ନୂଆଦିଲ୍ଲୀ,୨୩ା୧୧(ପି.ଟି.): ଇ-ସିଗାରେଟ ଏବଂ ଅନୁରୂପ ସାମଗ୍ରୀ ଉତ୍ପାଦନ, ବିକ୍ରି ଓ ଆମଦାନୀ ବନ୍ଦ କରିବା ଲାଗି ଶୁକ୍ରବାର ଲୋକ ସଭାରେ ବିଲ୍ ଆଗତ ହୋଇଛି। ଇଲେକ୍ଟ୍ରୋନିକ୍ ସିଗାରେଟ ନିଷିଦ୍ଧ କରିବା ଲାଗି ସରକାର ନିକଟରେ ଅଧ୍ୟାଦେଶ ଜାରି କରିଥିଲେ। ଲୋକ ସଭାରେ ଅଣାଯାଇଥିବା ବିଲ୍ ଆଇନରେ ପରିଣତ ହେଲେ ତାହା ଅଧ୍ୟାଦେଶ ସ୍ଥାନରେ ଲାଗୁ ହେବ। ଇ-ସିଗାରେଟ ଜନସାଧାରଣ ବିଶେଷ କରି ଯୁବବର୍ଗଙ୍କ ସ୍ବାସ୍ଥ୍ୟ ପାଇଁ ହାନିକାରକ ହୋଇଥିବାରୁ ଏହାର ଉତ୍ପାଦନ, ଆମଦାନୀ, ଗଚ୍ଛିତ ରଖିବା ଏବଂ ବିକ୍ରିକୁ ନିଷିଦ୍ଧ କରିବା ଲାଗି ସରକାର ନିଷ୍ପତ୍ତି ନେଇଥିଲେ। ଉକ୍ତ ଆଇନର ଉଲ୍ଲଂଘନ କଲେ ତିନିବର୍ଷ ଜେଲଦଣ୍ଡ ସାଙ୍ଗକୁ ଜରିମାନା ବ୍ୟବସ୍ଥା ରହିଛି।
ଆସନ୍ତା ସପ୍ତାହରେ ସ୍ବତନ୍ତ୍ର ସୁରକ୍ଷା ଗ୍ରୁପ୍ (ଏସ୍ପିଜି) ଆଇନ୍ରେ ସଂଶୋଧନ ନେଇ ଲୋକ ସଭାରେ ବିଲ୍ ଗୃହୀତ ହେବ ବୋଲି ଶୁକ୍ରବାର କେନ୍ଦ୍ରମନ୍ତ୍ରୀ ଅର୍ଜୁନ ରାମ ମେଘଓ୍ବାଲ କହିଛନ୍ତି। ଏସ୍ପିଜି କମାଣ୍ଡୋମାନେ ପ୍ରଧାନମନ୍ତ୍ରୀ ଓ ତାଙ୍କ ପରିବାରକୁ ସୁରକ୍ଷା ଯୋଗାଇ ଦେଇଥାନ୍ତି। ଏହା ବ୍ୟତୀତ ବିପଦ ଆଶଙ୍କାକୁ ନେଇ ପୂର୍ବତନ ପ୍ରଧାନମନ୍ତ୍ରୀ ଓ ସେମାନଙ୍କ ପରିବାରକୁ କିଛିବର୍ଷ ପାଇଁ ଏହି ସୁରକ୍ଷା ମିଳିଥାଏ। ଏସ୍ପିଜି ଆଇନରେ ସଂଶୋଧନକୁ କେନ୍ଦ୍ର କ୍ୟାବିନେଟ ଅନୁମୋଦନ କରିସାରିଛି। ପ୍ରସ୍ତାବିତ ସଂଶୋଧନ ଅନୁଯାୟୀ ପୂର୍ବତନ ପ୍ରଧାନମନ୍ତ୍ରୀମାନଙ୍କ ପରିବାରକୁ ଆଉ ଏସ୍ପିଜି ସୁରକ୍ଷା ମିଳିବ ନାହିଁ ବୋଲି ଜଣାପଡିଛି। ଗାନ୍ଧୀ ପରିବାରକୁ ୩ ଦଶନ୍ଧି ଧରି ମିଳୁଥିବା ଏସ୍ପିଜି ସୁରକ୍ଷା ବ୍ୟବସ୍ଥାକୁ ସରକାର ନିକଟରେ ପ୍ରତ୍ୟାହାର କରିନେଇଥିଲେ।
