ଲୋଇସିଂହା,୨୧।୫(ଡି.ଏନ.ଏ.): ଦିବ୍ୟାଙ୍ଗମାନକର ଲାଗି ସରକାର ଅନେକ ପରକାର ଖାସ୍ ଯୋଜନା ତିଆର କରିଛନ୍। ହେଲେ ଅନେକ ଜାଗାରେ ପରଶାସନିକ ଅଧ୍କାରୀ ଆର ଜନ ପରତିନିଧିମାନକର ଉଦାସୀନତା ଲାଗି ଅନେକ ଦିବ୍ୟାଙ୍ଗ ନିଜର ହକ୍ ପାଏବାରୁ ବଁଚିତ ହେଉଥିବାର ଦେଖ୍ବାକେ ମିଲୁଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ସୁବର୍ଣ୍ଣପୁର ଜିଲା ତରଭା ବ୍ଲକ ରାଣୀସର୍ଡା ପଁଚେତ କୁମୁଣ୍ଡା ହରିଜନ ପଡ଼ାରେ।
ସୂଚନା ଅନ୍ସାରେ ହରିଜନ ପଡ଼ାର ଗର୍ଜୁ କୁଅଁର। ତାକର ପରିବାର କହେଲେ ମାଏକିନା ଜୟନ୍ତୀ, ୩ ପୁଓ ଆର ଗୁଟେବଲି ଝ’କେ ନେଇ ସଁସାର। ହେଲେ ବଡ଼ ପୁଓ ଆର ସାନ ପୁଓ ଠିକ୍ଠାକ୍ ଥିଲାବେଲେ ଦୁତୀଅ ପୁଓ ଭୀମକନ୍ଧ ଆର ଝି’କୁନୀ ଜନମୁ ଅଁଧ୍ ଆଏ। ଗର୍ଜୁକଁର ଜମିବାଡ଼ି ବଲି କିଛି ନାଇଁ, ସେ ମୂଲୁ ସୁଖ୍ବାସୀ ଆଏ। ସେ ଗଁାଗଁା ବୁଲି ଜରି ବ୍ୟାଗ ଆର କପଡ଼ା ସିଲେଇ କରି ନିଜର କୁଟୁମ ପୁଷୁଚନ୍। ଅଲପ୍ ରୁଜଗାରରେ ୬ ପରାନୀ କୁଟୁମ ପୁଷଲାବେଲେ ତାହାକୁ ବହୁତ୍ ଭିଡ଼ାନ ହେଉଛେ। ସେଥିରଲାଗି ସେ ଦିବ୍ୟାଙ୍ଗ ପୁଓ ଝି’କେ ତରଭା ପାସର ଶିବତଲା ଅନ୍ଧ ମୁକ ବଧିର ସ୍କୁଲରେ ଛାଡ଼ିଦେଇଛନ୍। ସେଠାନେ ସେମାନେ ରହି ପାଠ୍ ପଢ଼ୁଛନ୍। ଗର୍ଜୁକଁର ଦୁଇ ଦିବ୍ୟାଙ୍ଗ ପୁଓ ଝି’ ଜିଲାପାଲକଁର ନିରଦେଶରେ ଆଗରୁ ଅନ୍ତ୍ୟୋଦୟ ଅନ୍ନପୂର୍ଣ୍ଣା ଯୋଜନାରେ ୧୦ କେ.ଜି. ଲେଖେଁ ଚାଉଲ ପାଉଥିଲେ। ଇତାର ବାହାରେ ରାଶନ କାର୍ଡରେ ପରିବାରର ଝନ୍ପିଛା ୫ କେ.ଜି. ଲେଖେଁ ଚାଉଲ ପାଉଛନ୍। ଭୀମ ଆର କୁନୀକେ ସରକାରୀ ସାହାଯ୍ କହେଲେ ଖାଲି ଭତା ମିଲୁଛେ। ଦିବ୍ୟାଙ୍ଗମାନକୁ ଆବାସ ଯୋଜନାରେ ସାମିଲ କରି ପକ୍କାଘର ଯୁଗେଇ ଦେବାର ବେବସ୍ତା ରହିଥିଲେ ବି ଦୁଇ ଭାଇବହେନ୍ ଯୋଜନାର ସୁଫଲ ପାଏବାରୁ ବଁଚିତ ହେଇଛନ୍। କୁଟୁମଟା ଗୁଟେ ଭଂଗା ଦଦ୍ରା ଘରେ ଅସାହା ଅବସ୍ତାରେ ଜୀବନ୍ ବିତଉଥିବାର ଗର୍ଜୁ ଅଭିଯୋଗ କରିଛନ୍। ଇ ଦିଗେ ସୁବର୍ଣ୍ଣପୁର ଜିଲାପାଲ ଖାସ୍ ଦୁରୁଷ୍ଟି ଦେଇ ପଦକ୍ଷେପ ନେବାକେ ବୁଧିଜୀବୀ ମହଲରେ ଦାବି ହେଉଛେ।
