କେନ୍ଦୁଝର, ୩।୮ (ସ୍ବ.ପ୍ର./ଡି.ଏନ.ଏ.)- ରାଜ୍ୟ ବାହାରୁ ଭାରି ଯାନ ଅଣାଯାଇ କେନ୍ଦୁଝର ଜିଲାରେ ଖଣିଜ ଦ୍ରବ୍ୟ ପରିବହନ କରାଯାଉ ଥିବାରୁ ସ୍ଥାନୀୟ ଅଞ୍ଚଳର ଟ୍ରକ ମାଲିକମାନେ କ୍ଷତିଗ୍ରସ୍ତ ହେଉଛନ୍ତି। ଅଧିକ ସଂଖ୍ୟାରେ ଭାରିଯାନ ଚଳାଚଳ ଯୋଗୁ ରାସ୍ତା ଅବସ୍ଥା ଶୋଚନୀୟ ହେବା ସହ ପରିବେଶ ପ୍ରଦୂଷଣ ବୃଦ୍ଧି ପାଉଛି। ଖଣି ସଂସ୍ଥାର ଏଭଳି କାର୍ଯ୍ୟକୁ ବିରୋଧ କରି କେନ୍ଦୁଝର ଜିଲାର ଟ୍ରକମାଲିକମାନେ ମେଳି ବାନ୍ଧି ପ୍ରତିବାଦ ଜଣାଇଛନ୍ତି। କେନ୍ଦୁଝର ଜିଲା ଟ୍ରକ ମାଲିକ ସଂଘ ସମେତ ଯୋଡା ଟ୍ରକ ମାଲିକ ସଂଘ, ବଡବିଲ ଟ୍ରକ ମାଲିକ ସଂଘ, କୋଇଡା ଟ୍ରକ ମାଲିକ ସଂଘ, ମା ’ତାରିଣୀ ଟିପର ମାଲିକ ସଂଘ, ଯୋଡା ଓ ଗୁଆଲି ଟ୍ରକ ମାଲିକ ସଂଘର ଏକ ସମନ୍ବୟ ବୈଠକ ଶୁକ୍ରବାର ସ୍ଥାନୀୟ ଏକ ହୋଟେଲରେ ଅନୁଷ୍ଠିତ ହୋଇଥିଲା। କେନ୍ଦୁଝର ସଂଘର ସଭାପତି ରମାକାନ୍ତ ନାୟକ ଏଥିରେ ଅଧ୍ୟକ୍ଷତା କରିଥିଲେ। ପରେ ଆୟୋଜିତ ଏକ ମିଳିତ ଖବରଦାତା ସମ୍ମିଳନୀରେ ଜିଲାର ଟ୍ରକ ମାଲିକମାନେ ସାମ୍ନା କରୁଥିବା ବିଭିନ୍ନ ସମସ୍ୟା ସମ୍ପର୍କରେ ସଂଗଠନର କର୍ମକର୍ତ୍ତା ଅବଗତ କରାଇଥିଲେ ା
ସେମାନେ ଦର୍ଶାଇଥିଲେ ଯେ, ବାହାର ରାଜ୍ୟର ଗାଡି ଓ ଟ୍ରେଲର ଜିଲାକୁ ଅଣାଯାଇ ଏବେ ଲୁହାପଥର ପରିବହନ କରାଯାଉଛି। ଫଳରେ ସ୍ଥାନୀୟ ଟ୍ରକ ମାଲିକମାନେ କାମ ନ ପାଇ କ୍ଷତିଗ୍ରସ୍ତ ହେଉଛନ୍ତି। ସେହିପରି ଜିଲାରେ ବିଭିନ୍ନ ରାସ୍ତାରେ ଥିବା ଟୋଲ ଗେଟରୁ ଟୋଲ ଆଦାୟ କରାଯାଉଥିବାରୁ ଟ୍ରକ ଓ ଟିପର ଗାଡି ମାଲିକ ଅଧିକ ଖର୍ଚ୍ଚାନ୍ତ ହେଉଛନ୍ତି। ୨୦ ନମ୍ବର ଜାତୀୟ ରାଜପଥ ସମେତ ସର୍ଭିସ ରାସ୍ତାଗୁଡିକ ମରାମତି ଅଭାବରୁ ଦୁର୍ଘଟଣା ପ୍ରବଣ ହୋଇପଡିଛି। ଏଥିଲାଗି ଗାଡିର ବିଭିନ୍ନ ଯନ୍ତ୍ରାଂଶ ଭାଙ୍ଗୁଛି ା ଜିଲାର ସବୁ ଗାଡିକୁ ଟୋଲ ଦେୟ ମୁକ୍ତ କରିବା, ଲୁହାପଥର ପରିବହନ କରୁଥିବା ଟ୍ରକ ମାଲିକଙ୍କୁ ଉଚିତ ଭଡା ପ୍ରଦାନ ଏବଂ ରାସ୍ତା ମରାମତି ଦିଗରେ ସରକାର ପଦକ୍ଷେପ ନେବା ଉଚିତ। ଗୋଟିଏ ରାଜ୍ୟର ଗାଡି ଅନ୍ୟ ରାଜ୍ୟରେ ଚଳାଚଳ ଉପରେ କଟକଣା ରହିଥିବା ବେଳେ କେନ୍ଦୁଝର ଜିଲାରେ କିଭଳି ଏହାକୁ ଉଲ୍ଲଂଘନ କରାଯାଉଛି, ସେ ନେଇ ଖବରଦାତା ସମ୍ମିଳନୀରେ ପ୍ରଶ୍ନ ଉଠାଯାଇଥିଲା। ଏସବୁ ସମସ୍ୟାର ସମାଧାନ ଲାଗି ସରକାର ଓ ପ୍ରଶାସନ ଉପରେ ଚାପ ପକାଇବାକୁ ସମସ୍ତ ସଂଘକୁ ନେଇ ଏକ ସମନ୍ନୟ କମିଟି ଗଠନ କରାଯାଇଥିବା ସୂଚନା ଦିଆଯାଇଥିଲା। ଖବରଦାତା ସମ୍ମିଳନୀରେ ଅନ୍ୟ ମାନଙ୍କ ମଧ୍ୟରେ କେନ୍ଦୁଝର ସଂଘ ସଭାପତି ରମାକାନ୍ତ ନାୟକ, ସମ୍ପାଦକ ସୂର୍ଯ୍ୟ ନାରାୟଣ କର, ଯୁଗ୍ମ ସମ୍ପାଦକ ଦେବାଶିଷ ପଟ୍ଟନାୟକ, ବଡବିଲ ସଂଘର ସଭାପତି ତରଣୀସେନ ମହାପାତ୍ର, ଯୋଡା ସଂଘର ସମ୍ପାଦକ ରବି ଦାସପ୍ରମୁଖ ଉପସ୍ଥିତ ଥିଲେ । ପ୍ରଶାସନ ଏହାର ପ୍ରତିକାର ନ ଗଲେ ଆଗାମୀ ଦିିନରେ ଆନ୍ଦୋଳନକୁ ଜୋରଦାର କରାଯିବ ବୋଲି ସଂଘର କର୍ମକର୍ତ୍ତା ଚେତାବନୀ ଦେଇଥିଲେ।
