ଭୁବନେଶ୍ୱର,୨୧ା୧୦(ବ୍ୟୁରୋ) : ଅଭିଯୋଗ ପରେ ଏଫ୍ଆଇଆର୍ ପଞ୍ଜୀକରଣ କରି ନ ଥିଲା କେନ୍ଦ୍ରାପଡା ଜିଲା ଡେରାବିଶ ଥାନା ପୋଲିସ। ଏ ସଂକ୍ରାନ୍ତ ପିଟିଶନର ବିଚାର କରି ରାଜ୍ୟ ମାନବିକ ଅଧିକାର କମିଶନ(ଓଏଚ୍ଆରସି) ତତ୍କାଳୀନ ଥାନାଧିକାରୀଙ୍କୁ ଦାୟୀ କରି ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗୃହ ବିଭାଗ ଓ ପୋଲିସ ଡିଜିଙ୍କୁ ନିର୍ଦ୍ଦେଶ ଦେଇଛନ୍ତି। ଏଥିସହ ଅଭିଯୋଗକାରିଣୀ ମିତା ଜେନାଙ୍କୁ ୫୦ ହଜାର କ୍ଷତିପୂରଣ ଦେବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି।
ମିଳିଥିବା ସୂଚନାନୁଯାୟୀ, ୨୦୧୭ ସେପ୍ଟେମ୍ବର ୨୭ରେ ମିତାଙ୍କ ସ୍ବାମୀ ରାମଚନ୍ଦ୍ର ଜେନା ଏକ ଅପରାଧ ଘଟଣାକୁ ନେଇ ଡେରାବିଶ ଥାନାକୁ ଯାଇଥିଲେ। କିନ୍ତୁ ପୋଲିସ ତାଙ୍କ ଅଭିଯୋଗକୁ ଗ୍ରହଣ ନ କରି ଫେରାଇଦେଇଥିଲା। ଏନେଇ ରାମଚନ୍ଦ୍ର ଡାକଯୋଗେ ତାଙ୍କ ଅଭିଯୋଗକୁ କେନ୍ଦ୍ରାପଡା ଏସ୍ପିଙ୍କ ନିକଟକୁ ପଠାଇ ଦେଇଥିଲେ। ଏସ୍ପି ଉକ୍ତ ଅଭିଯୋଗକୁ ତତ୍କାଳୀନ ଡେରାବିଶ ଥାନା ଅଧିକାରୀ ସୁଧୀର କୁମାର ସାହୁଙ୍କ ନିକଟକୁ ପଠାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ। ମାତ୍ର ଥାନାଧିକାରୀ ଏକ ମିଥ୍ୟା ରିପୋର୍ଟ ଏସ୍ପିଙ୍କୁ ପ୍ରଦାନ କରି ଅଭିଯୋଗକୁ ପଞ୍ଜୀକୃତ କରି ନ ଥିଲେ। ଏନେଇ ରାମଚନ୍ଦ୍ରଙ୍କ ସ୍ତ୍ରୀ ମିତା ଓଏଚ୍ଆର୍ସିଙ୍କ ଦ୍ୱାରସ୍ଥ ହୋଇଥିଲେ। କମିଶନ କେନ୍ଦ୍ରାପଡା ଏସ୍ପିଙ୍କୁ ଏନେଇ ରିପୋର୍ଟ ମାଗିବା ପରେ ୨୦୧୯ ମାର୍ଚ୍ଚ ୩ରେ ଏକ ଅଭିଯୋଗ ପଞ୍ଜୀକୃତ ହୋଇଥିଲା।
