ଏନ୍‌ଟିପିସି ଡାକ୍ତରଙ୍କ ପ୍ରସ୍ତାବ ଉପରେ ମୋହର : ଗ୍ରହଣଖଣ୍ଡିଆ ରୋଗୀ ଯିବେ ହାଇଦ୍ରାବାଦ
7:01 amJuly 14, 2019June 5, 2020 / 21

ଅନୁଗୋଳ ଅଫିସ, ୧୪।୭ – ଅନୁଗୋଳ ଜିଲାରେ ଥିବା ଗ୍ରହଣଖଣ୍ଡିଆ ଓ ଅଗ୍ନି ବିକଳାଙ୍ଗ ରୋଗୀଙ୍କ ପ୍ଲାଷ୍ଟିକ ସର୍ଜରୀ ଚିକିତ୍ସା ହାଇଦ୍ରାବାଦରେ କରାଯିବ। ସେଠାରେ ମାଗଣା ଚିକିତ୍ସାସେବା ଉପଲବ୍ଧ ହେଉଥିବାରୁ ଏହାର ସୁଯୋଗ ଅନୁଗୋଳର ରୋଗୀଙ୍କୁ ଦେବାକୁ କଣିହଁାସ୍ଥିତ ଏନ୍‌ଟିପିସି ଡାକ୍ତରଖାନାର ଜଣେ ଡାକ୍ତର ପ୍ରସ୍ତାବ ଦେଇଥିଲେ। ଏହା ଉପରେ ଜିଲା ମୁଖ୍ୟ ଚିକିତ୍ସାଧିକାରୀ (ସିଡିଏମ୍‌ଓ) ପ୍ରତାପ କୁମାର ବେହେରା ମୋହର ମାରିବା ସହ ଏ ନେଇ ପ୍ରକ୍ରିୟା ଆରମ୍ଭ କରିଥିବା ସୂଚନା ମିଳିଛି।
ସିଡିଏମ୍‌ଓଙ୍କ କହିବା ଅନୁଯାୟୀ, ଜିଲାରେ ଥିବା ଗ୍ରହଣଖଣ୍ଡିଆ ଓ ପୋଡ଼ିଯାଇ ବିକଳାଙ୍ଗ ହୋଇଥିବା ବ୍ୟକ୍ତିଙ୍କ ପ୍ଲାଷ୍ଟିକ ସର୍ଜରୀ ଚିକିତ୍ସା ହାଇଦ୍ରାବାଦରେ ମାଗଣାରେ କରାଯିବାକୁ ଏକ ପ୍ରସ୍ତାବ ମିଳିବା ପରେ ଜିଲାରେ ଥିବା ୮ଟି ବ୍ଲକର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ରୋଗୀ ଚିହ୍ନଟ ନିମନ୍ତେ ନିର୍ଦ୍ଦେଶ ଦିଆଯାଇଛି। କଣିହଁା, ପାଲଲହଡ଼ାର ରୋଗୀଙ୍କ ଚିହ୍ନଟ ପ୍ରକ୍ରିୟା କଣିହଁାରେ କରାଯିବ। ଛେଣ୍ଡିପଦା, ଆଠମଲ୍ଲିକ ଓ କିଶୋରନଗର ରୋଗୀଙ୍କୁ ବଇଣ୍ଡାରେ ଚିହ୍ନଟ କରାଯିବ। ତାଳଚେରରେ ତାଳଚେର ଓ ବଅଁରପାଳର ରୋଗୀଙ୍କୁ ଚିହ୍ନଟ କରାଯିବ। ଜିଲା ମୁଖ୍ୟ ଚିକିତ୍ସାଳୟରେ ଅନୁଗୋଳ ବ୍ଲକରେ ଥିବା ରୋଗୀଙ୍କୁ ଚିହ୍ନଟ କରାଯିବ। ରୋଗୀଙ୍କ ଚିହ୍ନଟ ସମ୍ପର୍କିତ ତାଲିକା ଜିଲା ମୁଖ୍ୟ ଚିକିତ୍ସାଳୟକୁ ପଠାଇବାକୁ ମଧ୍ୟ କୁହାଯାଇଛି। ଏହାପରେ ହାଇଦ୍ରାବାଦରୁ ଡାକ୍ତରମାନେ ଆସି ୪ ଦିନ ବିଭିନ୍ନ ସ୍ଥାନରେ ରୋଗୀଙ୍କ ଆବଶ୍ୟକ ସ୍ବାସ୍ଥ୍ୟ ପରୀକ୍ଷା କରିବେ। ପରେ ପ୍ରସ୍ତୁତ ତାଲିକାରୁ ରୋଗୀଙ୍କୁ ଚିହ୍ନଟ କରିବେ। ତାଲିକା ଚୂଡ଼ାନ୍ତ ହେବା ପରେ ଅଗଷ୍ଟ ମାସରେ ତାହାକୁ ସ୍କ୍ରୁଟିନି କରାଯିବ। ଏହାପରେ ସେପ୍ଟେମ୍ବରରେ ୩ଟି ପର୍ଯ୍ୟାୟରେ ଜିଲା ମୁଖ୍ୟ ଚିକିତ୍ସାଳୟର ଜଣେ ଡାକ୍ତର ରୋଗୀଙ୍କୁ ଧରି ହାଇଦ୍ରାବାଦ ଯିବେ। ଗୋଟିଏ ପର୍ଯ୍ୟାୟରେ ୩୦ରୁ ୩୫ ଜଣ ରୋଗୀଙ୍କୁ ହାଇଦ୍ରାବାଦ ପଠାଯିବ। ସେଠାରେ ରୋଗୀଙ୍କ ମାଗଣାରେ ଚିକିତ୍ସା କରାଯିବାକୁ ଥିବାବେଳେ ଯାତାୟାତ ଖର୍ଚ୍ଚ ଜିଲା ପ୍ରଶାସନ ବହନ କରିବ। ଏ ନେଇ ଫାଇଲ ଜିଲାପାଳଙ୍କ ନିକଟକୁ ଯାଇଥିବା ସିଡିଏମ୍‌ଓ କହିଛନ୍ତି।