ଲଣ୍ଡନ,୧୪।୫(ଏଏଫ୍ପି): ଇଂଲଣ୍ଡ ଗସ୍ତ କରିବାକୁ ଯଦି ଓ୍ବେଷ୍ଟଇଣ୍ଡିଜ ଖେଳାଳିମାନେ କୁଣ୍ଠିତ ହୁଅନ୍ତି, ତା’ହେଲେ ସେମାନଙ୍କୁ ବାଧ୍ୟ କରାଯିବ ନାହିଁ ବୋଲି ଦେଶର ମୁଖ୍ୟ କାର୍ଯ୍ୟନିର୍ବାହୀ ଜନୀ ଗ୍ରେଭ୍ କହିଛନ୍ତି। ଏକ ୩ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବାକୁ ଓ୍ବେଷ୍ଟଇଣ୍ଡିଜ ଇଂଲଣ୍ଡ ଗସ୍ତ କରିବା କାର୍ଯ୍ୟକ୍ରମ ଥିଲା। ତେବେ କୋଭିଡ୍-୧୯ କାରଣରୁ ଏହାକୁ ଜୁଲାଇ ପର୍ଯ୍ୟନ୍ତ ଘୁଞ୍ଚାଇଦିଆଯାଇଛି।
ଏକାଧିକ ଖେଳାଳିଙ୍କ ସହ ଏ ନେଇ ଆଲୋଚନା ହୋଇଛି। ତେବେ ସେମାନଙ୍କ ମଧ୍ୟରୁ କାହାକୁ ବାଧ୍ୟ କରାଯିବ ନାହିଁ ବୋଲି ଗ୍ରେଭ୍ ବିବିସିକୁ ସାକ୍ଷାତକାର ଦେଇ କହିଛନ୍ତି। ୟୁନାଇଟେଡ କିଙ୍ଗଡମ୍ (ୟୁକେ)ରେ କୋଭିଡ୍-୧୯ ମହାମାରୀ କାରଣରୁ ୩୦,୦୦୦ ମୃତ୍ୟୁବରଣ କରିଛନ୍ତି। ଏହା ଆମ ପାଇଁ ଏକ ବଡ଼ ସଂଖ୍ୟା। କାରଣ ଆମ ଦେଶର ଲୋକ ସଂଖ୍ୟା ବହୁତ କମ୍ ବୋଲି ଗ୍ରେଭ କହିଛନ୍ତି। ମ୍ୟାଚ୍ଗୁଡିକ ରୁଦ୍ଧଦ୍ୱାରରେ ବା ଫାଙ୍କା ଷ୍ଟାଡିୟମରେ ଆୟୋଜନ କରିବାକୁ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଯୋଜନା କରୁଛି। ଖେଳାଳିମାନଙ୍କୁ କ୍ୱାରାଣ୍ଟାଇନ୍ରେ ରଖିବା ସହ ଜୈବ ସୁରକ୍ଷିତ ଭେନ୍ୟୁରେ ରଖିବାକୁ ପଦକ୍ଷେପ ଗ୍ରହଣ କରାଯିବ ବୋଲି ଇସିବି ପ୍ରୟାସ କରିବ ବୋଲି କୁହାଯାଇଛି। ତେବେ ସିରିଜ ଆୟୋଜନ ନେଇ ଗ୍ରେଭ୍ ଆଶାବାଦୀ ଥିବା କହିଛନ୍ତି। ଓ୍ବେଷ୍ଟଇଣ୍ଡିଜ ଖେଳାଳିମାନେ ବିଭିନ୍ନ ଦ୍ୱୀପରେ ରହୁଛନ୍ତି। ତେଣୁ ଭିନ୍ନ ନିୟମ ସହ ସେମାନଙ୍କୁ ଗୋଟିଏ ପ୍ଲେନ୍ରେ ବସାଇ ଆଣିବା ଏକ ବଡ଼ ଚ୍ୟାଲେଞ୍ଜ୍। ତେବେ ଏହା ଅସମ୍ଭବ ନୁହେଁ ବୋଲି ଗ୍ରେଭ୍ କହିଛନ୍ତି। ଅବଶ୍ୟ ଖେଳାଳିମାନେ ଦ୍ୱନ୍ଦ୍ୱରେ ଥିବା ଗ୍ରେଭ୍ ସ୍ବୀକାର କରିଛନ୍ତି। ପ୍ରଥମ ମ୍ୟାଚ୍ ପୂର୍ବରୁ ୪ ସପ୍ତାହର ପ୍ରସ୍ତୁତ ଆବଶ୍ୟକ ଓ ପଛକୁ ପଛ ୩ଟି ଟେଷ୍ଟ ମ୍ୟାଚ୍ ଆୟୋଜନ କରିବା ଉପରେ ଗୁରୁତ୍ୱ ଦେବାକୁ ଆମେ ଇସିବିକୁ କହିଛୁ। ଗ୍ରାଉଣ୍ଡରେ ଟ୍ରେନିଂ ପାଇଁ ସାତ ସପ୍ତାହ ସମୟର ଆବଶ୍ୟକାତା ରହିଛି। ପୁଣି ଗ୍ରାଉଣ୍ଡରେ ରହିବା ସହ ହୋଟେଲରେ ଅଲଗା ରହିବା ଦରକାର ବୋଲି ଗ୍ରେଭ୍ କହିଛନ୍ତି।
