ଓ୍ବାଶିଂଟନ୍,୧୧ା୭(ଆଇଏଏନ୍ଏସ୍): ଆମେରିକାର ଆପୋଲୋ ୧୧ ମିଶନ୍ ଚନ୍ଦ୍ରପୃଷ୍ଠରେ ଅବତରଣ କରିବାର ୫୦ବର୍ଷ ପୂର୍ତ୍ତି ପାଳିତ ହେଉଛି। ସ୍ମାରକୀ ସ୍ବରୂପ ଏହି ମହାକାଶ ଯାନକୁ ଓ୍ବାଶିଂଟନ୍ ମନୁମେଣ୍ଟ୍ର ପୂର୍ବଭାଗରେ ପ୍ରଦର୍ଶିତ କରାଯିବ। ୩୬୩ ଫୁଟ ବିଶିଷ୍ଟ ଏହି ସଟର୍ନ ଭି ରକେଟ୍ ଜୁଲାଇ ୧୬ରୁ ୨୦ ପର୍ଯ୍ୟନ୍ତ ପ୍ରଦର୍ଶିତ ହେବ। ଜୁଲାଇ ୨୦ରେ ‘ଆପୋଲୋ ୫୦: ଗୋ ଫର୍ ଦି ମୁନ୍’ ଶୀର୍ଷକରେ ୧୭ ମିନିଟ୍ର ଏକ ସ୍ବତନ୍ତ୍ର କାର୍ଯ୍ୟକ୍ରମ ପ୍ରଦର୍ଶନ କରାଯିବ। ଏହା ଆପୋଲୋ ୧୧ ଲଞ୍ଚ୍ କାର୍ଯ୍ୟକ୍ରମକୁ ସ୍ମରଣ କରାଇବ।
ଆପୋଲୋ ୧୧କୁ ୧୯୬୯ ଜୁଲାଇ ୧୬ରେ କେନେଡି ସ୍ପେସ୍ ସେଣ୍ଟରରୁ ଲଞ୍ଚ୍ କରାଯାଇଥିଲା। ୩ ମହାକାଶଚାରୀ ନିଲ୍ ଆର୍ମଷ୍ଟ୍ରଙ୍ଗ୍, ଏଡଓ୍ବିନ୍ ଆଲଡ୍ରିନ୍ ଏବଂ ମାଇକେଲ କଲିନ୍ସଙ୍କୁ ନେଇ ଯାଇଥିବା ଏହି ମହାକାଶଯାନ ଜୁଲାଇ ୨୦ରେ ଚନ୍ଦ୍ରପୃଷ୍ଠରେ ଅବତରଣ କରିଥିଲା। ଏହି ଉଲ୍ଲେଖନୀୟ ଦିବସକୁ ୫୦ବର୍ଷ ପୂରଣ ହୋଇଥିବାରୁ ଏହାକୁ ବିଶ୍ୱର ଏକ ଐତିହାସିକ ଦିନ ଭାବେ ବିବେଚନା କରାଯାଉଛି।
