ନୂଆଦିଲ୍ଲୀ,୭-୭: ଏଣିକି ପାନ୍ ବଦଳରେ ଆଧାର କାର୍ଡ ମାଧ୍ୟମରେ ୫୦ ହଜାରରୁ ଊର୍ଦ୍ଧ୍ୱ ଟଙ୍କାର ନଗଦ କାରବାର କରିହେବ। ଏହାଛଡ଼ା ଯେଉଁଠି ପାନ୍ ବ୍ୟବହାର ଅନିବାର୍ଯ୍ୟ ଥିଲା ସେଠାରେ ଆଧାର କାର୍ଡ ବ୍ୟବହାର କରିହେବ ବୋଲି ରାଜସ୍ବ ସଚିବ ଅଜୟ ଭୁଷଣ ପାଣ୍ଡେ ଶନିବାର ସ୍ପଷ୍ଟ କରିଛନ୍ତି। ପାନ ବ୍ୟବହାର ବଦଳରେ ଆଧାର କାର୍ଡ ବ୍ୟବହାର ନେଇ ବ୍ୟାଙ୍କ ଏବଂ ଅନ୍ୟ ସରକାରୀ ପ୍ରତିଷ୍ଠାନ ନିଜର ବ୍ୟାକ୍ଏଣ୍ଡକୁ ଅପଗ୍ରେଡ କରିବେ। ଉଲ୍ଲେଖଥାଉ କି, କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଶୁକ୍ରବାର ୨୦୧୯-୨୦ ଆର୍ଥିକ ବର୍ଷର ବଜେଟ ଉପସ୍ଥାପନ କରି ଟିକସଦାତାଙ୍କ ସୁବିଧାର୍ଥେ ପାନ୍ ସ୍ଥାନରେ ଆଧାର ବ୍ୟବହାର କରିହେବ ବୋଲି ଘୋଷଣା କରିଥିଲେ। ପାନ୍ ନ ଥିବା କ୍ଷେତ୍ରରେ ଟିକସଦାତା ଆଧାର ନମ୍ବର ଉଲ୍ଲେଖ କରି ସେମାନଙ୍କ ଆୟକର ରିଟର୍ନ ଦାଖଲ କରିପାରିବେ ବୋଲି ସେ କହିଥିଲେ। ସୂଚନାଥାଉ କି, କଳାଧନ ପ୍ରବାହ ଉପରେ ଲଗାମ ଲଗାଇବାକୁ ଯାଇ ସରକାର ୫୦ ହଜାରରୁ ଊର୍ଦ୍ଧ୍ୱ ପରିମାଣର ନଗଦ କାରବାର ଲାଗି ପାନ୍ ଅନିବାର୍ଯ୍ୟ କରିଥିଲେ। ଏହାଛଡ଼ା ୧୦ ଲକ୍ଷ ଟଙ୍କାରୁ ଅଧିକ ପରିମାଣର ଜମିଜମା କିଣିବାରେ ମଧ୍ୟ ପାନ୍ ବ୍ୟବହାରକୁ ବାଧ୍ୟତାମୂଳକ କରାଯାଇଥିଲା। ପାଣ୍ଡେ କହିଛନ୍ତି ଯେ, ବର୍ତ୍ତମାନ ସୁଦ୍ଧା ଦେଶରେ ୨୨ କୋଟି ପାନ୍ କାର୍ଡକୁ ଆଧାର ସହ ସଂଯୋଗ କରାଯାଇଛି। ଦେଶରେ ୧୨୦କୋଟି ଲୋକଙ୍କ ନିକଟରେ ଆଧାର କାର୍ଡ ରହିଛି। ବଜେଟ ଘୋଷଣା ଯୋଗୁ ପାନ୍ ବ୍ୟବହାର ବନ୍ଦ ହୋଇଯିବ କି ବୋଲି ପ୍ରଶ୍ନର ଉତ୍ତରରେ ସେ କହିଛନ୍ତି ଯେ, କିଛି ଲୋକ ପାନ୍ ଦେବା ସୁବିଧାଜନକ ବୋଲି ଭାବିବେ। ତେଣୁ ଏହା ଆଦୌ ବନ୍ଦ ହେବ ନାହିଁ।
