ଉଦଳା,୨୭ା୮ (ଡି.ଏନ୍.ଏ.) – କପ୍ତିପଦା ଉପଖଣ୍ଡ ସଦର ମହକୁମା ଉଦଳା ଏନଏସିର ୧୨ ନଂ ୱାର୍ଡରେ ବାଘ ଆତଙ୍କ ଦେଖାଦେଇଛି। ରବିବାର ରାତିରେ ଏହି ଓ୍ବାର୍ଡକୁ ବାଘ ପଶି ଆସିଥିବା ଖବର ପ୍ରଚାରିତ ହୋଇଥିଲା। ଏଥିନେଇ ଲୋକେ ଆତଙ୍କିତ ହୋଇ ପଡିଥିଲେ। ବନ ବିଭାଗ ପାଖରେ ଏ ସମ୍ପର୍କରେ କୌଣସି ଠୋସ୍ ଖବର ନ ଥିବା ବେଳେ ଏହା ସମ୍ପୂର୍ଣ୍ଣ ଗୁଜବ ବୋଲି ଉଦଳା ରେଞ୍ଜ ଅଧିକାରୀ ଅଜୟ କୁମାର ଦାସ କହିଛନ୍ତି। ଯଦି ସହର ଭିତରକୁ ବାଘ ପଶି ଆସିଥିବା ଜଣାପଡ଼େ ତେବେ ବନ ବିଭାଗ ପକ୍ଷରୁ ଉପଯୁକ୍ତ ପଦକ୍ଷେପ ନିଆଯିବ ବୋଲି ସେ କହିଛନ୍ତି। ଅନ୍ୟପକ୍ଷେ ବର୍ତ୍ତମାନ ଜଙ୍ଗଲୀ ଛତୁ ମିଳୁଥିବାରୁ ସକାଳ ହେଲା ମାତ୍ରେ ଗ୍ରାମବାସୀମାନେ ଛତୁ ଆଣିବାକୁ ଜଙ୍ଗଲକୁ ଯାଉଛନ୍ତି। ଛତୁ ଆଣିବାକୁୁ ଯାଉଥିବା ଲୋକଙ୍କୁ ଭୟଭୀତ କରିବା ପାଇଁ କେହି ଏଭଳି ଗୁଜବ ପ୍ରଚାର କରିଥିବା କୁହାଯାଉଛି ା ଉଲ୍ଲେଖଯୋଗ୍ୟ ଯେ, ଉଦଳା ସହରର ପଶ୍ଚିମ ଦିଗକୁ ଶିମିଳିପାଳ ଅଭୟାରଣ୍ୟ ରହିଛି। ୨୦୧୬ରେ ଗୋଟିଏ କଲରାପତରିଆ ବାଘ ଅଭୟାରଣ୍ୟରୁ ଖସିଆସି ୧୨ ନଂ ୱାର୍ଡର ଏକ ଫାର୍ମ ହାଉସରେ ପଶିଯାଇଥିଲା। ସେତେବେଳେ ବନ ବିଭାଗର କର୍ମଚାରୀମାନଙ୍କୁ ଏଥିପାଇଁ ନାକେଦମ୍ ହେବାକୁ ପଡ଼ିଥିଲା। ବର୍ତ୍ତମାନ ବାଘ ଆତଙ୍କ ଦେଖାଦେଇଥିତ୍ବାରୁ ଉଦଳା ବନ ବିଭାଗ ଏଥିପ୍ରତି ନଜର ରଖିଥିବା ଜଣାଯାଇଛି ା
