ଟ୍ରାଫିକ ନିୟମ ନ ମାନିଲେ ଚାଳକଙ୍କୁ ଜରିମାନା ଦେବାକୁ ପଡେ। କିନ୍ତୁ ଏହା ବଦଳରେ ସେମାନଙ୍କୁ ରଚନା ଲେଖିବାକୁ ପଡିଛି ଭୋପାଳରେ। ସଡ଼କ ସୁରକ୍ଷା ଆଇନ ଲାଗୁ ହେବା ପରେ ବିଭିନ୍ନ ସ୍ଥାନରେ ଚାଳକଙ୍କ ଉପରେ ଲାଗୁ କରାଯାଇଥିବା ଜରିମାନାକୁ ନେଇ ଚର୍ଚ୍ଚା ହେଉଥିବାବେଳେ ଏବେ ଏଭଳି ନିୟମକୁ ଅମାନ୍ୟ କରି ରଚନା ଲେଖିଛନ୍ତି ୧୫୦ ଜଣ ଦୁଇଚକିଆ ଚାଳକ। ଭୋପାଳ ଟ୍ରାଫିକ ପୋଲିସ ହେଲ୍ମେଟ ପିନ୍ଧି ନ ଥିବା ଚାଳକଙ୍କୁ ହେଲମେଟ ନ ପିନ୍ଧିବାର କାରଣ ସମ୍ପର୍କରେ ରଚନା ଲେଖିବାକୁ କହିଥିଲା। ଏହି ଅଭିଯାନ ସଡକ ସୁରକ୍ଷା ସପ୍ତାହ ଅବସରରେ ଆରମ୍ଭ କରାଯାଇ ଏଭଳି ଦଣ୍ଡ ବ୍ୟବସ୍ଥା କରାଯାଇଥିଲା ବୋଲି କୁହନ୍ତି ଭୋପାଳର ଯୁଗ୍ମ ପୋଲିସ ଅଧୀକ୍ଷକ ପ୍ରଦୀପ ଚୌହାନ। ଟ୍ରାଫିକ ନିୟମ ଭଙ୍ଗ କରିଥିବା ଚାଳକମାନେ ୧୦୦ଟି ଶବ୍ଦରେ ରଚନା ଲେଖିଥିଲେ। ଟ୍ରାଫିକ ନିୟମ ଉପରେ ସଚେତନତା ସୃଷ୍ଟି କରିବା ଲାଗି ଏହା କରାଯାଇଥିଲା ଓ ଲୋକମାନଙ୍କୁ ଟ୍ରାଫିକ ନିୟମ ସମ୍ପର୍କିତ ପ୍ରଚାରପତ୍ର ମଧ୍ୟ ବଣ୍ଟାଯାଇଥିଲା। ଟ୍ରାଫିକ ନିୟମ ମାନୁ ନ ଥିବା ଲୋକମାନଙ୍କ ପାଇଁ ଆଗକୁ ଏହି ଦଣ୍ଡ ବ୍ୟବସ୍ଥା ଜାରି ରହିବ ବୋଲି କହିଛନ୍ତି ଚୌହାନ।
