ମୁମ୍ବାଇ, ୨୦।୬- ଭାରତୀୟ କ୍ରିକେଟ୍ ଦଳର ଯୁବ ଓପନିଂ ବ୍ୟାଟ୍ସମ୍ୟାନ ପୃଥ୍ବୀ ଶ ୨୦୧୮ରେ ଜାତୀୟ ଦଳରେ ପଦାର୍ପଣ କରିବା ପୂର୍ବରୁ ଖବରର ଶିରୋନାମାରେ ରହିଥିଲେ। ୨୦୧୪ରେ ତାଙ୍କୁ ଯେତେବେଳେ ମାତ୍ର ୧୪ ବର୍ଷ ହୋଇଥିବା ସ୍କୁଲସ୍ତରୀୟ ଏକ କ୍ରିକେଟ୍ ପ୍ରତିଯୋଗିତାରେ ପୃଥ୍ବୀ ୫୪୬ ରନର ମାରାଥନ ଇନିଂସ ଖେଳି ଚର୍ଚ୍ଚାକୁ ଆସିଥିଲେ। ଏହି ବିଶାଳ ଇନିଂସ ମଧ୍ୟରେ ସେ ୮୫ ଚୌକା ଓ ୫ଟି ଛକା ମାରିଥିଲେ। ତେବେ ନିକଟରେ ଏକ ସାକ୍ଷାତ୍କାର ଅବସରେ ୨୦ ବର୍ଷୀୟ ପୃଥ୍ବୀ ଏକ ରୋଚକ ଘଟଣା ସାମ୍ନାକୁ ଆଣିଛନ୍ତି। ପୃଥ୍ବୀ କହିଛନ୍ତି, ତାଙ୍କୁ ଯେତେବେଳେ ମାତ୍ର ୮ ବର୍ଷ ହୋଇଥିଲା ସେତେବେଳେ କିମ୍ବଦନ୍ତୀ ଭାରତୀୟ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର ଏକ ବ୍ୟାଟ୍ ଗିଫ୍ଟ କରିଥିଲେ। ଏଥିସହ ମୋର ଭବିଷ୍ୟତ ପାଇଁ ଶୁଭକାମନା କରିଥିଲେ। ୨୦୦୮ ମସିହାର ଏହି ଘଟଣାକୁ ମନେ ପକାଇ ପୃଥ୍ବୀ କହିଛନ୍ତି ‘ମୁମ୍ବାଇର ଏମ୍ଆଇଜି କ୍ରିକେଟ୍ ଏକାଡେମୀରେ ଅଭ୍ୟାସ କରୁଥିବାବେଳେ ସଚିନ ଥରେ ସେଠାକୁ ବୁଲିବାକୁ ଆସିଥିଲେ। ସେତେବେଳେ ମୋତେ ୮ ବର୍ଷ ହୋଇଥିଲା। ଦୂରରୁ ଥାଇ ସେ ମୋ ଖେଳକୁ ଦେଖୁଥିଲେ। କିନ୍ତୁ ସେତେବେଳେ ପର୍ଯ୍ୟନ୍ତ ମୁଁ ଏକଥା ଜାଣି ନ ଥାଏ। ମୋ ଖେଳରେ ସଚିନ ଏତେମାତ୍ରାରେ ପ୍ରଭାବିତ ହୋଇଯାଇଥିଲେ ଯେ ଗିଫ୍ଟ ଆକାରରେ ଏକ ବ୍ୟାଟ୍ ପ୍ରଦାନ କରିଥିଲେ। ଏହାସହ ମୋତେ କହିଥିଲେ ତୁମେ ଏହି ବ୍ୟାଟରେ ଅନେକ ରନ୍ ସଂଗ୍ରହ କରିବ। ଏହି ଘଟଣାରେ ମୁଁ ଭାବବିହ୍ବଳ ହୋଇଯାଇଥିଲି’ ବୋଲି ପୃଥ୍ବୀ ସାକ୍ଷାତ୍କାରରେ ପ୍ରକାଶ କରିଛନ୍ତି। ୨୦୧୮ରେ ଓ୍ବେଷ୍ଟଇଣ୍ଡିଜ ବିପକ୍ଷ ଟେଷ୍ଟ ମ୍ୟାଚ୍ ଖେଳି ପୃଥ୍ବୀ ତାଙ୍କ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ବର୍ତ୍ତମାନ ସୁଦ୍ଧା ସେ ଜାତୀୟ ଦଳ ପକ୍ଷରୁ ୪ ଟେଷ୍ଟ ଓ ୩ ଦିନିକିଆ ମ୍ୟାଚ୍ ଖେଳିସାରିଛନ୍ତି।
