ନୂଆଦିଲ୍ଲୀ,୨୨।୧୦: ଉତ୍ତରପ୍ରଦେଶରେ ଜଙ୍ଗଲ ଆଇନ ଚାଲିଛି ବୋଲି ମଙ୍ଗଳବାର ସୁପ୍ରିମ୍କୋର୍ଟ ଏକ ମାମଲାର ଶୁଣାଣି ସମୟରେ ବିରକ୍ତ ହୋଇ କହିଛନ୍ତି। ରାଜ୍ୟ ପ୍ରଶାସନ ପାଖରେ କୌଣସି ମାମଲା ସମ୍ପର୍କରେ ଆଇନଗତ ତଥ୍ୟ ନ ଥିବା ସର୍ବୋଚ୍ଚ ଅଦାଲତ କହିଛନ୍ତି। ଯଦି ରାଜ୍ୟରେ ଧାର୍ମିକ ସ୍ଥଳ ସମ୍ପର୍କିତ ଆଇନ ନାହିଁ ତେବେ ଏହାକୁ ୬ ସପ୍ତାହ ମଧ୍ୟରେ ପ୍ରଣୟନ କରାଇବା ପାଇଁ ସୁପ୍ରିମ୍କୋର୍ଟ ନିର୍ଦ୍ଦେଶ ଦେଇଛନ୍ତି। ବୁଲନ୍ଦସହର ସ୍ଥିତ ୩ ଶହ ବର୍ଷ ପୁରାତନ ଶ୍ରୀସର୍ବମଙ୍ଗଳା ଦେବୀ ବେଲା ଭବାନୀ ମନ୍ଦିରର ପ୍ରଶାସନ ସମ୍ପର୍କିତ ଏକ ମାମଲାର ଶୁଣାଣି ସମୟରେ ସୁପ୍ରିମ୍କୋର୍ଟ ସ୍ବୀକୃତି ପ୍ରାପ୍ତ କର୍ମକର୍ତ୍ତାଙ୍କ ନିର୍ଦ୍ଦେଶ ପତ୍ର ଲୋଡ଼ିଥିଲେ। ମାତ୍ର ମାମଲା ଲଢୁଥିବା ଆଇନଜୀବୀ ଏହା ଦାଖଲ ନ କରିବାରୁ ଏଥିରେ ବିରକ୍ତି ପ୍ରକାଶ କରି ସୁପ୍ରିମ୍କୋର୍ଟ ଏଭଳି କହିଛନ୍ତି। ମନ୍ଦିରର ପ୍ରଶାସନିକ ଅବ୍ୟବସ୍ଥା ନେଇ ଆହ୍ଲାବାଦ୍ ହାଇକୋର୍ଟଙ୍କ ରାୟକୁ ବିଜୟ ପ୍ରତାପ ସିଂ ସର୍ବୋଚ୍ଚ ଅଦାଲତରେ ଚ୍ୟାଲେଞ୍ଜ୍ କରିଥିଲେ।
