ନୂଆଦିଲ୍ଲୀ, ୨୮ା୮(ପି.ଟି.): ନିୟନ୍ତ୍ରଣ ରେଖା ନିକଟରେ ପାକିସ୍ତାନର ଶତାଧିକ ଏସ୍ଏସ୍ଜି କମାଣ୍ଡୋଙ୍କୁ ମୁତୟନ କରାଯାଇଛି। ଭାରତୀୟ ସେନାର କାର୍ଯ୍ୟାନୁଷ୍ଠାନକୁ ପ୍ରତିହତ କରିବା ଲାଗି ପାକିସ୍ତାନ ପ୍ରସ୍ତୁତି ଚଳାଇଥିବା କୁହାଯାଉଛି। ଭାରତୀୟ ସେନା ଏଥିପ୍ରତି ସତର୍କ ରହିଥିବାବେଳେ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛି। ଜୈଶ-ଇ ମହମ୍ମଦ ଓ ଅନ୍ୟ ଆତଙ୍କବାଦୀ ଗୋଷ୍ଠୀ ସହ ମିଶି ଏହି ଏସ୍ଏସ୍ଜି କମାଣ୍ଡୋମାନେ ଗୁପ୍ତ ମନ୍ତ୍ରଣା ଚଳାଇଥିବା କୁହାଯାଉଛି। ନିୟନ୍ତ୍ରଣ ରେଖା ନିକଟରେ ପାକିସ୍ତାନୀ ସେନାର ଏସ୍ଏସ୍ଜି କମାଣ୍ଡୋମାନେ ଅସ୍ତ୍ରବିରତି ଉଲ୍ଲଂଘନ କରିବା ସହ ବିଭିନ୍ନ ହିଂସାତ୍ମକ କାର୍ଯ୍ୟକଳାପ ଚଳାଇ ଆସୁଥିବା ଅଭିଯୋଗ ହୋଇଛି। ଗୁଜରାଟ ସୀମାନ୍ତ ସାର୍ କ୍ରିକ୍ ଅଞ୍ଚଳରେ ଏମାନେ ମେଳି ବାନ୍ଧି ଚକ୍ରାନ୍ତ କରୁଥିବା ଜଣାପଡ଼ିଛି।
ରିପୋର୍ଟ ମୁତାବକ ୧୨ ଆଫଗାନ ଜେହାଦୀଙ୍କୁ ଜେଇଏମ୍ ଲୀପା ଉପତ୍ୟାକାରେ ମୁତୟନ କରିଛି। ଜେଇଏମ୍ ମୁଖ୍ୟ ମାସୁଦ ଆଝାରଙ୍କ ଭାଇ ରୌଫ୍ ଆଝାର ଗତ ୬ ଦିନ ତଳେ ବାହାଓ୍ବଲପୁରଠାରେ ଆତଙ୍କବାଦୀ କମାଣ୍ଡରଙ୍କ ସହ ବୈଠକ କରିଥିଲେ। ସୀମାରେ ଆତଙ୍କବାଦୀମାନେ ପ୍ରସ୍ତୁତ ରହିବା ସହ ଭାରତୀୟ ସହରରେ ବିସ୍ଫୋରଣ କରିବା ଲାଗି ପ୍ରସ୍ତୁତି କରାଯାଉଛି। ପାକିସ୍ତାନ ଏଜେନ୍ସିଗୁଡ଼ିକ ଭାରତୀୟ ସୁରକ୍ଷା କର୍ମୀଙ୍କୁ ଟକ୍କର ଦେବା ଲାଗି ଆଫଗାନ୍ ଆତଙ୍କବାଦୀଙ୍କୁ ନିଯୁକ୍ତି ଦେଉଥିବା ଜଣାପଡ଼ିଛି। ସମ୍ବିଧାନର ଧାରା ୩୭୦ ଉଚ୍ଛେଦ ସହ ଜମ୍ମୁ-କଶ୍ମୀରକୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ବିଭକ୍ତ କରାଯିବା ପରେ ପାକିସ୍ତାନ ରକ୍ତଚାଉଳ ଚୋବାଉଛି। କଶ୍ମୀରକୁ ନେଇ ବିଶ୍ୱର ବିଭିନ୍ନ ନେତାଙ୍କ ସହଯୋଗ ଲୋଡ଼ି ହତାଶ ହେବା ପରେ ଏବେ ଆତଙ୍କବାଦକୁ ପ୍ରୋତ୍ସାହନ ଦେଇ ଭାରତ ବିରୋଧରେ ଯୁଦ୍ଧଂ ଦେହି ଡାକରା ଦେଇଛି।
