ଭୁବନେଶ୍ୱର,୭।୨(ବ୍ୟୁରୋ): କେନ୍ଦ୍ର ସରକାରଙ୍କ ପକ୍ଷରୁ ଦେଶରେ ଆରମ୍ଭ ହୋଇଛି ଇଜ୍ ଅଫ୍ ଲିଭିଙ୍ଗ୍ ସର୍ବେକ୍ଷଣ। କେଉଁ ସହରରେ ଲୋକେ ରହିବାକୁ ଅଧିକ ପସନ୍ଦ କରୁଛନ୍ତି। ସୁରକ୍ଷାଠାରୁ ଆରମ୍ଭ କରି ପରିମଳ ଆଦି ବିଭିନ୍ନ ସେବା କ୍ଷେତ୍ର ସଂକ୍ରାନ୍ତରେ ଲୋକଙ୍କଠାରୁ ଗ୍ରହଣ କରାଯାଉଛି ମତାମତ। ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରଣାଳୟ ଦ୍ୱାରା ଦେଶର ୧୦୦ ସ୍ମାର୍ଟସିଟିରେ ଏହି ସର୍ବେକ୍ଷଣ କରାଯାଉଥିବାବେଳେ ଓଡ଼ିଶାର ଦୁଇ ସହର ଭୁବନେଶ୍ୱର ଓ ରାଉରକେଲା ସ୍ଥାନ ପାଇଛି। ରାଜଧାନୀ ଭୁବନେଶ୍ୱର ସପକ୍ଷରେ ଅଧିକରୁ ଅଧିକ ମତଦେବାକୁ ଭୁବନେଶ୍ୱର ମହାନଗର ନିଗମ (ବିଏମ୍ସି) କମିଶନର, ବିଡିଏ ଉପାଧ୍ୟକ୍ଷ ତଥା ଭୁବନେଶ୍ୱର ସ୍ମାର୍ଟ ସିଟି ଲିମିଟେଡ୍ର ସିଇଓ ପ୍ରେମଚନ୍ଦ୍ର ଚୌଧାରୀ ସହରବାସୀଙ୍କୁ ନିବେଦନ କରିଛନ୍ତି।
ଗୁରୁବାର ଖବରଦାତା ସମ୍ମିଳନୀରେ କମିଶନର ଚୌଧାରୀ କହିଛନ୍ତି, ଗତ ୧ ତାରିଖରୁ ସର୍ବଭାରତୀୟ ସ୍ତରରେ ଆରମ୍ଭ ହୋଇଥିବା ଏହି ସର୍ବେକ୍ଷଣ ଆସନ୍ତା ୨୯ ତାରିଖ ପର୍ଯ୍ୟନ୍ତ ଚାଲିବ। ନାଗରିକଙ୍କ ପାଇଁ ସହର କେତେଦୂର ବାସଉପଯୋଗୀ ତାହା ଜାଣିବା ପାଇଁ ଏହି ସର୍ବେକ୍ଷଣ କରାଯାଉଥିବାବେଳେ ଏଥିରେ ଲୋକଙ୍କ ସକ୍ରିୟ ଅଂଶଗ୍ରହଣକୁ ଗୁରୁତ୍ୱ ଦିଆଯାଉଛି। ଏଥିପାଇଁ ନାଗରିକମାନେ ଅନ୍ ଲାଇନ୍ରେ http://eol2019.org/citizenfeedbackକୁ ଯାଇ ନିଜର ବାସଉପଯୋଗୀ ମତାମତ ରଖନ୍ତୁ। ଗୋଟିଏ ଗୋଟିଏ ମତ ଭୁବନେଶ୍ୱରକୁ ଆହୁରି ଆଗକୁ ନେବ ବୋଲି ସେ କହିଛନ୍ତି।
ସର୍ବେକ୍ଷଣରେ ଦିଆଯାଇଥିବା ପ୍ରଶ୍ନଗୁଡ଼ିକର ଉତ୍ତର ଦେବା ସମୟରେ ସମ୍ପୃକ୍ତ ନାଗରିକ ତାଙ୍କ ନାମ ଓ ଫୋନ୍ ନମ୍ବର ଦେବା ସହ ସହରରେ ମିଳୁଥିବା ବିଭିନ୍ନ ସେବା ଓ ସୁବିଧା ବାବଦରେ ଉଲ୍ଲେଖ କରିବେ। ସର୍ବେକ୍ଷଣରେ ଶିକ୍ଷା, ସ୍ବାସ୍ଥ୍ୟ, ପରିମଳ, ବର୍ଜ୍ୟ ସଂଗ୍ରହ, ପାନୀୟ ଜଳ ବ୍ୟବସ୍ଥା, ଜଳବନ୍ଦୀ, ଭଡ଼ାଘର, ଯୋଗାଯୋଗ, ମହିଳା ସୁରକ୍ଷା, ଜରୁରିକାଳୀନ ସେବା, ରୋଜଗାରର ସୁଯୋଗ, ଆମୋଦ ପ୍ରମୋଦ, ଚିତ୍ତ ବିନୋଦନ, ବସବାସର ଖର୍ଚ୍ଚ, ଆର୍ଥିକ ସେବା, ବାୟୁମଣ୍ଡଳର ମାନ, ସବୁଜିମା ଏବଂ ବିଦ୍ୟୁତ୍ ଯୋଗାଣ ଆଦିକୁ ନେଇ ୨୧ ପ୍ରଶ୍ନ ରହିଛି। ଅନ୍ଲାଇନ୍ ବ୍ୟତୀତ ନାଗରିକମାନେ କ୍ୟୁଆର୍ କୋଡ଼୍କୁ ସିଧାସଳଖ ସ୍କାନିଂ କରି ମୋବାଇଲ୍ ଫୋନ୍ ମାଧ୍ୟମରେ ମତାମତ ଦେଇପାରିବେ।
ଏହି ଖବରଦାତା ସମ୍ମିଳନୀରେ ସିଟି ଇଞ୍ଜିନିୟର ଦେବସୁନ୍ଦର ମହାପାତ୍ର, ବିଏମ୍ସି ଆଡିଶନାଲ କମିଶନର ଅବନୀକାନ୍ତ ପଟ୍ଟନାୟକ, ଡେପୁଟି କମିଶନର ଶ୍ରୀମନ୍ତ ମିଶ୍ରଙ୍କ ସମେତ ବହୁ ପଦାଧିକାରୀ ଉପସ୍ଥିତ ଥିଲେ।
