ଗଣିଆ,୧୫।୯(ଡି.ଏନ.ଏ.)-ସମସ୍ତଙ୍କ ପାଇଁ ଖାଦ୍ୟ, ବସ୍ତ୍ର ଓ ବାସଗୃହ ମୌଳିକ ଆବଶ୍ୟକତା ଅଟେ । ଏହାକୁ ବାଦ୍ ଦେଇ ମଣିଷ ଚଳିବା କଷ୍ଟସାଧ୍ୟ। ଏହି ପ୍ରରିପ୍ରେକ୍ଷୀରେ ଆର୍ଥିକ ଅନଗ୍ରସର ଲୋକମାନଙ୍କ ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ଜାତୀୟ ଖାଦ୍ୟ ସୁରକ୍ଷା ଯୋଜନା ଏବଂ ଆବାସ ଆଦି ବହୁ ଜନହିତକର ଯୋଜନା ପ୍ରଣୟନ କରିଛନ୍ତି । ଏଥିପାଇଁ ସରକାରଙ୍କ ରାଜକୋଷରୁ କୋଟି କୋଟି ଟଙ୍କା ବ୍ୟୟବରାଦ କରାଯାଇ ଖର୍ଚ୍ଚ କରାଯାଉଛି। ହେଲେ କେଉଁଠି ନା କେଉଁଠ ତ୍ରୁଟି ଯୋଗୁ ଏହି ଯୋଜନାଗୁଡିକ ବାସ୍ତବରେ ବାଟବଣା ହୋଇ ଯୋଗ୍ୟ ହିତାଧିକାରୀଙ୍କ ପାଖରେ ପହଞ୍ଚି ପାରୁ ନ ଥିବା ଦେଖିବାକୁ ମିଳୁଛି।
ଜିଲା ଗଣିଆ ବ୍ଲକ ଛାମୁଣ୍ଡିଆ ଗ୍ରାମର ବିଦେଶୀ ବେହେରାଙ୍କ ପରିବାର ଏଭଳି ଉପେକ୍ଷିତ ହୋଇଥିବା ଦେଖିବାକୁ ମିଳିଛି । ଅଭାବ ଅନଟନ ଦେଇ ଗତି କରୁଥିବା ବିଦେଶୀଙ୍କ ପରିବାର ପାଇଁ ସରକାରଙ୍କ ଆବାସ ଯୋଜନା ସତେ ଯେପରି ଉପହାସ କରୁଛି । ବର୍ଷା, ଖରା ଓ ଝଡତୋଫାନରୁ ରକ୍ଷା ପାଇବା ନିମନ୍ତେ ପକ୍କାଘର ଖଣ୍ଡିଏ ପାଇଁ ଗ୍ରାମର ୱାର୍ଡମେମ୍ବରଙ୍କଠାରୁ ଆରମ୍ଭ କରି ବ୍ଲକ ପ୍ରଶାସନ ପର୍ଯ୍ୟନ୍ତ ଆପତ୍ତି ଅଭିଯୋଗ କରିଆସୁଥିଲେ ହେଁ ବର୍ତ୍ତମାନ ସୁଦ୍ଧା ତାଙ୍କୁ ଇନ୍ଦିରା ଆବାସ ଗୃହ ଖଣ୍ଡିଏ ମିଳିପାରିନାହିଁ । ଫଳରେ ଝାଟିମାଟି ଚାଳଛପର ତଳେ ୩ପ୍ରାଣୀ କୁଟୁମ୍ବଙ୍କୁ ନେଇ ବିଦେଶୀ ଜୀବନ ଅତିିବାହିତ କରୁଛନ୍ତି। ସ୍ବଳ୍ପ ରୋଜଗାର ଓ ଆର୍ଥିକ ଅନଟନ ଯୋଗୁ ପକ୍କାଘର ନିର୍ମାଣ କରିବା ଦୂରର କଥା ଚାଳଛପର କରିବା ପାଇଁ ତାଙ୍କ ପାଖରେ ସମ୍ବଳ ନାହିଁ । ଫଳରେ ବର୍ଷାରୁ ରକ୍ଷା ପାଇବା ପାଇଁ ଧାରକରଜ କରି ଜରିପାଲ ଓ ବ୍ୟାନର ସଂଗ୍ରହ କରି ଚାଳରେ ଛପର କରିଥିବା ଦେଖିବାକୁ ମିଳିଛି। ଚାଷଜମି ନ ଥିବା ବେଳେ କେବଳ ଘରଡିହ ଖଣ୍ଡିଏ ରହିଛି ା ଘରଟି ଛାମୁଣ୍ଡିଆ ଗହିର ବିଲ ନିକଟରେ ଥିବାରୁ ବର୍ଷା ହେଲେ ଘର ଭିତରକୁ ସାପ,ବେଙ୍ଗ ଭଳି ସରିସୃପମାନେ ପଶି ଆସିବାର ଭୟ ମଧ୍ୟ ରହିଛି ବୋଲି ବିଦେଶୀ କୁହନ୍ତି। ବିଦେଶୀ ଓ ତାଙ୍କ ସ୍ତ୍ରୀ ମୂଲ ମଜୁରି କରି ଗୁଜୁରାଣ ମେଣ୍ଟାଉଛନ୍ତି। ହେଲେ ସବୁଦିନ କାମ ମିଳୁ ନ ଥିବାରୁ ଯେତେବେଳେ ଯାହା ରୋଜଗାର ହୁଏ ମାସସାରା ଚଳିବା କଷ୍ଟ ହୋଇପଡୁଛି ବୋଲି ସେ କୁହନ୍ତି। ତେବେ ଥିଲାବାଲାକୁ ସବୁ, ନ ଥିଲାବାଲାକୁ ନାହିଁ ପରି ଛାମୁଣ୍ଡିଆ ପଞ୍ଚାୟତରେ ଗୋଟିଏ ପରିବାରକୁ ଦୁଇ ଦୁଇଟି ଇନ୍ଦିରା ଆବାସ ମିଳିଥିବା ବେଳେ ବିଦେଶୀଙ୍କ ପରି ଅନେକ ଗରିବ ସରକାରଙ୍କ ଏହି ଆବାସ ଯୋଜନାରୁ ବଞ୍ଚତ୍ତ ହେଉଥିବା ସାଧାରଣରେ ଚର୍ଚ୍ଚା ହେଉଛି । ଏ ସମ୍ପର୍କରେ ଗଣିଆ ବିଡିଓ ମାନସ ରଞ୍ଜନ ସାମଲଙ୍କୁ ପଚାରିବାରୁ ସରକାରଙ୍କ ସାମାଜିକ ଅର୍ଥନୈତିକ ଜନଗଣନା (ଏସଇସିସି) ତାଲିକାରେ ବିଦେଶୀଙ୍କ ନାମ ଥିଲେ ତାଙ୍କୁ ଇନ୍ଦିରା ଆବାସ ମିଳିପାରିବ ନଚେତ୍ ତାଙ୍କୁ ବିଜୁ ପକ୍କାଗୃହ ଯୋଜନାରେ ସାମିଲ କରାଯାଇ ଗୃହ ଯୋଗାଇ ଦିଆଯାଇପାରିବ ବୋଲି କହିଥିଲେ ା
