ବୈଠକରେ ଏନଟିସିଏ (ନ୍ୟାଶନାଲ ଟାଇଗର କରଜରଭେସନ ଅଥରିଟି) ଏଡିସନାଲ ଡାଇରେକ୍ଟର ଜେନେରାଲ ଡ.ଅନୁପ କୁମାର ନାୟକ ସଭାପତିତ୍ୱ କରିଥିବାବେଳେ ପିସିସିଏଫ (ଓଡିଶା) ଶଶି ପାଲ, ପିସିସିଏଫ (ଛତିଶଗଡ) ଜେ.ଏ.ସି.ଏସ ରାଓ, ଡେପୁଟି ଇନ୍ସପେକ୍ଟର ଜେନେରାଲ ଫରେଷ୍ଟ ସୁରେନ୍ଦର ମେହରା, କାମଡି ହେମନ୍ତ ଭାସ୍କର, ଉଦନ୍ତୀ- ସୀତାନଦୀ ଟାଇଗର ରିଜର୍ଭ ଫିଲ୍ଡ ଡାଇରେକ୍ଟର କେ.କେ. ବିଶେନ, ଆରସିସିଏଫ ଭବାନୀପାଟଣା ଅଭିରାମ ନାଏକ, ଛତିଶଗଡର ଚିଫ ୱାଇଲ୍ଡ ଲାଇଫ ୱାଡେନ ଅତୁଲ ସୁକ୍ଲା, ରାୟପୁର ସିସିଏଫ ସଙ୍ଗୀତା ପ୍ରମୁଖ ଯୋଗଦେଇଥିଲେ । ଏଥିରେ ନୂଆପଡା ସମେତ ଆଖପାଖ ବରଗଡ ଏବଂ ବଲାଙ୍ଗୀର ଜିଲାର ସମସ୍ତ ବନବିଭାଗର ଅଧିକାରୀମାନେ ଯୋଗଦେଇଥିଲେ। ସୂଚନାଯୋଗ୍ୟ ଯେ, ନୂଆପଡା ଜିଲା ସମୁଦ୍ର ପତନରୁ ୩ ହଜାର ଫୁଟ ଉଚ୍ଚରେ ଅବସ୍ଥିତ। ୬ଶହ ବର୍ଗ କି.ମି. ଦୂର ପରିବ୍ୟାପ୍ତ ସୁନାବେଡାକୁ ସରକାର ୧୯୮୮ରେ ଅଭୟାରଣ୍ୟର ମାନ୍ୟତା ଦେଇଥିବାବେଳେ ବର୍ତ୍ତମାନ ଏଠାରେ ବାଘମାନଙ୍କର ସୁରକ୍ଷା ଦୃଷ୍ଟି କୋଣରୁ ଏହାକୁ ବ୍ୟାଘ୍ର ପ୍ରକଳ୍ପର ମାନ୍ୟତା ଦେବାକୁ ପ୍ରକ୍ରିୟା ଆରମ୍ଭ କରିଛନ୍ତି । ଏହାକୁ ଲାଗି ଛତିଶଗଡର ଉଦନ୍ତୀ ଏବଂ ସୀତା ନଦୀ ବ୍ୟାଘ୍ର ପ୍ରକଳ୍ପ ରହିଛି। ଏଥିପାଇଁ ଦୁଇ ରାଜ୍ୟର ସମନ୍ବୟ ଆବଶ୍ୟକ ରହିଛି ବୋଲି ଅଧିକାରୀମାନେ କହିଥିଲେ । ପୂର୍ବରୁ ନବେ ଦଶକରେ ହୋଇଥିବା ସର୍ଭେ ଅନୁଯାୟୀ ଏଠାରେ ୩୨ଟି ମହାବଳ ବାଘ ଏବଂ ୩୬ଟି କଲରାପତରିଆ ବାଘ ରହିଥିବା କୁହାଯାଉଥିଲା। ଏବେ ଏହା ଧୀରେ ଧୀରେ କମିବାରେ ଲାଗିଥିବା ପରବର୍ତ୍ତି ରିପୋର୍ଟରେ ପରିଲକ୍ଷିତ ହୋଇଛି । ଏଥିପାଇଁ ସରକାରୀସ୍ତରରେ ତପତ୍ରତା ଆବଶ୍ୟକ ରହିଛି । ଅନ୍ୟପକ୍ଷେ ବ୍ୟାଘ୍ର ପ୍ରକଳ୍ପ ହେଲେ ନୂଆପଡା ସମେତ ଆଖପାଖ ଅଞ୍ଚଳର ଆର୍ଥତ୍କ ସ୍ଥିତିରେ ପ୍ରଗତି ଆସିବ। ଏହା ସାରା ଦେଶର ଏକ ମୁଖ୍ୟ କେନ୍ଦ୍ରବିନ୍ଦୁ ହୋଇ ରହିବ । ବୈଠକରେ ଏକ ରିପୋର୍ଟ ପ୍ରସ୍ତୁତ ହୋଇ କେନ୍ଦ୍ର ସରକାରଙ୍କ ବିଭାଗୀୟ ଦପ୍ତରକୁ ପଠାଇବା ଯୋଜନା ରହିଥିବା କୁହାଯାଇଛି । ବୈଠକକୁ ସୁନାବେଡା ବନ୍ୟପ୍ରାଣୀ ବିଭାଗର ଅଧିକାରୀମାନେ ପରିଚାଳନା କରିଥିଲେ।
