ପୁରୁଣା ଭୁବନେଶ୍ୱର, ୨୪।୧୦ (ଡି.ଏନ୍.ଏ.): ମହିଳା ଆଇନଜୀବୀ ଦୀପାଳି ପ୍ରିୟଦର୍ଶିନୀ ଜେନା ମୃତ୍ୟୁ ଘଟଣାରେ ବ୍ୟବଚ୍ଛେଦ ରିପୋର୍ଟ ବୁଧବାର ପୋଲିସର ହସ୍ତଗତ ହୋଇଛି। ସେ ଆତ୍ମହତ୍ୟା କରିଥିବା ରିପୋର୍ଟରେ ଉଲ୍ଲେଖ ରହିଛି। ଧଉଳି ଥାନା ଅଧିକାରୀ ବିଶ୍ୱଜିତ ଜୟଦୀପ କହିଛନ୍ତି, ଦୀପାଳିଙ୍କୁ ହତ୍ୟା କରାଯାଇନାହିଁ। ଆତ୍ମହତ୍ୟା କରିଥିବା ରିପୋର୍ଟରୁ ସ୍ପଷ୍ଟ ହୋଇଛି। ଏଥିପାଇଁ ତାଙ୍କ ପୁରୁଷବନ୍ଧୁ ପରୋକ୍ଷରେ ଦାୟୀ କି ନୁହେଁ ତାହାର ତଦନ୍ତ ଜାରି ରହିଛି। ସେ ଧରାପଡ଼ିବା ପରେ ରହସ୍ୟ ପଦାକୁ ଆସିବ। ଏହାପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜୟଦୀପ କହିଛନ୍ତି।
ସୂଚନା ଥାଉକି, ଦୀପାଳିଙ୍କ ଘର ଭଦ୍ରକରେ ହୋଇଥିବାବେଳେ ସେ ଧଉଳି ଥାନା ଅନ୍ତର୍ଗତ ଲିଙ୍ଗିପୁର ବିଜୟବିହାରସ୍ଥିତ ଏକ ଭଡ଼ା ଘରେ ରହି ଓଜେଏସ୍ ପାଇଁ ପ୍ରସ୍ତୁତ ହେଉଥିଲେ। ଏଥିସହ ଭୁବନେଶ୍ୱର କୋର୍ଟରେ ପ୍ରାକ୍ଟିସ କରୁଥିଲେ। ଗତ ୨୦ ତାରିଖରେ ତାଙ୍କର ଝୁଲନ୍ତା ମୃତଦେହକୁ ପୋଲିସ ଭଡ଼ାଘରୁ ଉଦ୍ଧାର କରିଥିଲା। ଘଟଣାପରଠାରୁ ପୁରୁଷବନ୍ଧୁ ବା ପ୍ରେମିକ ଫେରାର ରହିଥିବାବେଳେ ତାଙ୍କୁ ହତ୍ୟା କରାଯାଇଛି ନା ସେ ଆତ୍ମହତ୍ୟା କରିଛନ୍ତି ତାହାକୁ ନେଇ ସସ୍ପେନ୍ସ ଲାଗି ରହିଥିଲା।
