ନୂଆଦିଲ୍ଲୀ,୧୬।୭: ଆସାମରେ ଜାତୀୟ ନାଗରିକ ପଞ୍ଜିକରଣ(ଏନ୍ଆର୍ସି) ସମୟ ସୀମା ବୃଦ୍ଧି ପାଇଁ କେନ୍ଦ୍ର ତଥା ରାଜ୍ୟ ସରକାରଙ୍କ ପକ୍ଷରୁ ଆବେଦନ ଦାଖଲ ହୋଇଛି। ଏହି ଆବେଦନ ବିଷୟରେ ଚିନ୍ତା କରିବାକୁ ସୁପ୍ରିମ୍କୋର୍ଟ କହିଛନ୍ତି। ଏଥିପାଇଁ ସମୟ ସୀମା ଜୁଲାଇ ୩୧ ଧାର୍ଯ୍ୟ କରାଯାଇଥିଲା। ତେବେ କେନ୍ଦ୍ର ତଥା ରାଜ୍ୟ ସରକାରଙ୍କ ପକ୍ଷରୁ ଏହାର ସମୟସୀମା ବୃଦ୍ଧି ଲାଗି ଏକ ଆବେଦନ ଦାଖଲ କରାଯାଇଛି। ସମୟସୀମା ବୃଦ୍ଧି ଆବେଦନର ଯାଞ୍ଚ୍ ପରେ ନ୍ୟାୟିକ ପ୍ରକ୍ରିୟା ଆରମ୍ଭ ହେବ ବୋଲି ପ୍ରଧାନ ବିଚାରପତି ରଞ୍ଜନ ଗୋଗୋଇ ଏବଂ ବିଚାରପତି ଆର୍. ଏଫ୍. ନରିମନ୍ଙ୍କ ଦ୍ୱାରା ଗଠିତ ଖଣ୍ଡପୀଠ ଏହା ସୂଚିତ କରିଛନ୍ତି। ତରବରିଆ ଭାବେ ଏନ୍ଆର୍ସି ଏତେ କମ୍ ସମୟ ମଧ୍ୟରେ ଅସମ୍ଭବ ବୋଲି ସରକାରଙ୍କ ପକ୍ଷରୁ ସୋଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି। ସୂଚନାଯୋଗ୍ୟ, ଆସାମରେ ଏନ୍ଆର୍ସି ରିପୋର୍ଟ ୨୦୧୮ ଜୁଲାଇ ୩୦ରେ ଜାରି ହୋଇଥିଲା। ଏଥିରେ ରାଜ୍ୟର ୩ କୋଟି ୨୯ ହଜାର ଲୋକଙ୍କ ମଧ୍ୟରୁ ୨ କୋଟି ୮୯ ହଜାର ଲୋକଙ୍କ ନାମ ସାମିଲ୍ ହୋଇଥିଲା। ଅବଶିଷ୍ଟ ୪୦ ଲକ୍ଷ ୭୦ ହଜାର ୭ ଶହ ୭ ଲୋକଙ୍କ ନାମ ତାଲିକାରୁ ବାଦ୍ ପଡ଼ିଥିଲା। ସେହିପରି ୩୭ ଲକ୍ଷ ୫୯ ହଜାର ୬ ଶହ ୩୦ ଜଣ ଲୋକଙ୍କ ନାମକୁ ଅସ୍ବୀକାର କରାଯାଇଥିଲା। ଅପରପକ୍ଷରେ ୨ଲକ୍ଷ ୪୮ ହଜାର ୭୭ ଜଣଙ୍କ ନାମକୁ ଅଲଗା ରଖାଯାଇଥିଲା।
