ନୂଆଦିଲ୍ଲୀ,୨୦ା୬: ଜିଏସ୍ଟି କାଉନସିଲ୍ର ବୈଠକ ଆସନ୍ତା ୨୧ରେ ବସିବାକୁ ଯାଉଛି। କେନ୍ଦ୍ରରେ ନୂଆ ସରକାର ଗଠନ ହେବା ପରେ କାଉନସିଲ୍ର ଏହି ବୈଠକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମନେ କରାଯାଉଛି। କାରଣ ଆଉ ୧୫ ଦିନ ପରେ କେନ୍ଦ୍ର ସରକାର ପ୍ରଥମ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରିବାକୁ ଯାଉଛନ୍ତି। ମୋଟର ବାହନ, ଇଲେକ୍ଟ୍ରିକ ଗାଡି ଉପରେ ଲାଗୁଥିବା ଟିକସକୁ ହ୍ରାସ କରିବା ଏବଂ ଟିକସ ଫାଙ୍କିକୁ ରୋକିବା ଲାଗି ଇଲେକ୍ଟ୍ରୋନିକ ଇନଭଏସ ଲାଗୁ କରିବା ନେଇ ଏହି ବୈଠକରେ ନିଷ୍ପତ୍ତି ନିଆଯାଇପାରେ। ଅକ୍ଟୋବରର ପାର୍ବଣ ଋତୁକୁ ଛାଡିଦେଲେ ଗତ ୧୧ ମାସ ହେବ ଗାଡ଼ି ବିକ୍ରି କ୍ରମାଗତ ହ୍ରାସ ପାଇବାରେ ଲାଗିଛି। ଏହି ସେକ୍ଟରକୁ ଟିକସ ଛାଡ ଜରିଆରେ ପୁନର୍ବାର ଗତିଶୀଳ କରିବାକୁ ଗାଡ଼ି ଉଦ୍ୟୋଗଗୁଡ଼ିକ ପକ୍ଷରୁ ଅର୍ଥମନ୍ତ୍ରୀ ନିର୍ମଳା ସୀତାରାମନ୍ଙ୍କ ନିକଟରେ ଦାବି କରାଯାଇଛି। କାଉନସିଲ ଇଲେକ୍ଟ୍ରିକ ଗାଡ଼ିରେ ଲାଗୁ ଥିବା ଜିଏସ୍ଟି ସ୍ଲାବ୍କୁ ହ୍ରାସ କରିପାରନ୍ତି। ବର୍ତ୍ତମାନ ଏଭଳି ଗାଡ଼ି ଉପରେ ୧୨% ଜିଏସ୍ଟି ଲାଗୁ ହେଉଥିବା ବେଳେ କାଉନସିଲ୍ ଏହାକୁ ୫% କୁ ହ୍ରାସ କରିପାରନ୍ତି। ଏହାଛଡା ଇଲେକ୍ଟ୍ରି ଭେହିକିଲ ଚାର୍ଜ ଉପରେ ଜିଏସ୍ଟିକୁ ୧୨%କୁ ହ୍ରାସ କରାଯାଇପାରେ। ଅନ୍ୟପକ୍ଷରେ କମ୍ପାନୀ-କମ୍ପାନୀ ମଧ୍ୟରେ କିଣାବିକା(ବିଜ୍ନେସ୍ ଟୁ ବିଜ୍ନେସ ବା ବି-ଟୁ-ବି) ଲାଗି କେନ୍ଦ୍ରୀକୃତ ସରକାରୀ ପୋର୍ଟାଲରେ ଇ-ଇନଭଏସ୍ ଜାରି କରିବା ଉପରେ ନିଷ୍ପତ୍ତିି ନେଇପାରେ କାଉନସିଲ୍। ଇନ୍ଭଏସ୍ର ଦୁରୁପଯୋଗ ସହ ଟିକସ ଫାଙ୍କିକୁ ରୋକିବା ଏହାର ଉଦ୍ଦେଶ୍ୟ। ଏହାବ୍ୟତୀତ ୧୨ ଓ ୧୮% ଜିଏସ୍ଟି ସ୍ଲାବ୍କୁ ଉଚ୍ଛେଦ କରି ଏହାରି ଭିତର ଆଉ ଏକ ସ୍ଲାବ୍ ସୃଷ୍ଟି କରିବା ନେଇ କାଉନସିଲ୍ରେ ନିଷ୍ପତ୍ତି ହୋଇପାରେ ବୋଲି ଜଣେ ଅଧିକାରୀ ପ୍ରକାଶ କରିଛନ୍ତି।