ବେଙ୍ଗାଲୁରୁ,୨୫ା୭(ପି.ଟି.): ମୁଖ୍ୟମନ୍ତ୍ରୀ ହେବା ପାଇଁ ପାଗ ଭିଡ଼ିଥିବା ଭାଜପାର କର୍ନାଟକ ସଭାପତି ବି.ଏସ୍. ୟେଦୁରପ୍ପା ଉପର ନିର୍ଦ୍ଦେଶକୁ ଅପେକ୍ଷା କରିଛନ୍ତି। ଦଳର କେନ୍ଦ୍ରୀୟ ନେତାଙ୍କ ନିର୍ଦ୍ଦେଶ ପରେ ରାଜ୍ୟରେ ବିକଳ୍ପ ସରକାର ଗଠନ ନେଇ ରାଜ୍ୟପାଳଙ୍କ ନିକଟରେ ସେ ଦାବି ଜଣାଇବେ ବୋଲି ୟେଦୁରପ୍ପା ସୂଚନା ଦେଇଛନ୍ତି।
ଏଚ୍.ଡି. କୁମାରସ୍ବାମୀଙ୍କ ନେତୃତ୍ୱାଧୀନ ୧୪ ମାସିଆ କଂଗ୍ରେସ-ଜେଡିଏସ୍ ମେଣ୍ଟ ସରକାର ମଙ୍ଗଳବାର ଆସ୍ଥାଭୋଟରେ ପରାଜିତ ହେବା ପରେ ୩ ସପ୍ତାହ ଧରି ଚାଲିଥିବା କ୍ଷମତାଯୁଦ୍ଧ ନାଟକର ଯବନିକା ପଡ଼ିଛି। ଏହାସହ ୟେଦୁରପ୍ପାଙ୍କ ନେତୃତ୍ୱରେ ଭାଜପା ସରକାର ଗଢ଼ିବା ପାଇଁ ପଥ ପରିଷ୍କାର ହୋଇଛି। ଏହି ପରିପ୍ରେକ୍ଷୀରେ ୟେଦୁରପ୍ପା ବେଙ୍ଗାଲୁରୁସ୍ଥିତ ଆର୍ଏସ୍ଏସ୍ ରାଜ୍ୟ ମୁଖ୍ୟାଳୟ ‘କେଶବ କୃପା’ରେ ସଂଘ ନେତାଙ୍କୁ ଭେଟିଛନ୍ତି। ସେ କହିଛନ୍ତି, ନୂଆଦିଲ୍ଲୀରୁ କେବେ ନିର୍ଦ୍ଦେଶ ଆସୁଛି ତାକୁ ଅପେକ୍ଷା କରିଛନ୍ତି। ନିର୍ଦ୍ଦେଶ ମିଳିବା ପରେ ବିଧାୟକ ଦଳ ବୈଠକ ଡାକି ରାଜଭବନକୁ ଯିବେ। ଆର୍ଏସ୍ଏସ୍ର ବିନା ଆଶୀର୍ବାଦ ଓ ସହଯୋଗରେ କିଛି ସମ୍ଭବ ନୁହେଁ। ତେଣୁ ପରବର୍ତ୍ତୀ ପଦକ୍ଷେପ ନେବା ପୂର୍ବରୁ ସେ ସଂଘ ପରିବାରର ଆଶୀର୍ବାଦ ନେବା ପାଇଁ ସେଠାକୁ ଯାଇଥିବା କହିଛନ୍ତି। ସେହିପରି ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହଙ୍କ ନିର୍ଦ୍ଦେଶ ପରେ ହିଁ ସରକାର ଗଠନ ପ୍ରକ୍ରିୟା ଆରମ୍ଭ ହେବ ବୋଲି ଦଳର ବରିଷ୍ଠ ନେତା ଜେ.ସି. ମଧୁସ୍ବାମୀ କହିଛନ୍ତି।
ରାଜ୍ୟରେ ଭାଜପା ସରକାର ଗଠନ କଲେ ଏହା ସପକ୍ଷରେ ନାମମାତ୍ର ସଂଖ୍ୟାଗରିଷ୍ଠତା ରହିବ। କୌଣସି ସମୟରେ ଭାଜପା ବିଧାୟକ ଏପଟ ସେପଟ ହେଲେ ପୁଣି ସଙ୍କଟ ଦେଖାଦେବ। ତେଣୁ ସରକାର ଗଢ଼ି ୟେଦୁରପ୍ପାଙ୍କୁ ମୁଖ୍ୟମନ୍ତ୍ରୀ ଆସନରେ ବସାଯିବ ନା ରାଷ୍ଟ୍ରପତି ଶାସନ ଜାରି କରାଯିବ ସେନେଇ ଭାଜପାର ଶୀର୍ଷ ନେତାମାନେ ଚିନ୍ତା କରୁଥିବା ଜଣାପଡ଼ିଛି। ରାଷ୍ଟ୍ରପତି ଶାସନ ଜାରି ହେଲେ ୬ ମାସ ମଧ୍ୟରେ ନିର୍ବାଚନ ହେବ। ଏଥିରେ ଭାଜପା ବୃହତ୍ ଜନାଦେଶ ପାଇ କ୍ଷମତାକୁ ଫେରିବ ବୋଲି ଆଶା କରୁଛି। ତେଣୁ ତରବରିଆ ଭାବେ କୌଣସି ନିଷ୍ପତ୍ତି ନେବାକୁ ଦଳ ଚାହୁଁନାହିଁ। ଅନ୍ୟପକ୍ଷରେ ଆସ୍ଥାଭୋଟରେ ପରାଜୟ ପରେ କଂଗ୍ରେସ-ଜେଡିଏସ୍ ମେଣ୍ଟର ଭବିଷ୍ୟତ ଅନିଶ୍ଚିତତା ମଧ୍ୟକୁ ଚାଲିଯାଇଛି। ବିଦାୟୀ ମୁଖ୍ୟମନ୍ତ୍ରୀ କୁମାରସ୍ବାମୀ ବିଧାୟକ ଦଳ ବୈଠକ ପରେ କହିଛନ୍ତି, ଏବେ ଉଭୟ କଂଗ୍ରେସ ଓ ଆମେ ମୁକ୍ତ। କଂଗ୍ରେସ ନେତାମାନେ ତାଙ୍କ ସହ କିଛି ଆଲୋଚନା କରିନାହାନ୍ତି।
