ନୂଆଦିଲ୍ଲୀ, ୨୧।୨ (ପି.ଟି.)- ଷ୍ଟାର୍ ସ୍ପ୍ରିଣ୍ଟର ତଥା ମହିଳା ୧୦୦ ମିଟର ରେସ୍ରେ ଜାତୀୟ ରେକର୍ଡର ଅଧିକାରିଣୀ ହୋଇଥିବା ଦୂତୀ ଚାନ୍ଦ ଆମେରିକୀୟ କ୍ରୀଡ଼ା ଚ୍ୟାନେଲ ଇଏସ୍ପିଏନ୍ ପକ୍ଷରୁ ‘ସାହସିକ ପୁରସ୍କାର’ ଜିତିଛନ୍ତି। ଇଏସ୍ପିଏନ୍ କ୍ରୀଡ଼ା ଚ୍ୟାନେଲ ପକ୍ଷରୁ ପ୍ରଥମ ଥର ଲାଗି ସାହସିକ ପୁରସ୍କାର ପ୍ରଦାନ କରାଯାଇଥିବାବେଳେ ଦୂତୀ ଏହାର ପ୍ରଥମ ବିଜେତା ହୋଇଛନ୍ତି। ଉଭୟ ପଡ଼ିଆ ଭିତରେ ଓ ବାହାରେ ଦୂତୀ ସମସ୍ତଙ୍କ ଲାଗି ପ୍ରେରଣାଦାୟୀ ରହିଥିବାରୁ ତାଙ୍କୁ ଏହି ପୁରସ୍କାର ପ୍ରଦାନ କରାଯାଇଛି। ଇଣ୍ଟରନ୍ୟାଶନାଲ ଆସୋସିଏଶନ ଅଫ୍ ଆଥ୍ଲେଟିକ ଫେଡେରେଶନ (ଆଇଏଏଏଫ୍)ର ଭେଦଭାବପୂର୍ଣ୍ଣ ହାଇପରଆଣ୍ଡ୍ରୋଜେନଜିମ ନିୟମ ବିରୋଧରେ ଲଢ଼େଇ କରି ପୁନର୍ବାର ଦୌଡ଼ିବା ଲାଗି ଅଧିକାର ଲାଭ କରି ବେଶ୍ ଚର୍ଚ୍ଚାରେ ରହିଥିଲେ। ସେହିଭଳି ଦେଶର ପ୍ରଥମ ଆଥ୍ଲେଟ୍ ଭାବେ ଦୂତୀ ୨୦୧୯ରେ ସମଲିଙ୍ଗୀ ବୋଲି ନିଜକୁ ଘୋଷଣା କରିଥିଲେ। ଭାରତୀୟ ରୁଢ଼ିବାଦୀ ସମାଜରେ ଏହା ଘୋଷଣା କରି ସେତେବେଳେ ସେ ଖବରର ଶିରୋନାମାରେ ରହିଥିଲେ। ପଡ଼ିଆ ଭିତର ଓ ବାହାରର ଏହି ଦୁଇଟି କାରଣ ଲାଗି ତାଙ୍କୁ ଇଏସ୍ପିଏନ୍ ପକ୍ଷରୁ ପ୍ରଥମ ‘ସାହସିକ’ ପୁରସ୍କାର ବିଜେତା ଭାବେ ଚୟନ କରାଯାଇଥିଲା।
ଚାମ୍ପିୟନ ତଥା ଭାରତୀୟ ବ୍ୟାଡମିଣ୍ଟନ ତାରକା ପି.ଭି. ସିନ୍ଧୁ ଇଏସ୍ପିଏନ୍ ପକ୍ଷରୁ ବର୍ଷର ଶ୍ରେଷ୍ଠ ମହିଳା କ୍ରୀଡ଼ାବିତ୍ ପୁରସ୍କାର ହାସଲ କରିଛନ୍ତି। ଆମେରିକୀୟ କ୍ରୀଡ଼ା ଚ୍ୟାନେଲ ଇଏସ୍ପିଏନ୍ ପକ୍ଷରୁ ତୃତୀୟ ଥର ଲାଗି ସିନ୍ଧୁ ଏହି ସମ୍ମାନଜନକ ପୁରସ୍କାର ଜିତିଛନ୍ତି। ସେହିଭଳି ଯୁବ ଶୁଟର୍ ସୌରଭ ଚୌଧାରୀ ବର୍ଷର ଶ୍ରେଷ୍ଠ ପୁରୁଷ ଖେଳାଳି ବିବେଚିତ ହୋଇଛନ୍ତି।
