ନୂଆଦିଲ୍ଲୀ,୨୭।୪: ରାଜଧାନୀ ଦିଲ୍ଲୀସ୍ଥିତ ଅଲ୍ ଇଣ୍ଡିଆ ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇନସେସ୍(ଏମ୍ସ) ଏବେ କରୋନା ସଂକ୍ରମଣର ହଟ୍ସ୍ପଟ ହେବାକୁ ଯାଉଛି ବୋଲି କୁହାଯାଉଛି। ଅନ୍ୟପଟେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡାକ୍ତର ହର୍ଷ ବର୍ଦ୍ଧନଙ୍କ ଓଏସ୍ଡି(ଅଫିସର ଅନ୍ ସ୍ପେଶାଲ ଡ୍ୟୁଟି) କାର୍ଯ୍ୟାଳୟରେ କାର୍ଯ୍ୟରତ ଜଣେ କର୍ମଚାରୀ ଓ କ୍ୟାନସର ସେଣ୍ଟରର ଜଣେ ନର୍ସ କରୋନାରେ ସଂକ୍ରମିତ ହୋଇଛନ୍ତି। ଫଳରେ ଓଏସ୍ଡିଙ୍କ ସମେତ ପାଖାପାଖି ୬୦ କର୍ମଚାରୀଙ୍କୁ କ୍ୱାରାଣ୍ଟାଇନକୁ ପଠାଇ ଦିଆଯାଇଛି। ଅନ୍ୟପଟେ କ୍ୟାନସର ସେଣ୍ଟରର କେତେଜଣ ଡାକ୍ତର ଓ ରୋଗୀଙ୍କୁ ମଧ୍ୟ କ୍ୱାରାଣ୍ଟାଇନକୁ ପଠାଇ ଦିଆଯାଇଛି। ସୂଚନାଯୋଗ୍ୟ, ଓଏସ୍ଡିଙ୍କ କାର୍ଯ୍ୟାଳୟ ଏମ୍ସର ନିର୍ଦ୍ଦେଶକ ଓ ଉପ ନିର୍ଦ୍ଦେଶକ(ପ୍ରଶାସନିକ)ଙ୍କ କାର୍ଯ୍ୟାଳୟ ପାଖାପାଖି ଅବସ୍ଥିତ। ଯେଉଁଠି ପ୍ରତିଦିନ ଡାକ୍ତର ଓ କର୍ମଚାରୀଙ୍କ ଯିବା ଆସିବା ଲାଗି ରହିଥାଏ। ସେପଟେ ଏମ୍ସର ପଜିଟିଭ ମିଳିଥିବା ନର୍ସଙ୍କ ୨ ସନ୍ତାନ ମଧ୍ୟ କରୋନାରେ ପୀଡ଼ିତ ହେବା ପରେ ଏମାନଙ୍କୁ ହସ୍ପିଟାଲର ଆଇସୋଲେଶନରେ ରଖାଯାଇଛି। ବଡ କଥା ହେଲା ନର୍ସ ଜଣଙ୍କ ଡେ-କେୟାରରେ ଡ୍ୟୁଟି କରୁଥିବା ବେଳେ ସେଠାରେ କେମୋ ଥେରାପି ନେଉଥିବା ୪୦ ଜଣ କ୍ୟାନସର ରୋଗୀଙ୍କୁ ଏବେ କ୍ୱାରାଣ୍ଟାଇନକୁ ପଠାଯାଇଛି। ପୂର୍ବରୁ ଏମ୍ସର ଜଣେ ଡାକ୍ତର, ୨ ନର୍ସ, ଜଣେ ପୁରୁଷ ନର୍ସ, ଟ୍ରମା ସେଣ୍ଟରର ୨ କର୍ମଚାରୀ ଓ ଜଣେ ଟେକ୍ନିସିଆନ ସମେତ ୮ ଜଣ କରୋନାରେ ପୀଡିତ ହୋଇସାରିଛନ୍ତି। ଦିନକୁ ଦିନ ଏମ୍ସରେ ସଂକ୍ରମିତ ସ୍ବାସ୍ଥ୍ୟକର୍ମୀଙ୍କ ସଂଖ୍ୟା ବଢି ଚାଲିଥିବାରୁ ଏହା ସମସ୍ତଙ୍କ ଚିନ୍ତା ବଢାଇ ଦେଇଛି। ଦିଲ୍ଲୀର ବଡ ହସ୍ପିଟାଲରେ ପାଖାପାଖି ୩୩ ଜଣ ଡାକ୍ତର ଓ ୮୪ ସ୍ବାସ୍ଥ୍ୟକର୍ମୀ କରୋନା ସଂକ୍ରମିତ ହେବା ପରେ ଏହାର ଚିକିତ୍ସାକୁ ନେଇ ସମସ୍ୟା ଉପୁଜିପାରେ ବୋଲି କୁହାଯାଉଛି।
