ନୂଆଦିଲ୍ଲୀ, ୮ା୪ (ପି.ଟି.): ପାକିସ୍ତାନର ପୂର୍ବତନ ପେସ୍ ବୋଲର ଶୋଏବ ଅଖତର ଭାରତ ଓ ପାକିସ୍ତାନ ମଧ୍ୟରେ ୩ ମ୍ୟାଚ ବିଶିଷ୍ଟ ଅନ୍ତର୍ଜାତୀୟ ଦିନିକିଆ କ୍ରିକେଟ ସିରିଜ ପାଇଁ ପ୍ରସ୍ତାବ ଦେଇଛନ୍ତି। ଏଥିରୁ ଉପାର୍ଜିତ ଅର୍ଥ ଦୁଇ ପଡୋଶୀ ଦେଶରେ କୋଭିଡ୍-୧୯ ମହାମାରୀ ବିରୋଧରେ ଚାଲିଥିବା ଲଢ଼େଇ କ୍ଷେତ୍ରରେ ବ୍ୟବହାର କରାଯାଇ ପାରିବ ବୋଲି ସେ କହିଛନ୍ତି। ମ୍ୟାଚଗୁଡ଼ିକ ବିନା ଦର୍ଶକରେ ଆୟୋଜିତ ହୋଇ ପାରିବ। ଲୋକେ କେବଳ ଟେଲିଭିଜନ ଜରିଆରେ ଦେଖିପାରିବେ। ଭାରତରେ ପାକିସ୍ତାନର ଏକ ଆତଙ୍କବାଦୀ ସଂଗଠନର ଆକ୍ରମଣ ଘଟଣା ପରେ ୨୦୦୭ରୁ ଦୁଇ ପଡୋଶୀ ଦେଶ ମଧ୍ୟରେ ଗୋଟିଏ ହେଲେ ପୂର୍ଣ୍ଣାଙ୍ଗ ସିରିଜ ଖେଳାଯାଇ ନାହିଁ। ଉଭୟେ କେବଳ ଏସିଆ କପ୍ ଏବଂ ଆଇସିସି ଇଭେଣ୍ଟରେ ପରସ୍ପରକୁ ଭେଟିଛନ୍ତି । ବର୍ତ୍ତମାନର ସଂକଟଜନକ ପରିସ୍ଥିତରେ ମ୍ୟାଚର ଫଳାଫଳ ଯାହା ହେଉ ନା କାହିଁକି କୌଣସି ଦେଶର ଲୋକଙ୍କ ଉପରେ ପ୍ରଭାବ ପକାଇବ ନାହିଁ ବୋଲି ଇସ୍ଲାମାବାଦରୁ ଏକ ସାକ୍ଷାତ୍କାରରେ ଅଖତର ଏହା ପ୍ରକାଶ କରିଛନ୍ତି। ସେ କହିଛନ୍ତି, ବିରାଟ କୋହଲି ଅବା ବାବର ଆଜାମ ଯେକେହି ଶତକ ହାସଲ କଲେ ମଧ୍ୟ ଉଭୟ ଦେଶର ଖେଳପ୍ରେମୀ ଏହାକୁ ସହଜରେ ଗ୍ରହଣ କରିବେ। ପଡ଼ିଆରେ ଫଳାଫଳ ଯାହା ହେଉ ନା କାହିଁକି ସେଥିରେ ଉତ୍ତେଜନା ସୃଷ୍ଟି ହେବ ନାହିଁ ବୋଲି ମୋର ବିଶ୍ୱାସ। ଏଥିରୁ ଉପାର୍ଜିତ ଅର୍ଥକୁ ଉଭୟ ଭାରତ ଓ ପାକିସ୍ତାନ ସରକାରଙ୍କ ଅଧା ଅଧା ପରିମାଣରେ ଦାନ କରାଯିବ। ମହାମାରୀ ବ୍ୟାପିବାରୁ ରୋକିବା ଲାଗି ଉଭୟ ଦେଶରେ ବର୍ତ୍ତମାନ ଲକ୍ ଡାଉନ୍ ଚାଲିଛି। ପରିସ୍ଥିତିରେ ସୁଧାର ଆସିଲେ ଯାଇ ଏହି ସିରିଜ ଖେଳାଯାଇ ପାରିବ। ଅନ୍ୟପକ୍ଷରେ ଅଖତର କହିଛନ୍ତି, ତାଙ୍କର ଏହି ପ୍ରସ୍ତାବ କେତେଦୂର ଯୁକ୍ତିଯୁକ୍ତ ତାହା ସେ କହିପାରିବେ ନାହିଁ। କିନ୍ତୁ ଏଭଳି ଏକ ଉଦ୍ୟମ ହେବା ଦରକାର। ପୂର୍ବତନ ପେସ୍ ବୋଲର କହିଛନ୍ତି, ଭାରତ ଓ ପାକିସ୍ତାନରେ ବହୁ କ୍ରିକେଟପ୍ରେମୀ ରହିଛନ୍ତି। ଲକ୍ଡାଉନ୍ ଯୋଗୁ ଲୋକେ ବର୍ତ୍ତମାନ ଘରେ ରହୁଛନ୍ତି। ମ୍ୟାଚକୁ ସେମାନେ ଉପଭୋଗ କରିପାରିବେ। ସିରିଜକୁ ନିରପେକ୍ଷ ସ୍ଥାନ ଦୁବାଇରେ ଆୟୋଜନ କରାଯାଇପାରେ। ଏହା ଯଦି ସମ୍ଭବ ହୁଏ ତେବେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ କ୍ରିକେଟ ସମ୍ପର୍କ ସ୍ଥାିପତ ହେବା ସହ କୂଟନୈତିକ ସମ୍ପର୍କରେ ଉନ୍ନତି ଘଟିପାରିବ ବୋଲି ଅଖତର କହିଛନ୍ତି।
