ନୂଆଦିଲ୍ଲୀ, ୪6।୧୦- ଭ୍ରମଣକାରୀ ଦକ୍ଷିଣ ଆଫ୍ରିକା ମହିଳା କ୍ରିକେଟ୍ ଦଳ ବିପକ୍ଷ ୪ର୍ଥ ଟି୨୦ ମ୍ୟାଚ୍ରେ ଭାରତକୁ ଜିତାଇବାରେ ୧୫ ବର୍ଷୀୟା ଓପନର୍ ଶେଫାଳି ବର୍ମାଙ୍କ ଉଲ୍ଲେଖନୀୟ ଅବଦାନ ରହିଥିଲା। ଏହି ମ୍ୟାଚ୍ରେ ଶେଫାଳୀ ୩୩ ବଲରୁ ୪୬ ରନର ଦ୍ରୁତ ଇନିଂସ ଖେଳିଥିଲେ। ଡାହାଣହାତୀ ବ୍ୟାଟ୍ସଓମ୍ୟାନ ଶେଫାଳିଙ୍କ ଏହି ଇନିଂସ ଯୋଗୁ ଭାରତ ୫୧ ରନରେ ମ୍ୟାଚ୍କୁ ଜିତିନେଇଥିଲା। ରୋହତକ ଜନ୍ମିତ ଶେଫାଳୀଙ୍କ ଲାଗି ଏହା ଏକ ସ୍ବର୍ଣ୍ଣିମ ମୁହୂର୍ତ୍ତ ରହିଥିବାବେଳେ ତାଙ୍କ ବିଷୟରେ ଏକ ରୋଚକ ଖବର ଏବେ ସାମ୍ନାକୁ ଆସିଛି। କ୍ୟାରିୟର ଆରମ୍ଭରେ କ୍ରିକେଟ୍ ଏକାଡେମୀରେ ଖେଳିବା ପାଇଁ ଶେଫାଳିଙ୍କୁ ପୁଅଙ୍କ ଭଳି ଚୁଟି କାଟିବାକୁ ପଡ଼ିଥିଲା ବୋଲି ବାପା ସଞ୍ଜୀବ ବର୍ମା ଏକ ସାକ୍ଷାତକାର ଅବସରରେ କହିଛନ୍ତି। ରୋହତକରେ ବାଳିକାଙ୍କ ଲାଗି ଗୋଟିଏ ହେଲେ କ୍ରିକେଟ୍ ଏକାଡେମୀ ନ ଥିଲା। ତେଣୁ ଶେଫାଳିଙ୍କୁ ବାଳକ ଏକାଡେମୀରେ ଖେଳାଯାଇବା ପାଇଁ ତାଙ୍କ ବାପା ନିଷ୍ପତ୍ତି ନେଇଥିଲେ। ଏଥିଲାଗି ତାଙ୍କୁ ପୁଅଙ୍କ ଭଳି ଚୁଟି କାଟି ‘ବାଳକ’ ଭାବେ ଏକାଡେମୀରେ ଖେଳିବାକୁ ପଡ଼ିଥିଲା। ଶେଫାଳିଙ୍କୁ କାଳେ କିଏ ଚିହ୍ନି ଦେବ ଏହା ମଧ୍ୟ ସଞ୍ଜୀବଙ୍କ ମନରେ ଭୟ ରହିଥିଲା। କିନ୍ତୁ ସୌଭାଗ୍ୟବଶତଃ କେହି ମଧ୍ୟ ଏହା ଜାଣିପାରି ନ ଥିଲେ। ଶେଫାଳିଙ୍କ ଏହି ହେୟାର ଷ୍ଟାଇଲ ନିକଟରେ ଦକ୍ଷିଣ ଆଫ୍ରିକା ବିପକ୍ଷ ପଦାର୍ପଣ ମ୍ୟାଚ୍ରେ ଦେଖିବାକୁ ମିଳିଥିଲା। ଟି୨୦ କ୍ରିକେଟ୍ରୁ ବରିଷ୍ଠ ଖେଳାଳି ମିଥାଲି ରାଜଙ୍କ ଅବସର ପରେ ଶେଫାଳିଙ୍କୁ ଭାରତୀୟ ଦଳରୁ ଡାକରା ମିଳିଥିଲା।
